Kawlgam Immigration Ministry in Visa vai tangkona nei

Kawlgam Immigration Ministry in Visa vai tangkona nei

Kawlgam ah hongzinding gamdang mite ii Visa vaitawh kisai Myanmar Immigration Ministry in thukhunthak tangkona nei uh a, tuapen January 11 ni akipan kizangding cih Irrawaddy News pan kiza hi.

Kawlgam Immigration panin Wednesday ni in a tangko khiat uh hi a, Kawlgam hongzinding gamdang mite ii Short-term leh Long-term Visitors Visa vai te ahihi. Tua tangkona sungah Single Entry Visa tawh kisai nam 12 leh Multiple Entry Visa tawh kisai nam 3 tangkona neikhia uhhi.

Hih thutangkona sungah Policy akikhelthak tampi aomloh hangin ASEAN Standards tawh akituak in puahphatna bawl uh cih kiza hi.

Single Entry Visa tawh kisai nam 12 tepen diplomatic; official travel; tourist; social; journalist; crew; workshop; business; employment; religious; educational; 24-hour transit visa cihte ahihi. Tuaban ah Business, Workshop, Crew and Transit Visa cihte zong “Visa upon Arrival” ci’n vanlengtual tukkhitciang ki latawmthei dinghi.

Multiple Entery Visa tawh kisai nam 3 te pen Special Government approved Re-entry, Special Re-entry, 6 month stay Re-entry Visa cihte ahihi.

Tua hi a, mailam ah gamdang aom Zomi te aomna gam ii Citizenship a ngahkhit ciangin Kawlgam ah Multiple Visa tawh kha 6 sungbang nuamtak in hong ciahkikthei ding uh cih lungdamhuai thukhat ihki hawmsawn hi. ZD Sawltak #zomidaily