Lei ah daitak in kivui ~ Sia Kam Thang
Leitung ah makai siam pen khat ahi Moses pen Israel ten a luang nangawn mu khalo, gui khalo uh, dai takin kivui hi. A hih hang Sih sia hi kei, A manpha sihna hi! Tua zawh kum 1500 bang a sawt khit Mel ki lamdanna Mual ah Zeisu Pasian Tapa hihna kilangsak dingin a sisa Thuciamlui Misiangtho tul za tampi sungpan mi 2 bek Moses le Elijah kiteel hi. Van inn ah mawkmawk lo cihna hipah hi. Vantung ah misiangthote in Moses le Tuuno’ lasa uh hi. Moses tawntung munah thupi le lian zen si.
Topa Zeisu’ gen tangthu – a vui ding mel zong omlo pumtung meima dim Lazarus, dai takin kivui hi. sihsia hikei! Puan neilo pa, puakthak silh, pumpi thak tawh a nuam mahmah Paradise ah tawldam ta hizaw.
Peter ki bungbu khailup, James le Paul a ngawn uh kitan, Sihna kan tan zia mul kimhuai, hihte Pasian’ deihna asep lohman uh hilo, a sepman uh hi zawlai….. Vantung ah a vaikuan ciah ni uh gamlum, thupi, nopci takin kidawn ziahziah ding himah taleh leitungah dai le lipkhap huai takin kivui uh hi.
Kawlgam ah Lungdamna Thu hong puak masapen Adoniram Judson, Khazih itna hangin amangthang Khate’ ading a thuakna genzawh hilo hi. Ama’ nuntak sungin pahtawina ngah ngei hi. Tua nangawn a kigal piak hilai hi. Tua thu azak nading anau nu Abigail in lawptak lai khak paha Kha tampi khitteh anaunu’ laikhak ngah hi. Sima, a khitui luang hi. Lai gelh kik pah a ” Abigail aw Zeisu a kipahtawi lohna, Judson kipah tawina khempeuh na haltum in” , ci hiau hi.
Kawlgam ading Pasian mizat mithupi pen khat , Vantung ah a vai ciah ni nasiatak le thupi tak kidawn ziahziah ding hi mah taleh aluang nangawn leitang ngahlo, Tupi sungah ki lawnsukin daitakin kivui hi. Sihsia hikei. Amanpha sihna hi. Bema Thukhenna hun ciang Judson thaman sangding hong pai dinga, leitung minam khempeuh in khut bet ziahziah ding hi, Kawlgam mite in nak bet pha diak ding in ka um hi.
Tu khang ading Miciim, Mipil, Pasian mi, Hunbit Pasian’ thugen mi tul tampi pantah khia Makai kician, a tultul te’ Kha Pa Dr. Do Suan Mung, kei ngaihsutna ah Sih veve tua hun hi lianglo ding in, a cinat sung dammawh veh a tu atate, beh le phungte banah Kha Thu ah a tate in veh ziahziah mai ding, A Luang tawh hun nunung bawlna bangah Leitung kiuli pan naseppihte, I minam makaite, EBC makai khempeuh kim phingpheng ding, Kumpi namte’ Han cihphial ah kigui ding ka lunggulh sak pong hi.
Hai ing ei, Siapipa’n asihna nangawn ah Zeisu a pahtawi na hi zaw.. Ama’ gen zel “I nuntakna bup Zeisu ki pahtawi nading bek hi. Leitung pen hong ki pahtawi nading mun hi nailo hi. Ka Min ding, ka mualsuang ding ci a nungtate a sih khitteh mai semsem zaw a, Zeisu’ Min than nading bek a nungtate, a sih khitteh kithei semsem, min thang semsem zawsawp hi”, a cihcih ka phawk ta hi.
Vantung a vaiciah ni July 18, Zingsang 8:10 pawl A tultulte’ Kha Pa, A ki niamkhiat Pasian’ Salpha Paradise ah thupi takin kidawnin a kipahtawi ziahziah dinga, himah taleh guahzu daikai nuai ah aluang daitakin kivui hi.
A thu gen ngei khat , ” Missionary Samuel Morison Africa ah kum 25 asep khitteh innlam phading vaciah hi. A tuanna tembaw ah Africa gama cimphong sabeng peuha pai USA kumpi Theodore Roosevelt tawh tuangkhawm kha hi. Leitung ulian pa na sia takin na kidawna, missionary pa ki phawk khalo hi.
Amah zong khasia pian man hi. Tua leh Pasian aw nem ” KA TA, bang hang khasia , lungneu zenzen, hih ulianpa a inn tungta hiven, kidawn mah lo ding maw…. NANG NA HIH LEH NA INN NONG TUN NAI LOH PI, NANG ZONG NONG CIAH CIANG THUPI TAKIN HONG KI DAWN NA VE.”..cih khat zakha, phawk kha lek hi.
Siapipa Dr. Mung na inn tung ta ciai, ko hong damlai hi le cin kote bang mi 100 sang manpha zawlai ding ka ci uha, ahih hang nang tung hong kipia nasep A ZO vilvel ta, Gal dona pha do zo ta, Minthanna mun zuan ta hi mawk ciai. Leitungah nasep maban nanglo in ko bang cih ding , cih huai tampi om mah leh TOPA nang lo in piang kei, naci zaw ta nung ei.
More: Asiading Honkhia in ~ Sia Kam Thang
Nong nusiat khit nungah a kizo nailo Missions nasep hamsatna om ding theihsa, lang panna om ding theihsa, khak tanna om ding theihsa, Lung neuna om ding theihsa, lungkiatna om ding theihsa, tua bang hun ciang tha hong pia a hong lawpsuah kik zel ka Siapipa, na gen gen tangthu: NANG NA HIH LEH NA INN NONG TUN NAI LOH PI, NANG ZONG NONG CIAH CIANG HONG KI DAWN NA VE.”..cih tawh tha naka nung e. Dawn bang tuah kik Ni nuam om ding hi ei. Sia Kam Thang
Comment piaknop aomleh...