Coronavirus le Laisiangtho ~ Lian Muan Kim

Coronavirus le Laisiangtho ~ Lian Muan Kim

A beisa kha 2 lai khawnga kipan leitung hong linglawngsak pen Coronavirus ahi hi. Hih natna pen a kigenkhiat masak sawt pianta hi napi hong minthan taktak ahih leh sawt nailo hi. Ahi zongin hih thu in leitung hong linglawngsak a, leitung sumbawlna nangawn tampi sukha khin ta hi. Natna kingahin kingah ta kei leh mipi hong lausak a, i suahtakna tampi hong nawngkaisak khin hi. 2003 kuma SARS sangin lauhuai zaw a, mi tam sukha zaw khin hi, ci uh hi.

Hih natna pen Wuhan khuapi, Sen gam pana hong kipan ahi hi. Pawlkhatte in sa namkim a zuakna uh pana hong kipan hi ci uh a, pawlkhatte leuleu in lungno-galvan (Bio-weapon, BW) a bawlna uh pana hong kipan hi, ci uh hi. Sen kumpi in bel BW ahi lo theithei dingin gen uh a, thu dangdang ngawh zaw uh hi. Sen kumpi thugente bel uphuai maw uphuai lo cih i theihsa hi.

Wuhan khuapi pen Sen gam aa dingin khuapi lianpen sagihna hi-a, mi awn 11 val bang a tenna khuapi ahi hi. A beisa kum 20 khawnga kipan a khangto mahmah khuapi khat hi-a, New York khuapi bangsak ding a cih liang uh ahi hi. Khuapi a khantohna tawh kizui-in mi zong tam mahmah a, khua sung bangah mi a kiphu ziahziah den ahi hi. Ahi zongin coronavirus hangin tua khuapi pen gamkhing a suak phial ta ahi hi. Jan 20, 2020 khawnga kipan Wuhan khuapi sungah pusuah sungtum khuan kipia nawnlo hi.

Kumpite in kuamah sungtum pusuak theilo ding ci-a thu a piak ma deuh un Wuhan khuapi pan mi awn 5 val bang paikhia khin uh hi. Sen kum thak bawl dinga a khua tek ua ciah tawh, coronavirus hanga a galtai tawh, gamdang mite amau gam tek-a a ciahkik tawh – khuapi sung panin ciahkhia mang uh hi. Tua ahih manin hih khuapi hong dingkik zo ding maw, dingkik zo nawnlo ding cih nangawn a kithei nawnlo hong suak mai hi.

Hih natna huhau-in Sente sumbawlna nak kiat mahmah hi. Tua laitak-in vanleng company 30 val in a vanleng uh Sen gamah lengsak nawnlo uh a, gam 78 bang in amau gamah Sente lutsak nawnlo phot uh hi. Tuni ciangciang hih lungno hangin mi 73,000 val cina ta a, 2000 tang bang si khin ta hi, ci uh hi (WHO, Feb 18, 2020). Sen gam in 2018 kum-a kipan kum khatin khualzi mi awn 150 bang a ngah uh hi-a, ahi zongin tu kum-a kipan kiat cihtak-in kia uh hi.

Vanleng leng ding tampi a ki-cancel bek hilo-in a ki-cancel lo sunsunte zong mimal in amau khualzin ding cancel ziahziah uh hi. Tua ahih manin vanleng tawh khualzinna company-te bekbek in a beisa kha khat sung khawngin awn $700 val bang a sumh khin uh ahi hi. Sen gam buppi in bangzah a sumh zen tam! Sen gam bek zong hilo, leitung buppi in zong a kisuplawh khin ta hi.

Tua hi-a, hih natna tawh kisai ei thu-um mite in bangcih ding, bangci ngaihsut ding, bang sem ding ihi hiam cih tawm khat kikum ding hi hang.

Hih natna pen sa namkim kizuakna pan leh siangtholohna pana hong kipan hi, ci-in gen uh hi. Ahi zongin uphak mahmah hi. Hih natna a ngahte lakah ci sa, khuh, cihte a om hangin natna a ngah lam nangawn a kithei selo-a si ziau zong tampi om hi, ci uh hi. Israel galkap thukan lui khat ahi Dany Shoham in a muhsa thu tampi siksanin hih natna pen BW hi ding hi, ci-in The Washing Times ah gen hi.

Leitung gam khat le gam khat kizopna (kilemna le kilemlohna) leh a diakdiakin Sen kumpi lungsimpuakzia leh gal vai ah a kiginkholhna uh, mihing nuntakna thupi a sakloh zia uh cihte i ngaihsut ciangin hih natna pen BW dinga kibawl, a kehkha pak maw hiam khat hi leh kilawm hi. Tua ahih leh BW namte pen zat theih ding mah ahi hiam? LST in gal do ding a phal hiam? A phal leh kikoici do ding cih tawh kisai hong gen hiam cih tawm kikumsuk ding hi hang.

Gam khat le gam khat gal kido ding pen Pasian deihna ahih masak loh hangin (Rom 12:18), kilemna le thumaanna, kikhaikimna a tun theih na dingin a kisap leh gal kido ding pen Pasian phalna ahi hi (Matt 24:6; Luke 14:31). LST in mi om muang khatpeuh, mawhpaih na ding a neilo khatpeuh i va thah ding hong khaam a (mi that ken, Exo 20:13), ahi zongin ei hong thahsawm a om leh ei le ei i kidalna-in tua pa/nu i thah pen hong khaamlo hi (Exo 22:2).

Kumpite in zong mi hoihlote tungah ‘namsau’ a zat theih na dingun Pasian in phalna pia a (Rom 13:4), Zeisu in zong tua pen ahi ding mahin gen hi (John 19:11). Tua banah Zeisu in khathu tawh kisai ah a nungzuite in namsau a zat ding uh a khaam hangin (Matt 26:52), amau le amau a kidal na dingun namsau a puak ding uh hanthawn kawikawi hi (Luke 22:36-38). Tuiphumpa John mahmah in zong galkapte galkap sung pan a tawp na dingun hanthawn lo a, a maan banga a gamtat na dingun hanthawn zaw hi (Luke 3:14).

Tua hi-a, kumpi gam khat in a kisap leh gal a kap ding pen LST in a phal ahi hi. Ahi zongin koici bangin galkap ding, cih tawh kisai theih ding thu pawlkhat hong hilh hi:

1) Kumpigam khat in a kidopih ding kumpigam pen hilh khol ding; Kigenkhol lo pi-a gal kimawkkap cih bang omlo ding (Luke 14:31-32; Rom 13:4).

2) Mawhna a neilo numei naupang, mipi nautangte suk ding hilo-a (Gen 14 en leng), galkap le galkap bek kisuk ding ahi hi.

3) Zum le hiam, thauvui thautang bek tawh kido ding hi-a, mi khempeuh leh singkung lopa a sisak thei ding galvan tuamtuam, lungno hoihlo, natna a kihel huih, cihte peuhmah zat ding hilo hi (Deu 20:19).

Tua hi-a, 1) hih coronavirus pen galvan-a (BW) zat dinga kibawl ahih leh a kikhial khin ahi hi. Ei thu-umte in hih bang galvan nam peuhmah thapia hetlo a, i khaam theih bangin i khaam ding kisam hi. Galzawh na dinga kibawl hi kha mah ding hi, ahi zongin guallelh na ding hong suak zawsop ding hi. Galte bek in thuaklo ding uh a, ei mahmah zong i peng tuan kei ding hi;

2) Hih natna a thuakte, cinate aa dingin khat le khat thu i kingetsak ding Topa hong sawl ahi hi (Jam 5:17);

3) Wuhan khuapi sungah luangkham lianga Pasian thugente aa dingin zong nakpi takin thu i ngetsak ding (1Thess 5:25; 2Thess 3:1);

4) A dahte tawh na dah khawm un (Rom 12:15), ci ahih manin hih natna a thuakte i dahpih theih ding kisam hi. A tuacih man ua hih banga thuak uh ahi hi, cihcih hun ding hi nawnlo hi;

5) Thu-um mite kisapna na panpih un (12:13), ci ahih manin a diakdiakin hih bang gimna a thuak thu-um mite panpih a, thungetna le neihsa lamsa thagui thatang tawh i huh theih ding zong kisam hi.

Bangbang hi ta leh hih natna a thuakkhinte aa ding ahi-a, a thuak nailote aa ding ahi zongin thu i ngetsak ding; A thuakte hehpih a, i panpih theihna peuhpeuh tawh i panpih ding; BW galvan nam peuhmah tha i piak ngeiloh ding leh hun nunung hong nai zaw thamtham ta hi, cih zong i phawk gige ding a kihanthawn ihi hi. Lian Muan Kim, PhD