San Atonio Pan Tulsa Ah
Monday, October 6
Tuni in ka nuphalpa apa Lianno tawh Dallas ah kituntuah ding ka hi uhhi. Ka visa uh lah kha khat bek om lai a, paizo kik kei kha leng ci in Forth Worth khua a om Pa Tul Mung (Pa Thang Tul Mung leh Nu Khup Don Man)te ahi zongin Pa Mung (Pa Kham Do Mung leh Nu Zo Sian Cing)te nupa kiangah ahi zongin zan khat peuhmah tamin 1963 kum a John F Kennedy kisuamna Dallas khuasung amun tektek a pha nuam ngiat ka hihi. (Tua zawh a kipan Dallas pen Texas te khuapi hi sak nawn lo in a khuapi a khua lian khollo Austin khua ah akituah sak ahihi.)
Amau lam pan ni khat hun pia a hong lak kawikawi ding vaii a lem hangin Dallas pan Tulsa ciahna ding a lem thei kei hi. Ka nuphalpa in lah October ni 7 ni vaii nei zel ahih manin piang thei lo hi. Tua hih manin tua ni pai suaksuak dingin ka khensat uhhi.
Zingsang zingan neek khit nai 10:00AM hong sat ciangin, amau hong vaikhak bangmah in Cherry Mante kiangah ka baang uhhi. Naupangte sangkah in a pa uh Kampi a nasepna ah pai ahih manin amah bek mah na om hi. Tua lai ah vaiimiim cim leh niangtui lim mahmah ka neek khit uh nai 12:00NOON ciangin Austin lam zuanin ka dingkhia leuleu uhhi. Austin ka tun ciangun koi mahah lam baang tuan nawn lo in ka pai suaksuak uhhi.
Lampi ah Fort Worth a om nu Zo Sian zong tawh thu kiza in a mah’n vaimiim cim na huan ning inh hong baang hamtang un hong ci hi. Nu Mante zong tua bangmah in hong taam un ci in hongkho tangtang uhhi. Ahih hangin Tulsa paisuak ding ka hi uh a, mun khat ah khawl photleng hun hong bei toto ding a ka baan vet uh leh mun nih mah ah baan ding hoih kasa uhhi.
A tawpna ah hun kicing sa mahmah lo in Fort Worth khua pen utpipi mah in a nuam lo a khawl nuam lo bang keek khat in ki-awilo pipi in ka kheng valval uhhi. Nitak nai 5:30PM in Dallas khua nawl, Golden Corral sai ah apa Lianno tawh ka kituntuah uhhi. Tua lai ah annee in ka kikhen uh ciangin Sky Tuang in anneekpih tangin sum tampitak hong pia behlap hi.
Cikmah hun a kitheikha ngei naii lo Sky Tuang tawh ka kithuah khak uh pen kimaingap pahin nuam kasa mahmah hi. Mangpau pen siam hithiat peuhmah hi. Kineih luanluan se lo in ama Mangpau in pau hithiat hi. College sang sia khat leh zum sung a nasem khat mikang nungak meel hoih mahmah nih tawh kithei uhhi. Thailand a om leltak apa vaihawm saksa a zi tunkal ding a ngak gige ahihi. A zi in na za kik kei peuh leh, Mikang nungakte na dong in ngai in Mikang pau vive in zawlthu a genthei hi zaw lai hi. Ko tawh mawtaw tung ka tuan kawmkawm mah un kihopih niloh hi.
Nungakte kiang bekah hilo in ko tung zongah thu-nuam peuhmah hi. Amau unau nih Houston mahah om a, a sawtlo in anau khat zong hong tungthuah lai ding ci hi. Apa pen Pa Thawng Za Kap hi a, ko tung a deuh hi leh kilawm hi. US cih thadah Zangkong, Kawlpi, Tedim zong uttlo in Kaptel khua bekbek mah ah a teeng nuam ngiat ahihi hong ci hi. Sky Tuang min taktak pen Pa Go Than Tuang ahihi.
Dallas pan ka kikhen uh a, amah zong tua zan ciah suak lo in Dallas ah giah sawm hi. Ko bel a zanzanin ka pai suaksuak uh a, Tulsa zan 12:00 Midnight mah in ka tung zo pan uhhi.
Azom omlai…
Agelh: Awn Za Pau
Comment piaknop aomleh...