Thopi leh Mompi tangthu ~ Pau Lam Dal

Thopi leh Mompi tangthu ~ Pau Lam Dal

Khatvei lai-in, innlui mahmah khat sungah Mompi khat in buu bawl-in ateeng hi. Thopi khat zong tua innkiu ah ateeng hi. Mompi in tua Thopi aneek theih na ding lampi zongin, nisim in aphatkhem den hi. Nikhat, Mompi in a innveng Thopi kiangah, “Na dam maw, lawm? Hih inn sungah ih teengkhop zong sauvei ta ven, khatvei beek hong hawh dih ve. Bek thamlo-in, kei na innveng khat hisam ing aa, hong hawh lecin ka nuam mahmah ding hi. Hualai-a kahlei na mu hiam, tua pan nongkah to thei ding hi,” ci’n ahopih hi.

Thopi in zong, “Ahai hongsa na hiam? Ganhing gilo khat na hihlam zong ka theikhin hi. Na inn aa hong hawh peuhpeuh na thaanginn ah awkgai khin uh hilo hiam?” ci’n adawng hi.
Mompi in zong, “Bang dingin hong thaangsiah ding ka hia,na innveng pa himawklo ka hiam? Hong hawh dih ve, neek ding tampi khamtakin ne in, ih gualnuam kei ding maw, en hoh mahmah dih ve, ka inn pen naikhau neem hoihmahmah tawh kalam hi, thaanginn hizenzen kei, hong hawh lengla khatpeuh in nuam uh asak mahmah na ding aa kazem hi, nong hehpihna in, tawmvei mahmah hong khawl dih in” ci’n a buu kawk in asam hi.

Thopi in zong, “Kong hawhna ding ahang zong om zenzen kei ee. Na inn aa hong hawh peuhpeuh aciah khiakik om beek kei. Na thu kazak khit hi,” ci’n alengsan dildel hi.

A zingciangin, Mompi in zong Thopi amuh kik ciang, “Ka innvengnu, Tho lah pilmawk ve’n, kei lah ka gilkial sii, koici neek theih ding ka hiam,” ci’n ngian azong hi. Mompi in zong, phatkhem dingin, ahawh hamtang theih nading lampi azong hi. Thopi amuh ciangin, “Bangzah in etlawm in ngaihbaang mawk na hiam?

Ei ganhing nono teng lakah, nang pen amelhoihpen nahihna, Pasian in hong pia hi. Na mitte diamond bangin te lelek dialdial se in, na kha na zaap ciangin mel tuamtuam in kimu aa, na hamciangin zong na aw te khum diakdiak hi, na lutung aa manglukhu (crown) in kumpinu na hihna kilangh sak hi, genbaangna omlo in, na hoihlua hi,” ci’n aphatkhem hi.

Mompi aiikaih na teng, Thopi in azakciangin ahimah akisa hi. Tua ciangin Thopi in, “Ka kilawmna leh ka ngaihhuaina thu nong gen hi. Na inn ah kong hawh ding hi. Ka kilawmnate hong gengen lai in, adang bang neilai ka hiam?” ci’n adong hi. Tua kawm mahin, Mompi inn-ah leng in alut leh, Mompi bu ah a awk hi. Tua ciangin Mompi in zong, “Ka gilkial zawh ni tampi phazo hi, lungnuam tak in kong ne ding hi,” ci’n anui buabua hi.

“Mompi’ gitlohna thu, Thopi in alawmte’ hilhkholhna,” hong phawk hi, ahizongin a kihilhkhol thute angai kei kha hi. Mompi buu sung pan a suaktak zawhna dingin nakpi in ahanciam hi. Ahizongin, Mompi in akhate geel apetkhiat sak hi. Atawpna ah asuahtak nadingin nakpi in tha asan hangin akha te om nawnlo ahih man in asuakta zo tuan kei hi.

• Hih Mompi mah bangin a gilo (ginalo) mi tampi tak leitungah om hi. Amaute phuahtawm zuau ngian hang tawh mawhna neilo mitampi awk sak uh hi.
• Buaina sung pan paikhiat ding sangin buaina sung aa luut khaakloh na dinga kidaalkholhna in naakpi’n thupi zaw hi.
• Lawm leh gual, nu leh pate’n hong hilh hilh, hong tottot lai uh hun manpha sung hi zawa lauhuaina om naailo hi. Pau Lam Dal – Zomi Daily