Coronavirus tawh kisai leitungbup a zato hoihpen khat anei Johns Hopkins University te genna ~ Dr. Do Suan Mung

Coronavirus tawh kisai leitungbup a zato hoihpen khat anei Johns Hopkins University te genna ~ Dr. Do Suan Mung

Hih virus pen nuntakna nei lungno (living organism) hi lo-a, protein molecule (DNA) khat ahi hi. Protein molecule i cih ciangin amino acids tulza tampi a kizom ngiitngeet a om hi in, amino acids sung leuleu ah carbon, hydrogen,oxygen, leh nitrogen te kitam hel pen hi. Hih protein molecule pen sathau (fats) sungah bu a, mit sung, nak sung leh kam sunga cell te in hih virus te a huup khak ciangin apianzia uh kilaih lian in pumpi tung a om cell te a susia, apung ziahziah na khat hong suak mawk hi.

Hih virus in nuntakna nei hilo ahih manin kithat thei lo-a, ama thu a kisia tawm ahi hi. Tua banga a kisiat tawm theih nadingin a satna (temperature), a nomna (humidity) leh bangci bang nate (material) tungah om cihte tawh kisai hi.

Hih virus pen to loin sia baih mahmah hi (fragile). Asiat loh nading a kem thei pen sathau pualam adal paa (thin outer layer of fat) bek ahi hi. Tua ahih manin hih virus kisiat nadingin satpiang (saban) tuamtuamte zat ding thupi mahmah hi. Satpiang phuan tawh i khut setkan (second) 20 bang nuai lehang mit tawh i muhzawh kholloh athau anel teng paikhia in protein molecule te kithehthang a virus te ama thu in beimang hi.

Asa (heat) in sathau tuisak ahih manin khut sil nading, puan sawp nading leh adang tuamtuam ah tui 25 degrees celcius/ 77degrees fahrenheit ciang alum bang peuhmah hileh hoih hi. Tuilum in satpiang zong phuan sakzaw hi. Zu, ahih keileh zu dat 65% kihel na khat peuhpeuh in zong sathau tuisak ahih manin sanitizer sung khawng ah zudat a kihel ahi hi.

Hih virus pen bacteria lungno hilo ahih manin lungno thahna zatui, “poe that say” (antibiotics ) nek ding hilo hi. Atunga i gen bangin hih virus te bukna sathau silkhiat ding thupi pen hi.

Hih virus in puan dan a azaw, anip vante tung tukha leh tang thei loin nai 3 sung khawngin bei hi. Copper tungah nai 4, cardboard tungah nai 24, siik tungah nai 42, plastic tungah nai 72 cih bangin kisia loin om zo hi. Huih lakah leng sak kha leng nai 3 bang om zo hi. Huih laka aom sung kidiik kha thei ding ahih manin i puante (zanpuan zong) a nin, a siang ci tuan loin i sinkhak loh ding zong thupi hi. I puante sungah na bu khinkhian thei ding uh hi.

Hih virus te in avot, anom leh amial sung nuam sa uh hi. Tua ahih manin i omna mun keu in, lum in, khuavak tang leh hih natna kingah lo zawdeuh ding hi. Ultraviolet khuavak (electric light bulb, aksi tang,ctp,.) pan a kingah khuavak te in zong hih lungno beisak thei hi. Hih virus in a cidam vun phu zolo hi. Tua ahih manin i pumtung a avang ahi, i kam, i nak, i mit leh i bilte tawnin i pum sungah lut hi. Tua ahih manin i kam, i nak, i mit, i bil te khut nin tawh i lawnkhak loh ding thupi mahmah hi. I khut i siansak den ding zong kisam mahmah hi.

Mun kigak te ah hih lungno lom om a, mun kikol te ah kizalh zaw hi. Mihon lak pelh ding a thupina tua hang ahi hi.

A kigen sasa mah bangin khutsilna thupi mahmah hi. I kam, i mit, i nak cih te i lawn ma leh i lawn khit ciang, an nek ma, an nek khit, tawh bu, kong honna (locks & knobs), mei honna (switches), TV gal honna (remote control), cell phone, khut nai, computer, TV, sabuai, ctp., i lawn khit phet mahin khut sil hamtang ding hihang. Meima pawn, vunton sung nangawn ah hih virus te bu thei ahih manin khut lim sil mahmah a, sil mun mahmah ding thupi hi. Khutcin sungah zong bu thei ahih manin khutcin tom sak ding zong thupi hi. Ahawmsawn: Dr. Do Suan Mung