Australia gamsung ah mopawi pawlthak kopkhat om a, bangmah puan silhvetlo, anu sungpan in asuahkhiat danlian “Birthday Suits” tawh kiteeng citciat sese uhhi.
Apasal pen British-born khat hi a, aminpen Jeff Adams kici hi. Kum 54 aphakhin khat ahihi. Azi pen New Zealand gampan hi a, aminpen Sue kici hi. Kum 47 phakhin hi.
Nung April khasung in Australia, Queensland sung aom Toowoomba ah kiteenna mopawi bawl uhhi. Mopawi bawlnadingin ateelkhiat munpen “naturist resort” kici mikhempeuh guaktang in aomna munkhat ahihi.
Monu pen Gold Coast ah aom hi a, ama genna ah ka lunggulhdan lianin mopawi kabawlkha ci’n genkhia hi. Pasal kaneih masak hunlai in ka mopawi bawlzia pen kalung kimtheilo hi. Mopawi cihpen khangkhat sungah anop penpen niding hi a, ahi zongin kapasal neihmasak hunlai in kalungkim danin mopawi ki bawlkhalo hi ci’n genkhia hi.
Tu’n ahihleh ta 3 neikhin in, pasal adangkhat aneikik ahihi. Tutung ka pasalneih, ka mopawi uh ahihleh ka lawmpa leh keibek kikal kizopna thupipen in kakoih uh a, adang bangmah ka awlmawh nawnkei uhhi. Midangte’n ka mopawi bawlzia uh hong thukimpihkei khamah inteh, ahi zongin kozong kuamah ka thusim tuankei uhhi ci’n genkhia hi.
Nidang in pasal aneih masak hunlai in mopawini ciangin bangcibang mopuan silhding, bangci kizepding cih lunghimawhden himahleh, tutung mopawi bel puanzong silhkullo in suaktatak in mopawi bawlthei ahih manin, alung nuammahmah cimawk hi.
Keipen vanleiding in vakvak, Shopping Mall paipai cihkhawng ka uknam hilo in, mopawi bawlnading akisampipen ahi zungbulh “Wedding Ring” ompeuhleh adangte kisam kasakei cinong hi. Mopuanding bangmah lei akullohzong metnapi khat “Bonus” lianpi khat hi ci’n azi in genkhia hi.
Jeff leh Sue tepen Online tungtawn in 2015 kum in akimukhia uh ahihi. Queensland khuaneulam ah aomna uhzong naki gamla hetlo in, Minute 20 khawngbek paiziau theihna ah aom ahihlam uh ki theikhia uhhi.
Kha 3 leh alangkhawng aki thuahkhit uhciangin Australia, New South Wales, Byron Bay aom guaktang in aki omzihziahna “Nudist Beach” ah hawhkhawm uhhi. Tuakhit ciangin Europe gamsung Croatia aom Naturist Resort ah 2016 June khasung in hawhkhawm uh a, Holiday zangkhawm uhhi.
Related: Australia ah numeino khat innkuanpih te muhna ah Shark ngapi in petlum
Mopawi abawlna ah amakaih Celebrant pen Mandeep Sandhu kici numeikhat hi a, amahbek tua mopawi sungah puansilh cihi. Adang mipi khempeuh pen “naturist resort” acih mahbang un aguaktang in ompelpal uh cimawk hi.
Leitungmi pawlkhatte ukdan zong acuamcuam himai ei 🙂 ZD Sawltak #zomidaily
Comment piaknop aomleh...