Ahi ziau teng hizaw ~ Evan. Suangh Dal

Ahi ziau teng hizaw ~ Evan. Suangh Dal

“America gam ah Sunday ni zingsang pen kaal khat sungah milim biate a kisut pen Ni hi ta hi. Banghang hiam cihleh mihingte in a maan Pasian Khat bia nawn lo uh hi” – Paul Washer. Tua pen American daan (American Christianity) hita hi.

A cih mah bangin Sunday ni-a biakpiakna cih pen mihing kilaitat thu le la sutsut Ni ding hi loin Pasian’ thu, Lungdamnathu bek i sut ding Ni ahi hi. Mihingte in a beh laplap tua Ciin le Zuih te i thupit sak zawk teh milim biakna (idolatry) hita hi.

Ciin le Zuih:

Topa’ Ni tua Sunday ni pen mihing kilaitat nadingin nite khate tawh tuhkhia-a tuate thupi sa ngiat-in i ciin bel i zuih bel ihih sakna pen Ciin le Zuih (Ritualism) kici hi. Gentehna Anpham piak khiatna khawng, anpham pham-a i pham leh bek thupha om, nulepa khawng nute ni it, pate ni it-a it sese khawng, Sunday ni khawng U Naw Sunday, Judson Sunday, mother day, father day and so on and on., cih banga mihing’ behlap thute tawh thupit sak sese na khawng ciin le Zuih thupit sakna ahi hi.

America Christian daan zong hih daante vive tawh kidim ta ahih manin Nipi zingsim pen milim biate a kisut pen Ni suak ta hi, Zomi Christian te aw.

Tua bangin Nipi sim phial dungdung dangdang sa, lam tawn, diang, ahih keileh la dawng limci khol lo khat khitang khin bang-a music bulompi tawh khin kikkik, sa kikkik (repeat), lumlet suk lumlet to thapai, khawl thei mahmah lo, man thei mahmah lo, hanthotna (sermon) ci lehang lah thupha vai bekbek kisuah-in tulai daan cih peuh, leitung khantohna vai, gualnopna vai, ciamnuihna daan, cihtheih nopsak, hau zo damzo, (materialism, popularity and prosperity gospel) nam daan bekbek hi sawn sawn lai-in upna bulpite pan-a hong pial sak ding, mihingte ki-enna, hauhnopna, kidem nopna, liat nopna, minthan nopna khawng a piangsak a khangsak zawsop ding lam peuh hi zawsop ta-a, gupna khawng upna tawh hi loin eimau thalawh a kisa sak ding lam bekbek suah semsem ta uhi.

Tua ahih manin hih COVID-19 Lockdown hun sungah ih kiphawk ding thu-in na kikhop khop uh hangin Topa Ni suah nawn mahmah kei uh cin kilamdang kei, tawmvei lockdown kikhop khaktan hun sungin hong kihei-in hong ngaihsun phakik dih un cihna ahi hi.

A cih mah bangin Sunday tua Topa thawhkik Ni-a biakpiakna pen thupi na sak zawk pipi ahi tua ciin le zuih (ritualism) daan teng le mihing’ kilaitat hun geelna (human programe) pipite na hi khol loin tua na inn a na kikhop bang teng khawng peuh hi ziau zawsop hi. Sunday Worship i cihcih pen a hi pipi teng na hi lo zawsopin ahi ziau teng mah na hi gige den zaw hi.

America daan pen ahi pipi (Program tuamtuam/ item tuamtuam) teng thupi sak hi-a ahi zongin biakpiakna ah Nungzuipite daan (Apostolic pattern of Worship) mah na hi ziau zaw hi. Ahi pipi tengin i tual sungah khankhialhna piangsak-a ahi ziau (Preaching the Word, singing Hymn and Prayer) tengin khanlawhna maan piang sak zaw hi. Ahi pipi na sak teng hi kei. Ahi ziau teng hizaw, Evan. Suangh Dal

Lai Siangtho sang na kah sawmleh University pipi ci tuan kha ken

“I khangnote lungtang ah Lai Siangtho suang tunga gelh bangin gelh ding le phatakin hilhcian zawhna i neih kei ding leh i University sangte pen Hell tun nading kong (gate) pi peuh hong suah toh toh zawksop ding ka lung himawh hi. Lai Siangtho tungnung bel-a a kikoih lohna mun ah na naupangte na koih loh ding ngaihsut kong pia hi. Pasian’ kammal tatsat lo-a a kihilh lohna sang (University) le kipawlna peuhmah kisia ding hi.”

Kisia ding cihteh a sang (university) pi pen kisia cip pah ding cihna hi loin, khangnote tua bang Christian University pipi ci-in kikhang to sak, ki standard sang sak, ki leitung level sak mahmah-in a kipak mahmah laitak tua bang Christian sang (University) te ah LST kihilhna percentage tawm to semsemin hilhsun leh zong LST lel tak a ci sak ding lam ah kihilh lai uh ahih manin khangnote a upna uh, a upsa uh, a Christian nuntakzia uh Pasian a muanna uh kisia ding a ci ahi hi.

A cih mah bangin tuhun teh Christian theology College te pen a sen sang to theithei kidemin University dongah tun nading ci uh-a, kei bang zong tua pen a tangzai dinga gel semsem Pasian tawh kigam la semsem hi ci-in mu lel mah ing. (အမြင်ကျယ်လေလေ ဝေးလေလေ။) Banghang hiam cih leh University ahih nak leh Lai Siangtho muhna bek maan kei cih lamah tun hamtang hi. A University mahmah a muhmawh huai hi pah lo napi, Christian khangnote Upna guipite pan lam a pialsak pelmawh ding ahihna pen i kipak pih bang khol lo zaw kha ding, cihna hi.