Mo le mi tanu ~ Lian Tuang

Mo le mi tanu ~ Lian Tuang

Ka pa kumpi nasem ahih hangin innkuan sung nuntak ka hamsa mahmah uhi. Tan 10 ka zawh phet in nasem kipan thei ka hih manin innkuan sung nuntak tawm cilik ong nuam tuam zawdeuh hi.

Nidang sangin tawmno khat nuamtuamzaw cihna bek hi a, inn le lo kiphuah zo loin nik le puan zong kilei zo tuamlo hi. Sum leibatte kilohkik zo loin leiba a thak neih beh loh ding bek kihanciam zo hi.

Ahi zongin ka nau Khup in Singapore ah nasep ong kipat theih ciangin innkuan sung nuntakzia nakpi in ong kikhel hi. U le nau, khua le tui, veng le pam, pawlpi sungah pekkhat peknih kizangzo zawdeuh hi. Inn le lo kiphuah zo in, kisapna om bangin kigamta thei zawdeuh hi. Tua bang teng hangin ka nu ka pa zong nuam mahmah uhi. Lungkim mahmah uhi.

1) Ahi zongin a sawt lo khat ciangin ka nau khup in ki it pih lawm ong nei in ka nute kiangah zuthawl piaksak ding thu ong gen hi. Ka nu le ka pa in nang it a hih leh ahoih hi pah hi ci in lawp mahmah uhi. Hih thu pen thakhat thu in kim le pan in kithei ngeingai pah hi

Innlam nuntakzia i theih sa mah bangin mitampi in ka nute kiangah tangval pa zi nei sak nai kei un, zi neileh abeisa bangin ong en zo nawnlo ding hi. A kum zong tawm mahmah lai hi. Nu le pa tawmvei ong en lai phot leh hoihzaw ding hi,….., cih dan in thu tuamtuam tampi deihsakna mah tawh kigen ngeingai hi. Ngaihsutna kipia ngeingai hi.

Ahi zongin tua dan a kigen sim in ka nu in ka tapa in zi neileh a zi tawh kikop in ong en khawm ding uh ahih manin nidang sangin ka hampha zaw lai ding hi. Ken ka tapa a khahsuak ding hi loin tanu khat a nei beh ding ka hih manin ka lawp mahmah hi, ci in dawngkik thei zel hi.

Tu lamlam ciangin hih thu ngaihsutzia pen lamdang sa in thupi ka sa semsem hi. Ka lametna le ngaihsunnate zong tangtung takpi hi ci in ka mu hi.

2) Ka nau Lianbawk ( a neu pen ) zong kei mah bangin tan 10 zawh ciangin kumpi sungah na sem kipan hi. Tawl khat khit ciangin zu ong lim nek mahmah laizang hi. Thudih mahmah napi zu le sa tawh kidiah cip ahih manin ka lungzing mahmah uhi.

An nangawn ne loin zu ong lim nek luat ciangin zu tawh a kipelh theihna dingin hamciam theih bangin ka hanciam awikawi uhi.

Akigen ngei zel thute mah bangin zi nei leh a hoih zaw deuh kha tam cih zong lametna lianpi khat ahi hi.

Ahi zongin zi neih ding thu a kigen simin ka nu in amah it le ngai in a sang zo ding khawng a om zenzenleh amanlang theithei in lak sak ni. Ahi zongin mi tanu khat peuh tawh ei thu in gawmgawp kei ni. Ong kikhel zo kei zenzenleh mi tanu khat ahehpihhuai dingin a bawl suak ding hi hang. Ei hilh zawhloh pen numei no khat in hilh zo tuan ding hiam ci thei zel hi.

Hih pen itna lainatna tawh kidim pilvang thungaihsutzia ahih lam ka phawk kikkik hi. Lian Tuang