Christmas lungzuan ~ Deih Tung

Christmas lungzuan ~ Deih Tung

Van a sangbel na ah Pasian minthang ta hen. Leitung a deih mite tung ah nopna om ta hen. Leitung bup ah mi khem peuh in Christmas pen ki muak tek hi. Lungdam bawl kuan ciang in muh na khem peuh Christmas tree tawh ki dim a, meitang tawh tezih ziah a hih man in ih lungsim khat nop cihtak in nuam pong hi.Christian te sung ah pawi thupi penpen khat in a ki ciam teh pen Chistmas a hihi. Mun khem peuh ah Christian tawh Christian lo tawh a ki bang in Merry Christmas ki ci in inn leh lampi mun tuam tuam te a etlawm thei pen in ki zem hi.

Ka neu lai hun ka phawk hi. December kha hong tun tak in khangno te in sangtuah sim in singtum ki pua a, lungdam bawl zanhak ciang a singcih ding ci in singtum ki pua hi. Khang no makai zaw deuh te in Biakinn a hoih thei pen in zem uh hi. Nitak sim in lungdam bawl zan vakla ding ki sin a, lawm leh gual te tawh nuam ki samah mah hi. Zan ki vak a, Hih inn ah Zeisu suah lungdam na thupha hong tung ta hen ci in ki awngziah ziah hi Van a sangbel na ah Pasian mingthang ta hen, Leitung a deih mite tung ah nop na om ta hen ci in ki awngziah ziah a, Zeisu min tawh nuam tak tak ei ci in ki awngziah ziah hi. A neizaw deuh te in niangtui, an a hi zong in hong vak uh a, nuam kisa mah mah hi. Inntek te in lungdam tak in sum a hi zong, an a hi zong in hong piak te uh pen ki khol a, lungdam bawl a zat ding in ki koih hi.

Mihau te leh gam minthang te ah Biak innpen a hoih thei pen in ki zem a, et lawm mah mah hi. A hi zong in Zogam ah biak inn sung zep na ding na san ki nei zo pha lo a, pawlpi sum neih sun sun pan in ki eu khia thiam hi. Biak inn pen Nahtang kung, Taakteh, Phuitong pak cih bang peuh tawh ki zem a, sum bei lo thei thei in ki zem gawp pong hi.

Lungdam bawl ding ciang in ankuang um khop na ki nei den a, meh ding a om loh luak ciang papi pawl khat gamvak uh a, sa peuh va beng ta zen uh hi. Sa amat zawh loh uh ciang in ankam leh besan tawh lungdam bawl an kuang ki um a, lim ki sa lua mah mah lel hi.

Gam dang ah December kha a ki pat nak leh lungdam bawl la ki hong ziah ziah pah a, mun khem peuh ki zem zihziah hi. Merry Christmas ci in sai thu pi te, mun thu pi te ki zeem a, pawl khat te bang pen Christian a hih loh uh hang in nak lawp lua mah mah uh hi. Nasem pawl khat te ciang in ki off thei lo a, naki sem in ki lungleng mah mah hi. Banghang hiam cih leh Holiday te ah mi nuam sa uh a, hun awngzangh ziah ziah uh a hih manin nasem pawl khat in hun ki ngah lo in ki gim lawh dik dek hi.

Gam dang ah lungdam bawl pen Beer, Zuu tawh ki dawn a, gual nop na in ki nei hi.Gam minthang te ah lungdam bawl ciang in innsung van a thak, puan thak leh na khem peuh a thak in a lei tam pi om hi. Pawlkhat te bang pen Lungdambawl ciang beer, zuu tawh nuamsa in Merry Christmas ci in awngziah ziah uh hi. A taktak in a lungsim vuah bangmah om lo a, sum neih man leh Holiday ngah man in a lungdam pawl khat zong om hi.

Mi tam pi tak tawh a bawl a om bang in , innkuan khat bek in abawl zong om a, khat guak in a bawl zong om hi. Bangbang in ih bawl zong ih lungsim ah hongsuak Zeisuak ih muak ding kisam hi.

Lungdam bawl letsong in bangteng pia ding na hiam? Itna,deihsak na, ei tung ah hong khial te a mawh na uh maisak na, mai tai na, cidam na, gual zawh na…cih te ki piak ding a hi hi.

Hongsuak Zeisu in hauhna, dam na, gualzawh na, minthan na,…te a hih man in ih kisap khem peuh a ki cingna a hihi. Ih zawngna te pan in ih hauh nading, ih dam loh nate pan in ihdam na ding, ih guallehna te pan in ih gualzawh nading, minsiat na pan minthan na ah hongkalsuan pih ding pa a hih man in muaktak a lungdam tak hi.
Azenzen in Topa Zeisu hong pai lo in hi leh ih nuntak na pen ngaihsut ngam ding zong hi lo hi. Ihnuntak na in a mawkna hi ding a, tawntung sihna a ding in a nungta te ih hi ding hi.Tua bek hi lo a ihnuntak na in man nei lo in khiatna khat zong nei lo ding hi.

A thuman Phalbi ka phawk hi. Lungdam bawl ciang lawm leh gual teng tawh gualnop khop hun ka phawk hi. An lim pen meh lim pen a hih loh hang in an kuang um khop zih ziah hun ka phawk hi. Letsong ki hawm a, a tawm man thei thei ih ki piak hang in a ki nuam mah mah hun ka phawk hi.

Zeisu hong suah man in leitung lungdam hen.Leitung a deih mi te tung ah nopna om ta hen a cih mah bang in Zeisu a deih, a sang mi khem peuh tung ah tu leh a tawn tung in nopna thu pha omtawn tung ta hen. Deih Tung