iPhone khat kimawk mekmek ahih manin kum 48 khitciang ki zangkik theipanding

iPhone khat kimawk mekmek ahih manin kum 48 khitciang ki zangkik theipanding

Phone pawlkhat tepen mawkmekgawp khaleng amathu in kikhakcip in, Minute tawlkhat khitciang bekin kizangkik theipan hi. China, Shanghai ah naupangno khatin iPhone khat amawk mekkekleh Lock kikhakcip in, kum 48 khitciangin ki hongkik theipanding cih Message suak cih Oriental Daily pan kiza hi.

Tua iPhone pen nupi khat ii aneihsa hi a, atapa naupangno khatin a utbangbang in mawkmekgawp hi. Tuabangin a mawkmekgawp ciangin tua iPhone pen ki hongkik theinawnlo, Lock cip in, Minute 25,114,984 khitciang bekin Password khenkik in kizangkik theipanding cimawk hi.

Tua Minute 25,114,984 pen akumtawh akituat ciangin kum 48 dektak (47.8 Years) himawk hi.

Tuaciangin tua nupinu in tua iPhone pen Apple Store te kiangah paipih a, kum 48 a ngaknop keileh Reformat bawlkulding a, asungah akep Photo, Video leh Date khempeuh avekin beiding cimawk hi.

Tua iPhone aneinu in a phone sungah Photo leh Video atuamtuam akep tampi omin, adeihmahmah vive himahleh kum 48 tak ngakngeungau mawkdingpen piangthei samlo ahih manin, utlo pipi mahin Format bawlsak cihi.

Kum 48 ngakding himawkleh hih ka iPhone pen ka nuntak sunginzong azang khakik loding kahimawk hi ci’n genkhia hi. Apple Store panin nasemte genna ah hihbangdan buaina Problem tepen adiakdiak in iPhone Operating Systems aluite ah piangthei cihi.

iPhone neinu ii atapa pen kum 2 bek aphapan hi a, anu aomloh laitak in atapa in tua iPhone pen a utbangin meksakgawp ahih manin, hihbangin buaina apiang kici hi.

Naupangno in iPhone’s Security System ah lutkha in, Passcode koihnading munah amanlo in mekkha ahih manin, hihbangin apiang ahihi. Tua Passcode koihnading munsan ah khatvei akhialhsim in iPhone aki zatkik theihhunding kikhanto semsem ahih manin, kum 48 tak ngakkulding dinmun atungto ahihi.

iPhone aneinu in kum 48 taktak ngakkulding in ummawhlo in, amathu in hoihkik lelding ci’n ngakngak hi. Kha 2 sungbang angak hangin kilamdang tuanlo, hoihkikthei tuanlo cimawk hi. iPhone sungah adeihmahmah pawlkhat om himahleh anunung ah cihnading theituanlo in, Format bawlkiksak kici hi.

Tua nupinu in “kum 48 ngakding himawkleng, ka tusawnte kiangah hihpen napa ii ommawhman hi ci’n ka vaikhak kulding hi” ci’n genkhia hi.

More: iPhone X bekbek akigawm in 25 tawh nungak khat Propose bawl

iPhone apuahsiam Technician Wei Chunlong kici in agenna ah abeisa inzong hihbangdan buaina piangngei in, iPhone khat kum 80 sung ki zangtheiloding dinmun tungngei cihi. Sawltak #zomidaily