Christian Hymn te’ tangthu: Ka Kha Ni

Sun of My Soul
(Luke 24:29)
John Keble (1792-1866)
Music from the Katholisches Gesangbuch,
Vienna, c. 1774

Hih la a phuakpa John Keble pen Anglican pawlpi sung khualam pastor khat’ tapa hi a, England gam Fairford, Gloucestershire ah April 25, 1792 ni-in suak hi. Oxford ah sangkah a, tua sang mah ah kum 10 sung professor of poetry sem hi. 1835 panin 1866 kuma a sih dong khuami 1,500 bek a pha Hursley village ah pastor sem hi.

1827 kumin The Christian Year a kici poem bu khat khenkhia hi. Kum khat sunga pawlpi pawi tuamtuamte tawh kituak dinga kiphuak la vive ahi hi. “Ka Kha Ni” zong tua late laka khat hi a, a aw kibulh-in la-in kisa inteh ci-in ngaihsun kha ngei het lo hi. Anglican Book of Common Prayer tawh kithuahkhawma devotion bu-a kinei dinga a ngim ahi hi. A kiniamkhiat lua mahmah mi ahih manin a min nangawn dawngsak se lo hi. Tua poem bu kideih lua mahmah a, ama’ khansungin 109 vei kikhenkik-a, tua laibute kizuakna pana a ngah sum peuhmah a pawlpi ah zek hi.

1833 kumin Oxford ah “National Apostasy” kici sermon minthang mahmah khat gena, tua sermon tungtawnin 19th century Oxford Movement a kici hong piangkhia hi, ci-in kiciamteh hi. Oxford Movement sunga makaite in Church of England sungah khakhanlawhna a om nading hanciamin, tua hun lai-a Wesley leh Whitefield’ nungzui evangelical makaite bangin lah pawlpi gensia gawp lo uh hi. Keble bel sih dong mah Anglican pawlpi sungah kipsuak hi. John Keble a kipawhtawina-in 1869 kumin Oxford ah Keble College kiphuan hi.

A nuntak sung buppi thuhilhsiam leh Laisiangtho thei Bible scholar khat-in kiciamteh hi. La dawng 765 phuak-a, la-aw zong bu khat phuak hi. A lamal phuahte tawh a kisakhawm dinga a ngaihsut ahi hi.

Hih la aw min “Hursley” pen 1774 kum pawl-a Austria gam Vienna-a kikhen Katholisches Gesangbuch labu pana kila ahi hi. Keble ngiat in ama’ phuah la, “Ka Kha Ni” tawh bulh dinga a tel hi a, 1855 kuma kikhen Metrical Psalter sungah kihel hi. Keble in kum tampi sung pastor a sepna pawlpi min tama kiphuak hi a, citak taka kiniamkhiatna tawh Pasian’ na a sepna pahtawina ahi hi.

Rev. Zam Khat Kham
Christian Hymn te’ tangthu 2005