CCF (Hakha) Biakinn thak honna kinei ta ding (16.11.2014)

“Om hithiat unla, Pasian kahihna thei-un!” “Itna tawh khat leh khat na kikhual-un!”cih te bulphuh-in, Zogam, Khalkha khua-ah 1976 kum, Pu Tual Cin te inn ah ih Pu ih Pi mimal (34)te holim kamkupna pan hongpiang khia, Hakha Tedim Tapidaw Innkuan(HTTI)pen Kum(38)cin kum (November 16, 2014) ni-in Biakinn thak honna neiding cih kiza hi. HTTI Biakpiak kikhopna masa penpen Pu. Tual Cin (Pa Kam Cin Hau pa)te inn ah (27.6.1976)ni (1:00)PM in Biakpiak kikhopna nanei uh-a, Rev. Tuan Khaw Kham in (Deu.8:20)tawh hanthotna na nei-cih na ki ciamteh hi. Hun te hong paitoto-a, (23.1.1986)in Khangno kilawmtatna, (14.9.1986)in Nipisang kimakaihna leh (29.8.1987)in Nupi kilawmtatna te na piangkhia hi. (13.7.1982)kum ciangin HTTI pen a tangzai zawding lunggulhna tawh Ciimnuai Christian Fellowship (Hakha)ci-in, min nakhek uhhi. (30.6.1991)ni-in CCF (Hakha) Biakinn thak (tun alui pen) ZBC, Secretary Rev. J. Tial Dum in, Pa Ta Khasiangtho min tawh na hong hi.

Biakinn thak pen (April.13-15, 2009)sung Lambu Mangpi(Go Khan Mang)thusiamna tawh “Pastor Quarter”min pua-in, setpi tawh lei kizik-a, (30.5.2009)in phungcian kizo-in, Inn lam ding ciang Kumpi phalna kisam ahih manin “Biakinn”cih tawh lamtheihna a kingahloh ciang “Laibu saal leh Naucing sang” inn ding cihtawh lamtheihna kingah hi. A kipat cil-in Biakinn lam ding pen hunsau geelna hi-a, “Laibu saal le Naucing sang inn”ding a kilam ahi hi. Biakinn ding geelna(project)diktak omlo himah leh Pasian lampina., (Pu. Khual Khan Thang)ii veina/kinna tawh Geelna (project)diktak omlo pi mah ki hanciam to-a, gamsung gampua tuipi gal khat dong mimal kihelna, CCF pawllut te (Khakhat khasum)(-)vei leh Dinner tuamtuam tawh fundzonna, mimal citpiakna te tawh a kilam BIAKINN ahi hi. Hih biakinn lam na-ah, Pawlsung mite thatang kituatlo, Kawlsum teng(1000)kiim bei dingin ki ummawh hi.

Biakinn thak pen RC leisek innhoih(32.10’x60.9′)gol dawlkhat hi-a, A nunglam-ah apeem, dawlkhen(4)om-a tua lai-ah Um le beel, kuang le keu, Zongeina van tuamtuam te kikoih hi. Amai lamah Dawlthum sang-in Singlamteh innpi dawk om hi. Asung-ah Suang-ngau sual ahoih mahmah kiphah-in, a tung Ceiling pen Mandalay pan khutsiam minthang ten a bulh hi-in, et lawm mahmah hi. A sungah mipi tutna phualpi(4)in kigual-a, khat-ah mi(4/5) kitu thei hi. Nipi sim kikhawm mimal(300)kiim bang kipha den hi.

CCF (Hakha) Biakpiak zia pen Constituation & By-Law om bangin, pawlpi tek-ah kikhop khit sun(1:30)PM in Biakpiak kikhoppi kipan-a, (4:00)PM kiim ah kiman hi. Nipini nitaak pen Khangno hun, Nilai nitaak pen Numei hun, Ninga ni sim Pastor nu makaihna tawh zingsang nai(10)pan Antan thungetna, Ninga nitaak Khangno te Choir sinna, Nino nitaak CE makai te kigin thungetkhopna, Nipini zingsang (6:00-9:00)AM Pasian kammal thuthuk sinna leh Zolai, Zongeina sinna cihbang-in kizangh hi.

CCF(Hakha)pen Pawlpi tuamtuam (15)kigawm hi-a, Tuiphum inn(104), RCM (30), AG (18), EBC(4), SDA (2), UPC (2), TCBC (2), BCM (1), MFC (1), Siangsawn (2),Laipian (1), Yaweh (1), LCJC (1), Buddish (1); mimal Pasal(310), Numei(357)pha hi.

CCF(Hakha)ah tulaitak Pastor pen Pastor Ngem Khawm Niang hi-a, President Upa Thuam Kho Zam (Manager-Retd), Thuzeekpi Upa Kham Lian Sum (State Head Officer, IPRD)te ahi hi. Numei Makaipi Nu. Goih Zam Cing, Thuzeekpi Nu. Ciin Khan Pum, Khangno Makaipi Tg. Pum Suan Mang, Thuzeekpi Tg. Lian Za Kham, CE Makaipi Sm. Huai Khan Man, Thuzeekpi Sm. Niang Khan Nuam te ahi hi. Tukum(2014) CCF thubulphuh in “Hih BIAKINN ah cihtheihna le Nopsakna kongpia dinghi.” Hag.2:9 ahi hi. Ih sangmang Rev. Dr. J.H.Cope lutang phumna-ah Zomi(Tedim kampau)te neih lianbel Biakinnpi pen (16.11.2014)ni-in, Sial (1)le Voktal (3)tawh “Biakinnthak Pasian tung Apna, lungdamkohna pawipi”kinei ding cih kiza hi. A nai a gamla-aa om, Khazih sungah sanggam u le nau a kua mapeuh Ih BIAKINN THAK HONPAWI ah nong kihel na dingun hong kisam hi. Hih ih BIAKINN pen a cing/akem pen CCF(Hakha) pawllut mite hibek-a, ih minam bup neih BIAKINNPI ahi hi. Mimal kim Topan Thupha hongpia tahen! Amen…

Note tawh a lungdam khawm;
John Thang Za Khual
Zogam