Nahoihna Limlangin Mi
“Nang le nang ki en dihve lawm” cih kammal pen zakmun mahmah kammal khat hi dingin kalamen hi. Ei le ei ki ending cihpen ihgen ciang a olmahmah abathangin, ataktak ciangin ahaksa mahmah thukhat ahihi. Ihmel nangawn limlang (mirror) ah ih etkei leh aki mutheilo mihingte ihi zenhi. Ih pualam melpuakzia, ihmit omzia, ihmuk omzia, ihnak apekzia le apumzia, ihbil bangci om cihkhempeuh te nangawn limlang huhna lotawh, ei le ei aki theilo mihingte ihi tazen hi.
Lamkhatpan in genleng, honghuhding van khat teitei a omkei leh ihmel hoihna, ihmel siatna nangawn akitheilo dingte ihihi. Mite mitgol, mitneu ihtheih hangin eimit bangcia pha a, bangci om hiam cih ihtheih lohhun tammahmah hi. Ihmaitang mahmah zong eimah le eimah ihki enthei kei a, ihki mutheikei hi. Tua ihmuh nadingin van ahi limlang (mirror) ihzang hi. Kua in adek mu in, kua in atal mungei hiam? Kua in aluzang mu in, kua in abilteng muthei ahihiam? Tua te ihmuh theihna dingin limlang ihzanghi.
Apualam melpuakzia ei le ei ki ettheih nadingin, limlang akisap mahbangin, asunglam ei le ei kiteltheih nading, ki ettheih nadingin zong limlang tawh akibang honghuhding kisam hi. Leitungah anungta ganhing ahi a, mihing ihhi zongin, ihzakna leh ihmuhna in ihtheihna leh thungaihsuttheihna te tungah tampi takin gualzawhna nei hi. Ihzak ‘awging’ ahihkei leh ‘aging’ khat nangawn ihzak ngeitawh akibang tebek ihtheithei a, ihzak aging khempeuh banghiamcih ihtheikhin ngeikei hi. Agingkhat peuhpeuh ihzak ciangin, ihzakngei, ihtheihngei ‘aging’ te tawh khaikaak in: tua hi in teh; tua hi thei in teh, thauging hi, huihpi nung gin hi, mipau hi, kah aw hi, lasa awging hi, cih bangin ihzak ngeite tungah ihngaihsutna te koihin, ihzak ‘awging’ (aging) tawh kisai in khensatna ihpia hi. Ihman hun a om mahbangin, ihkhialh hunzong tampi omveve hi.
Ihtheihngei, ihzakngei, ihmuhngei, ihnekngei, ihsimngei cih te tawikhai in zangin, apiang thute tungah, ihzak thute tungah khensatna leh khentelna ihpia hi. Zakna tampi nei in, muhna tampi anei te in, theihna tampi aneizaw hongsuak hi. Sangbengsiam te in, zusa anzong ginzia leh Sakhi kheginzia abil in atheih hangin, adang tampi te in, zusa anzong ging nangawn sikha ci in, lau in taithei veve hi. Guitar tumin la ihsaksak hangin, timing man le man lo theituan lo in, nuam ihsak mahmah hunzong omthei hi. Banghanghiam cihleh timing aman koidan hiam cih ihbil in nathei lo a, ihkhut in nasai thei tuanlo hi. Ahizongin, timing manman tawh lasa den mikhat in, timing manlo lasa te tawh nuamtak in lasa khawmthei nawnlo hi. Sinbu in khuazing nuamsa in, nuamtak in alensuk alentoh zenzen hangin, sunkhuakvak ciangin, tanggam lozahdongin cipkhikhe in omhi. Ihtatna kuam ihthei a, eima tualkaihna mun leh thu te ah ih innteek thei hi.
Ei tawh kituak in, mi ihmu a, ihmuh minu mipa tawh kituak in ihmuh ding haksa ihsa mahmah hi. Banghanghiam cih leh, eimit tawh mi i en a, mi mittawh ei ihki enthei kei hi. Tua ahih manin, mi khattungah asia apha ihmuh na in, ei mamit hi a, ama mit hilo ahih manin, ei utbangin mu in, ei utbangin ahoih apha ihkhen hi. Midangte mit ihkawmthei kei a, abilzong ihzangkhawm thei tuankei hi. Mit muhna in, eisunga omzia kilangsak a, bilzakna in thutheihzia hong kilangsak hi. Ihzak thu siangtak leh hoihtak ihtel nadingin, tuatawh kizom thu tampi zakbeh ding kisam hi. Banghanghiam cih leh thu in mongnei a, tengzong nanei ahih man ahihi. Thu mong amuthei te in, thu guiletzia siam uha, adawn ateng khensiam in, atom asau ding bawlsiam, zeksiam uhhi. Thu mong muthei lo te in ahih leh, thulaisat in, a utut napan lennuam ahih manin, cikmah in, thubulcing thei kha lo hi. Thankik atuanna tawh kizui in amel kikhel ci-in, ihsim mawhphial khading hi. Ei le ei hoihtak leh siangtak a akimu thei lo, ei mihing te ihih leh, tuanna ihneih hetloh hangin, ihmel kikkhel zia manlang mahmah zawlai thei hi. Ihhoihna nangawn hongtheih pihding, hoih asa ding midang a om kei leh, bangzahin nikhoih puanhoih silhin, bangzahin ih kizem zongin, bangmah kimanna a omkei hi. Mi dang aomman in ihhoihna kilang thei pan hi. Banghanghiam cih leh ihhoihna athei pen ei ihhi kei a midangte (the other) ahi zaw hi. Ihsunga ombangin ihmit in muthei pan ahih manin, mi hoihna musemsem leng, eizong ahoihsemsem kihi in, mi hoihna zaza leng, eizong ahoihsemsem ding ihihi.
Rev Fr Damian Dal
(Nimdildial)
Comment piaknop aomleh...