Veeng le Paam

Veeng le Paam

Tu laitak biakna kimin kiim le paam puah ding, zuun ding a kilim hilh mahmah laitak ahi hi (Ecumenism). Kiim le paam puahna, zuunna pen Tatkhiatna (Redemption) ngahlawhna ahih loh hangin tatkhiatna a ngah thu-umte adingin kiim le paam puah ding, zuun ding ih tavuan (responsibility) ahi hi (Christian Ethic).

Kiim le paam madawk Veeng

Kiim le paam thu ih gen ma-in a thupi masa khat om a, tua pen veeng le paam thu ahi hi. Veeng pen kiim le paam ii a laimu ahi hi. Tua veeng le paam thu ah veeng (neighbor) pen mihing tawh kisai thu hi a, paam (environment) pen huih, tui, singkung lopa le a sung a pua-a om ganhingte tawh kisai thu ahi hi. Kammal “Kiim” le kammal “Paam” pen a kizang khawm thei kammal hi. Kiim le paam. It is interchangeable word. Kiim le paam pen mihingte adingin a kipiangsak ahih manin na veengte tawh bangci zat ding? bangci zuun ding? bangci kep ding? cih thupi mahmah hi…Piancilna 1: 26-30. (Environment for human survives). Na kiim na paam en inla, vok, ak, keel, ui, bawng, lawi, sakol khawi huai maw? ngaihsun pha mahmah in. Na inn kim ah tui pai nading tuilam bawl in. Huih tungtawnin veengte’ cidamna le daihna a nawngkaai sak gankhawina, angawi set, singset cihte sep loh ding thupi hi.

Nang le nang na ki-it bangin na veengte na it in

Christian upna pen paam (environment) tawh kipan lo-in veeng (neighbor) tawh kipan hi. Banghang hiam cih leh Thukham khempeuh thu khatin kigawm thei a, “Nangmah na ki-it bangin na veengte na it in,” cihna tawh kitomlak thei hi (Galatians 5: 14). Tua ahi manin inn thunget, mopawi le lungdamkoh thunget cihte na neih ciangin na veengte numbat khat ah koih inla, sam (invite) hamtang in. Banghang hiam cih leh na veengte pen guta buluh patau meii kang, gal le sa tuak lecin hong hung masa dingte ahih uh mah bangin, hong hung hong delh kei uh leh a minsia masa dingte zong hi pah uh hi. (Love your neighbor as you love yourself).

A paam a lawh na veengte

Na veeng tawh kipan inla, na paam lawh in. Kei adingin ka veengte cih hi lo zawin, ka veengte adingin “kei” cih lungsim puakzia tawh ih tanglawh, ih piilawh, ih satawite le ih lotui lamte puahpha ni. Kei ading hi kei hong ci sak ih buh zaapna phual pan ka veengte adingin “kei” cih Khrih lungsim puakzia tawh siangtak le limci takin buh zaap kipan kik ni. Christian hihna pen biakna hi lo-in upna hi. Na veengte tungah pan lecin a paam lawh ding hi, na um hiam? Upna ih cih ciangin ih muh theih nailoh ih lamette ngah takpi ding, ci-in muanna lungsim neihna ahi hi…Heb. 11: 1, 2-3. Tanglai mite in upna a na neih manun Pasian in a na pakta hi. Pasian’ kam pauna tawh leitung le vantung piang a, tu-a ih muh theih nate a om nai lopi panin hong piang hi, ci-in ih upna bek mah tawh a thei ihi hi, na ci hi. (Christian Faith)

Ih veengte a kipuah kei leh

Ih veeng aa mite a kipuahphat kei leh a paam lawh thei lo ding hi. Jesuh Khrih’ thu a um taktak Christian te in Khrih thu a um nai lo biaknate le Christian minpua tampi takte tungah Pasian kammal Lai Siangtho tawh puah in zuun a, a pianthak loh uh phamawh hi cih thu ih puak kul masa pen hi. A mite kipuah masa kei leh kikhelna piang lo dinga, kikhelna om kei leh ih kiim ih paam zong kikhel ngei lo ding hi. Christian piangthak taktak mi khat in singkung zat loh piding mawk phuk in, gam mawk hal ngei loding hi. Ih kiim le ih paam a hoih theih nadingin nang le na veengte hong kipuah masak kul hi. Mihingte sia leh kiim le paam zong sia pah hi. Mihingte kikhual taka a nuntaakna mun ah singkung lopa eng dimdiamin dum dihdiah hi. Where people are good, the environment is green. A tomin gen leng, “Na pianthak loh, na suah kik loh phamawh hi. You must be born again” (John 3: 3-7)…Christian perspective.

Kiim le paam a lawh thei masa pen

Kiim le paam a lawh thei masa ding pen na veengte hi. Jesuh nungzui Christian mantak khat na hihna tawh kikhual takin singkung lopa ganhingte direct in na puah na zuun hangin a piangthak lo na veengpa in na haltum sim zel ding hi. Pawlkhatte in gam a halhal teng zong Christian te mah hi, ci ding uh hi. Man mah hi. Gam a halhalte le singkung lopa ganhing tungah khualna a nei thei lo Christian te pen a minpua Christian (nominal Christian) bek hi pan uh hi. Christian thu upna a mindaisak, a nawngkaai sak le a kitelkhial sak tawntung pen hih a minpua Christian te hang ahi hi (Tuuhon lakah Ngia). Zomi Christian te sungah a minpua Christian kitam lua hi. Pasian in itna hi. Jesuh in ong it hi, cih thu pen biakna kim in zong hong theihpih in, hong thukimpih uh hi. Ahi zongin a maute pen mawhnei mi ka hih manin Jesuh ka kisam hi, ci sak thei nai lo hi hang. Nangmah banga mimawh (sinner) ahi na veengpa a mawhna pan Tanpa (Savior) a kisap lam Pasian’ kammal Lai Siangtho tawh hilh in. Preach the gospel to your neighbor.

Evan. Suang Dal