Brad Pitt in atate azi tawh akeptheih nading in laikhia

Brad Pitt in atate azi tawh akeptheih nading in laikhia

Nov. 6, 2016: Kum 52 mi Hollywood actor Brad Pitt in a zi, kum 41 mi, Hollywood actor Angelina Jolie in a nupa kal uh-ah kilemna piangzo nawm mahmah lo hi ci-in “irreconcilable differences” cih paulap zangin September 19 in a Brad Pitt makna lai “divorce petition” kici na khia a, tua lai sungah Jolie in a ta gukte a vekin amah bekin a kep theihna ding thu na bawl hi.

Jolie in hih bangin thu a bawl khum manin Pitt in a tate kimuhpih nuam napi kimuhpih thei lo a, nung diakin bel khatvei a tate kimuhpih hi kici hi. Pitt leh Jolie in ta guk a neihte uh pen Maddox, 15, Pax, 12, Zahara, 11, Shiloh, 10, leh amau geel ta taktak kum giat mi leh a peng Knox leh Vivienne ahi hi.

Pitt in a tate a zi tawh a kep khop theihna dingin “share joint physical and legal custody” kici thukhen zum ah lai khia hi. Zan diak mah in Pitt in a tate ngong bawl in, a tate tungah kampau zangkhial in, a gitloh huaipi in bawl hi ci-in Los Angeles County Department of Children and Family Services “child abuse” ngawhna a bawl thu kanna kidiah lai phot ding hi ci-in a gen khit nungin a tate kep theihna ding lai leh a zi tungah thu bawlna dingin lai a khiat ahi hi. -The Hindu Thang Khan Lian