Hillary in Clinton Foundation adingin asum ngahna thu im uihzo nawnlo

Hillary in Clinton Foundation adingin asum ngahna thu im uihzo nawnlo

Nov. 2016: WikiLeaks in zan diakin Hillary’ presidential campaign chairman Podesta’ email thusim a pholak khit manin Hillaryte nupa in tawlemna tuak leuleu uh ahih manin Hillary’ in a thusim su hum taw hum in pawl khat hum zo nawn lo a, Clinton Foundation in Hillary in US Secretary of State (2009-2012) a let sungin Clinton Foundation adingin Qatar gam panin State Department theihpihna lo tawh huhna ngah mah hi ci-in kipulak khia a, State Department in foreign kumpi tuamtuam panin huhna a piakna thu zong a kanna dingun phalna bel pia nuam tuan lo hi. (Qatar in huhna a piak bek uih lua ta ahih manin a imcip zo nawn lo hi pan bek hi).

Qatari ulian ten 2011 in Bill Clinton’ kum 65 cin’ni in huhna sum piak dingin na ciam uh a, tua sum pen Bill in a ngah theihna dingin Qatar uliante a tuam lieuliau in a kimuhpih a, huhna sum ama’ khut ngiat tawh a lakna dingin kunh uh hi.

Hillary in 2009 in Secretary of State a let theihna dingin gamtat khuahei kilawm zang dingin thukimna “ethics agreement” kici suai kai-in LST len liangin kiciamna na nei a, State Department phalna leh theihpihna lo tawh Clinton Foundation adingin gam dangte a panin huhna sum “foreign-government donor” kici la lo dingin kiciamna na nei in, huhna sum pia nuam om leh State Department theihsakna pia masa dingin kamciamna na nei hi.

Clinton Foundation ulian ten nung kha in Qatar in huhna a piakna thu na pulak nuam lo a, ahih hangin Podesta’ email WikiLeaks in a pholak khiatsak manin imcip zo nawn lo uh ahih manin Clinton Foundation spokesman Brian Cookstra in Qatar tung panin (a sim in) $1million huhna kingah mah a ($ 1-6 million kikal hi kici hi), ahih hangin tua pen tam lo ahih manin Gulf gamte a kipanin “material increase” huhna ci-in sim tak lo hi ci-in kisiamtan lai hi.

#Behlapna: US in human rights palsat hi ci-a a ciamteh Gulf gam tuamtuam (maan sungah en in) panin Clinton Foundation in huhna sum tampi tak State Department theihpihna leh phalna loin na la a, huhna sum a ngahna panin Hillary in a thuk kikna dingin a leh tampi in State Department ulian teng thuzawh in galvan tawh huhna na pia khia ziahziah hi. -Reuters Thang Khan Lian