Unity leh khutme 5 te

Unity leh khutme 5 te

Unity pen uniformity sakha in, tua a tello mipi menggawp a ang-masuan kimakaihna cihte ong kigawm ciang uniformity genloh unity nangawn a mansuah ihi hi.

Khutbom khat ah khutme 5 om a, kikak a a-om liamliam ding kimlai khat ah gawmkhawm nuam in hencip mawk lehang tua pen uniformity hanciamna tawh kibang pahlian ding hi.

Khutme teng kikak a na asep diamdiam ciang nahoih tampi semkhia thei a, a kizialkhop ciang thakhauh in vangikpi zong domzo a, a ki-tum ciang khuttum pen thakhauh mahmah hi. Nahoih sepna ding in kikak kul a, thakhauhna ding in kizialkhop kul hi.

Nasem ding kimlai kizialkhop denkeei ding hilo a, nalian sepding ciang pankhop, zialkhop kul in, thahatna a kisap ciang lomkhat a tumkhop kul hi.

A hun leh amun, a kul leh kisapna zui in kikak a pankhop hun omding a, kizial a matkhop sepkhop hun om in, kizialkhawm, ki-tumkhawm a lomtat hun om ding hi.

Ahi zong in tua khempeuh khut bomkhat hi a, kikhen theilo hi. Khatbek mah ahi hi. A tawntung a ong zialcip, ong tumcip nuamte in nahoih ong seppih ngeilo ding hi. I kimakaihna ah khutmete bang in i nasep, i panmun ding hawm dimdiam a i septheih, i pantheih ciang i minam picing leh nahoih tampi semkhia in i khangto pan ding hi.

Ei’ munciat ah pangsiam a, a kisam bang in a kizial a ki-tum siam ding in ong makaih ding leh ei ciat mahmah in zong i pansiam ding lunggulh huai mahmah hi. Pau Khat Suan