Belpawlgam Ni Lungngaih kikna ~ Dr. Siambawi

Belpawlgam Ni Lungngaih kikna (Khua nung pilna pan Khua ma pilna ah) ~ Dr. Siambawi

Belpawlgam Ni pen tuni Myanmar Belpawl Mipite Makaihna Gampi akici hong piankhiatna bulpi ahi hi. Belpawlgam Ni pen Mualtung mite le Kawlzang kigawmkhop cilna hi a, kigawm kikna hi lo hi. Gamkek British te hangin khat le khat a tuam a hong ki uk hi lo in, cik mah hun in akibelpawl khawm ngei lo Gam te kipawlkhop cilna ahi hi.

Amau muntek ah Gam khat tek in a om tek ahi, Kachin, Chin, Burma le Shan gamte kibelpawl British Kumpi khut sung pan Asuakta Belpawl Gamlianpi khat phutkhopding kiciamna abawl ni uh ahi hi.

Kawlminam te tangthu sung ah akigelh Kawlgam Masa, Kawlgam Nihna, Kawlgam Thumna cih te sung ah Mualmi te kihel ngei lo uh hi.

Hih Belpawlgampi hong piankhiatna Panglong Khawmpi kiciamna “Panglong Thuciam” te tuni dong hong taksuah nai lo in, Kawlminam khat bek te ii ukcipna nuai a Mualmi te kum 70 val akitung hong suak hi.

Milip mipha zah kikhaih luatna, mun le mual haksatna, mualmi te sung ah namke namkhen tuamtuam a tamluatna te hang in tuni dong mah hih Kawlmi khat bek te ukcipna nuai a a ki omom ahi hi.

Tua hi a, Belpawlgam Ni ah I phawk ding thu in, Kawlmi te in Kawlgambup ah Ukna Thuneihna bukim a ngah na bang un, Mualtungmi te in zong, Zomi te in zong eima pupa neihsa Zogam ah Ukna Bukim ngah kik (self-determination) in, tua dinmun tawh Liangko kikim in akipawlkhawm a etlawm Belpawlgam Gampi (Federal) taktak khat I suah zawh nading ahi hi.

Tua dinmun itun nading in ei lei ei ki uk theihna ngah kik hamtang ding cih upna neih ding kisam hi. Tua ading in lungsim kiginna, kisinna, kipattahna neih ding kisam hi.

Hong tunglai ding Kum 70 pen a beisa Kum 70 hong bang ngei nawn lo ding hi. A sawt nawn lo mailam hun ah, Myanmar Gam ii tuah khak ding thu nam nih om hi.

Panglong Thuciam hong tangtung ngei nawn lo in, Belpawlgam zong hong kiphelkhap thei mai ding hi. Tua hun ciang in ei lei ei kiukna ding kiginkholhna nei minam te in amau vai amau hong hong diamdiam thei ding a, a kiginkhollo te in ahih leh buainalianpi sung ah sisan naisan luang in hell gam a kihing tun thei ding din mun ahi hi.

Alang khat ah, Panglong Thuciamna te hong tangtung in Mualmi te ei le ei kikukna bukim ngah kik ciang in a akigingkhin sa, a kithawi khin sa ihih ding kisam hi. Tua hun ciang in khua nung phawk kha leng minamdang te thuvaihawmna nuai ah, a mau hong piak tantan tawh a nungta minam I suak ding hi.

Zomi te minam minvai, tualsung kiukna vai, khua le tui khantohna vai, nopna dahna vai, pilsinna cidamna nuntak khuasakna te khempeuh ah ei tualsung thahatna tawh idin zawh nading mitsuan in hanciam kholh ding, khua phawk kholh ding hi hang. Khua nung phawk cih tangthu pan Mailam thusaupi ngaihsutna tawh a kalsuan minam in ei le ei ikimu in hanciam ding hi hang.

Leitung minam tuamtuam te mai ah Zomi te in “et lawm mualkuam, nun nuam Zogam thak” suaksak zo in, I biak Pasian a minthang sak “mualtung ah akilam khuapi” I suahsak zawh nading, Zomi mimal khat ciat in ka pianken, ka minam vaipuak hi ci in ihih theihna tek pan in hanciam ciat ni. Siambawi, ZINGSOL