Philippines gamsung ah meimual puakkham, cimawh dongtuak mi 61,000 phakhin

Philippines gamsung ah meimual puakkham, cimawh dongtuak mi 61,000 phakhin

Philippines gamsung ah meimual “Volcano” puakkham ahih manin, zanni Wednesday (Jan 24) ciangciang cimawh dongtuak in akihemkhia mi 61,000 phakhin hi ci’n Southeast Asian Country’s Disaster Agency te’n genkhia uhhi. Tua Philippines gamsung ah apuakkham meimual pen “Mount Mayon” hi a, vutsa bekbek ki phitkhia ziahziah hi.

Mount Mayon Volcano panin atunglam ah vutsa “lava” aki phitkhia pen khauhmahmah in, asanna 5km dongah kiphitto hi.

Tua vutsa “Lava Fountain” aki phitkhia pen asanna 500m panin 600m kikal Minute 7 sungbang ki phitkhia hi. Tuaban ah 3km panin 5km kikal zong naikhatval bang ki phitkhia ziahziah hi ci’n Philippine Institute of Volcanology and Seismology (Phivolcs) te’n genkhia uhhi.

Hih Volcano puakkhapna hangin Albay kuamsung leh ageinai aom ahi Camarines Sur province sung aom City leh Municipality 17 ah sanginn khempeuh ki khakcipsak hi. Mount Mayon Volcano pen Philippines gamsung ah meimual ahingdenpen “Most Active” khat hi a, hih apuakkhapna hangin gamsung gampua aleng vanlengzong akigawm in 56 Flights bang ki Cancel sak hi.

Tulaitak belhtheihding in akibawltawm “temporary shelter” te ah khuasungmi akigawm in 55,068 bang cimawh dongtuak in tungkhin uhhi. Adangzong mi 6165 bang amundang ah ki hemkhia in om uhhi.

Meimual puakkhapna hangin Provincial Government in alauhuai “Danger Zone” in akiciamteh pen zaisemsem ahih manin cimawh dongtuak in galtai pen tamsemsemding kici hi.

Video: Thousands more Filipinos displaced as volcanic lava fires ash 5km high

Mount Mayon Volcano apuakkhapna aphual panin 9km Radius huamsungteng alauhuai in ki ciamteh a, 8km Radius huamsung pen paivetlohding in ki khamcip hi.

Hih meimual puakkhapna hangin Albay huamsung aom khua 54 te’n limthuak phadiak uhhi. Tua kuamsung ah akigawm in mihing Population 71,373 bang omding kici hi.

Tulaitak cimawh dongtuak in Shelter ah aomte pen sualtung khawngah kilumsakmai in, dailenbuk “Toilet” khatpen mi 49 bang kikopkhawm in zangkhawm ngeingai uhhi ci’n Philippine Red Cross te’n genkhia hi.

Philippines gamsung ah Red Cross Administrator asemkhat ahi Rose Rivero in agenna ah alauhuai in akiciamteh Danger Zone ki behlap ahih manin, cimawh dongtuak in Shelter abelzong mi tamsemsem hi.

Tuabang in Shelter abel te lakah atamzaw pen lokho mite hizaw uh a, Government leh Charities tuamtuam panin akipiakhia anphel tawh nungta uhhi. Red Cross panin dawnding tuisiang “Drinking Water” ki vaihawmsak in, tuaban ah Counselling leh cidamna tawh kisai in Hygiene tuamtuam ki vaihawmpih cihi.

Abeisa tangthu “History” te abatleh hih Mount Mayon Volcano pen apuakkhap khitzawh khathum, khali mateng Shelter aomte a inn uh ki ciahsakkik theipakloding hi ci’n Red Cross thunei te’n genkhia uhhi.

Tourists te’n lunglut mahmah

Hih Mount Mayon Volcano apuakkham pen gamdangmi ahi adiakdiak in American, European, South Korean cih gamte’n lunglut mahmah uh a, tuagam tepanin khualzinmi tamsemsem hi ci’n Hoteliers te’n genkhia uhhi.

More: Indonesia, Bali tuikulhtung aom Volcano meimual puakkham taktakta

Legazpi aom Four-star Hotel khat ahi Oriental Hotel ah Receptionist asem laitak Nics Ortonio kici in agenna ah Tourists te’n hih meimual puakkham pen lunglut mahmah uh a, anai theithei ah ennuam sawnsawn uh cihi.

Meimual puakkham hangin vutkhu, vuikhu tamlua ahih manin maituam “Facial Mask” leh mitdalna “Goggles” cihte thuah hamtangding in Local Government te’n khuasung mipi te zaksakna nei uhhi. Sawltak #zomidaily