Boston Marathon ah Bomb puakkhamsakpa sihdan kipia

Boston Marathon ah Bomb puakkhamsakpa sihdan kipia

USA gamsung ah abeisa 2013 kum Boston Marathon tai kidemna ah Bomb apuak khamsakpa Friday ni in sihdan kipia cih Fox News in genkhia hi.

Tuapa minpen Dzhokhar Tsarnaev hi a, Massachusetts State ii khuapi Capital ahi Boston khuasung taikidemna mipilak ah 2013 kum Bomb puakkhamsak a, mi 3 in sihlawh hi. Sihdan kipiakna thukhenmangpa in agenkhiat ciangin amai khinglian a, alu kunsuk cihi. Sihdan pen “Lethal Injection” akici zatui aki sunlumding ahihi.

Hih thukhenna azak ciangin Bomb kitap hunlai in athuakkha ahi Sydney Corcoran in “amah pen agamlapi pai tading a, kei leh kanu ahihleh ka maban uh kazomding uhhi” ci’n genkhia hi. Sydney Corcoran pen Bomb apuahkhap ciangin sisan naisan tawh sidektak a, anu ahihleh akhe anih in kitan ahih manin lungtang namahmah uhhi.

“Thumanna cihpen mittang ading mittang hi” cihzong Sydney Corcoran in genkhia hi.

Hih Boston Marathon pen 15 April 2013 ni in akibawl ahihi. Tai kidem te alutnading among atunkuan in Pressure-cooker tawh akibawl Bomb 2 puakkham a, mi 3 in sihlawh bekthamlo adang mi 260 bangin liamlawh hi. Asi lakah Martin Richard kicipa pen kum 8 bek phapan a, Marathon taikidem lakah akum tawmpenzong hipah a, a innkuan in tai kidemna ah akihel uh ahihi.

Dzhokhar Tsarnaev in Boston Marathon taikidemna sungbek thamlo, amah amanding in azong Massachusetts Institute of Technology Police Officer khatzong thatsawnsawn ahih manin amawhna lianmahmah hi. Bomb sukkhapna ah akihel pen amah leh a sanggampa hi a, a sanggampa pen palik te’n matding adelhna panin si khin a, tu’n aman sihdan atuak ahihi. ZD Sawltak