Bangladesh gamsung aom Rohingya Refugee te aomna uh kituahsak

Bangladesh gamsung aom Rohingya Refugee te aomna uh kituahsak

Bangladesh kumpi in amau gamsung aom Rohingya Muslim Refugee te “Bay of Bengal” aom tuikulhneu khatah tuahsawm uh cih BBC pan kiza hi. Hih apuaksawmna tuikulhpen lauhuai mahmah kici hi. Bangladesh kumpi thunei te genna ah Thengar Char kici tuikulh ah Rohingya Refugee te kituahsakding a, tuapan in Kawlgam ah kipuak kikding ci’n genkhia hi.

Rights Groups tuamtuam te’n tuabang in Rohingya te zawhthawhthu tawh aomna uh aki tuahkhiatsaksawm pen kumpi thunei vaihawmte mawhsak mahmah uhhi. Thengar Char kici tuikulhno pen tuihual Tide akhanlam ciangin tui in atumcipzel hi a, tuidalna Flood Defences cihte kibawllo ahih manin, lauhuai mahmah kici hi.

Tuaban ah hih Thengar Char tuikulh pen “River Meghna” kici guntui panin anawlkhinkhiat ninpa tetawh abeisa kum 10 hunpawl in hongpiangpan tuikulhno khat ahihi. Tulaitak in Rohingya Refugee te akikepna pen Hatiya island kici tuikulh ah hi a, tualaipan inzong Tai 18 bang kigamla cihi. Mawtaw tawhzong nai 9 sungbang zinkulding cihi.

AFP News Agency te ii genkhiatna ah Thengar Char kici tuikulhpen khualkhallam tuitawm hunciangbek in kipaithei a, migilo Pirates te atam mahmahna munzong cisawnsawn hi.

Hih Rohingya tepen Bangladesh kumpi inlah Kawlgam mite hi ci uh a, Kawlkumpi inlah Bangladesh te hi cikik zel in, adeih kuamah omlo cihding himawk hi. Mihing hihna “Humanitarian” tawh ngaihsunleng ahehpihhuai mahmah te ahi uhhi.

Tuaban ah hihbang in aomna uh Refugee Camp te kituahsakding cihzong ahehpihhuai mahmah uh ahihi. Banghanghiam cihleh nidang hunkhatlai inzong Malaysia gamsung ah Zomi te Refugee Camp ci’n gamsung gampa lakah ki guk om in ki genthei mahmah ngei hi. Tualai hunin Zomi te’n ihthuakzia tetawh ih ngaihsutsak ciangin amauzong ahehpihhuai mahmah ahi uhhi.

Nidanglai hunte tawh tehkak in tulaitak Malaysia gam ii akhuapi ahi Kuala Lumpur khuapisung ah nuamtak in ih tualbialtheih pen hongbawl Pasian tungah lungdam kohkohding hilohiam cih ihki phawksak zelzel hi.

More: Trump bek hilo in US ah gambel te aki lutsakloh a 7 veina hita

Banghanghiam cihleh khatveivei Zomi te’n Kuala Lumpur khuasung nuam kisalualiang in, hongbawlpa zong kiphawk nawnlo in, Kuala Lumpur khuapisung Kotaraya kuamsungteng ah a awmtaltal liangzong ki omthei hi. Nikhatni ciangin atung a Rohingya te bangin Malaysia kumpi in hong hawlkhiatgawpma in kigingkhol in gamta ni. ZD Sawltak #zomidaily