No compromise!! ~ Francis Lamthang

No compromise!!

Mikangte’ kammal zat theih zel khat pen ” No compromise” ahihi. Hih kammal pen ei Zokam in khia ning ka cih hangin mikangpau asiam eimi sungah tam lua ta ahihman in khial kha leng hong nungzuih pah nuam tam kha leh cih ka launa in hong meidawi sak a, tuni ciang dong agen kheh ngam lo ka hihi. Ahizongin kei upmawhna ah hibang hileh kilawm ka sa hi:

1) Pu Zoland Thang in Zominam groupmail sungah thuthak hong khah khia hi. Tua thuthak pen ei mualtungmi teng kikaikhawm a thu a kikupna vuah Chin National Conference min tawh mualtungmi khempeuh pumkhat suak a, khauhual khat banga pan khop ding vai geel uh hi. ZCDte thukim lo masa pen pah lian uh hihtuak hi. Zomi min tawh ding khin ngengu napi Chin sungah va lut kik kuaukuau ding pen hithei lo takpi hi. ZCDte lungsim pen “Pasal tingteng, thu khensatsa khat tawh kalsuan khin ih hihmanin hamphatna tampi taanlawhna ding hiphial mah taleh Pasian hong piak ih minam min ZOMI mah atawp dongin dihpih ni” aci ngam hi ek mawk uh hi. Hih thu pen kei mimal ngaihsutna ah “No compromise” ii khiatna hi dingin ka ummawh hi. Tua mah bangin ZBC zong CBC tawh laih ding cih thu hong om ciangin minam it ZBC sunga ei Zomi teng mah na diang khia in na pusuak khia pah lian uh hi. ” No Compromise”…

2) Khatvei ka hawhna khatah innteekte tawh Pasian thu pian dektak khat ka kikum kha dihdih uh hi. Innteknu in ” Lawm aw mikhat in numbat “3” pen khuplup sak lehang “M” tawh kibang a, thallup sak lehang “W” tawh kibang hi hong ci hi. Mite hong genna ah Upna icih pen atuamtuam hiphial mah taleh ih biak Pasian pen khat hilel hi. Ken hih thu pen sang thei mahmah ingh” hong ci laizang hi. Number “3” pen a bawlpa in khuplupsak, thallupsak mawkmawk dinga a bawl hi lo hi. Tangtak a ding ngiat dinga abawl a hihi. “3” pen “3” ding mah hi a, “W” leh “M” cihte tawh aki bat leltak hangin “3” mah hi veve hi. Nang upmawh, nang hoih sak leh nang santheihte a thupi hi lo zaw a, ahi te ahi bang lian a nasan theih ding kisam masa pen hi ka cinuam dektak hi. Hih zong mikangte’n ” No compromise” ana cih uh hiin ka um hi.

3) Mikangte’n ” No Compromise ” acih khit nak uleh leitung a thugen siam pen na hi phial zongin a lungsim uh na khel zo nawn kei ding hi. Lawmte khat in ” Ka zi bel alu apei khit nak leh computer inzong tatnai nawn lo hi” acih bang dan a hihi. Azi in lu apei khit nak leh nungsoh lo, a lungsim khel themthum lo, kileh kik nawn kilkel lo cihna himawk hi. Hizong “No compromise” nam khat mah a hihi.

Ahi lopi khat ahi bangkek khat a sang thei cihte, number “3” hi gegu khin napi thallupsak, khuplupsak teitei cihte, ZOMI hi napi hamphatna khat peuh lunggulh man a CHIN kici thei ziauziau cihte pawl in cikmah hunin ” No compromise” cih kammal zang ngam ngei lo ding uh hi. Huihnunna lamlam ah a awn duaiduai pahpah MAU tawh kibang ngel dingin ummawh pong ingh. Zomite pen mi citak nam ih hihman in ahilo te ah “No compromise“ aci giapgiap ngam dingte hi hang. Ngaltang hapak sa tumkik ngei nawn lo hi, ” No Compromise “.

Francis Lamthang
….Zomi Quavadis…