Bangkuanuam Suahna ~ Pau Kap Thang

Bangkuanuam Suahna ~ Pau Kap Thang

1. Teek ahi Nu leh Pa bangzah thupi: Pianna Nu leh Pa bangzahin thupi hiam, cih nangaihsun ngei hiam…? Minam khempeuh in Nu leh Pa thupi seh hi. Milim-bia Budhist ten nithipi omsimin, khanghaamte leh a Nu a Pate paai (zahtak) pia uh hi. Israel minam, Arab minam, India minam zawdeuh ten zahtakna nakzat diak uh hi. Nu leh Pa zahtak piakna thu-ah Christiante sangin nakpi-in etteh huai zaw hi.

Budhistte leh Muslim thu-umte in zingtungin biakna-tau nuai-ah ki-aapna bawl masa hi. Nu leh Pa zahtakna pia masa lo-in kuankhia lo uh hi. Nasepna leh khualgam pan hong tun ciangin, Nu leh Pa zahtakna pia or ho masa lo-in innsungah gamtang lo hi. Dingtangsa-in nawk ngeilo hi. Nu leh Pa sawk masak lohin ankuang sawk lo hi.

Gen.Ne Win akhanlai-in kikihta lua hi. Mikhat tungah lungkimlo aa a paukhak leh tuapa laulua-in kisihbawl vot hi. Amaa ankuangluite pen Colonel sangin neuzawte hilo hi. Zingsang khat anne-in a omlaitakin ” Mon ywa vue-oo-chaung lim mate,” acihkhak pak pen nai-2 sungin a kiang kitun pah hi, ci uh hi. Tua zahta aa mite zahtak kumpi khat in, a Pa zahtak mahmah, ci uh hi. Gen.Ne Win tenis saat aa omlaitak , Colonel khat in, ” Bochoke, napan hong sam,” acihleh tennis saatna ciang paai-in khuliangin taipah hi. Generalpa pen a deih tamlo hi. Gambup mipite samsiatna thuak makai khat ahi hi. Ahih hangin khansau hi. Cidam hi. Kuaman suamlum zolo hi.

Ei Zomite in Nu leh Pa tungah zahtak piakna bangzah i thupiseh hiam? Zahtak cih pen itna ahi hi. A itlote in zahtak pia ngeilo hi. Simmawhin zothawh uh hi. Nidangin Mote in Teek hon kici aa, tun ahihleh Teekte in Mo hon kici hi. Teekte Mo honna bangkua pen bangkua-nuam hilo hi. Khuahun sia cihna hi. Leitung kilumlet cihna hi.

Teek pawlkhat pen hehpihhuai mahmah hi. Khanglaite gualnopna sung zong pawm ngamlo hi. Ging takin nuihpih ngamlo hi. An kamlim takin hai ngamlo a, tang takin zong pai ngamlo hi. Sawipai denden uh hi. Pastor kum-25 kasepsungin tua bang teek leh khangte omdan katuak kha zel hi. Thal bang aa suan tate pen galsehuai pen suak khong hi. A neulai-in pak bangin kitawi a, zi leh ta hong neih uh ciangin thanglingkung suak khong hi.

Christiante upnathu tawh nungta hileh milimbiate sangin tampitak etlawmin nuntak-kha kaai zaw ding uh hi. Tuhun ei Christiante in thuhoih tampi i gen aa, gamtat tawh ih zom kei hi. Singlamteh munkhempeuhah i phut aa, singlamteh hoihna pen nuntakna tawh kilaklo hi.

Nu leh Pa zahtak piakna lian pen:

Nu leh Pa zahtak piakdan tampi om hi. Zahtak piakna khempeuh Pasian mai-ah pahtakhuai siksek hi. A thupi pen Khoiding leh Vakding ahi hi. Nu leh Pa sungaa piang tate khempeuh tua naseptawh peng omlo hi. Nu leh Pa vak ngaploh manin taisanin inntuan tampi om hi. Koikoi om taleh tua van tawh kipeng tate khatbeek omlo hi.

Pawlkhat ten hawlkhia uh hi. Amau nupa pen a Nu leh a Pa lamsa innsungah om keihkaih zawsop hi. Nu leh Pa tawh na om ciangin thupha tawh om, nahi hi. Na kikhen ciangin thupha tawh kikhen nahi hi.

Pasian kamciam pen leitung minam khempeuh tungah kipia hi. A kaang a vom kuamah deidan omlo hi. Bangbang bia taseleh a khoi a vaakte khempeuh in THUCIAMNA TAWH KIPAWL PASIAN THUPHA sang ding hi. Nu leh Pa zahtak piakna thu ah Christiante sangin milim biate khauhpai zaw ahihman, Pasian thupha a kilawm a kituakzah sang uh hi.

Nu leh Pa pen Pasian zomah muhtheih pasianno khat ahi hi. Pa pen innkuan sungah Siampipa leh kumpipa hi. Nu pen kumpinu leh Hehnemnu ahi hi. Tanu tapate leh Mote in teekte pen Nu leh Pa bang bekin ngaihsun lo-in, Tonu leh Topa bangin zahtak ding hi.

Innkuan pabel in Nu leh Pa a zahtakna pen, a zi leh a tate tungah kampau awging ahi a, gamtatna tawh ahizongin , lak tawntung ding hi. A tate tungah a Pii leh a Puu hoihna sutpih tawntung ding hi. A sih khit ciangin sialpi sialtal go a, mualsuang phut a, ih pahtawi sangin a nuntak sung tuivot haikhat ih piak pen manpha zaw hi.

Zahtak piakdan theihhuai pawlkhat:

• Nu leh Pa pen Pasian zomah pasianno khat ahih phawk in.
• Na Pa pen siampipa leh kumpipa ahih phawk in.
• Na NU pen kumpinu leh Hehnemnu ahih phawk in.
• Nagei-ah hong pai ciangin dinginla natutna awn in. Amau tutna suankhia ngei kei in.
• Na Pa in thu hong gen ciangin mannailo-in dawng kei in. Agennop thu pen bang cih natheihloh ding lauhuai hi. Bang hang hiam cihleh khanghamte in Khatawh kopin thugen thei hi.
• Ankuang na uumkhop uh ciangin amau sawk masa lo-in sawk pualpual kei in. Teek zahtakte in amau omloh-hun nangawnin suakkhia masa lo-in nelo uh hi.
• Khangthak-hun hi cin teek ompipi-in salung sakal aakgilzial cihkhawng ne muaimuai se ken. Taangtawng aa kipan khanghamte zahtakna aa kizang PUPA NGEI-NA ahihman a mit dong ding uh hi.
• Na zi leh natate muhna-ah teekte thusimlohna langsak kei in. Pii leh Pu zahtak di ahih musak theisak in. A sisan sungah guan inla pantah in.
• Natate amau taphmin tawh ko kei in, zumlawh ding aa mudah kha ding hi.
• Mihonte mai-ah nateekte thanemna ciamnuih gualnopna-in zang kei in.
• Teekte suankhiain amaulamsa innsungah teng kei in. Nasuan nakhate in zong nang tungah hong bawlkik kha ding hi.

Pianna na NU na Pa lungdamleh a kamsung panin thupha tampi pusuak thei hi. Khasia leh zong samsiatna pusuak thei zel hi. Tua pen VANTUNG PAN AA KIPIA THUNEIHNA ahi hi.

Galkap khat in gamsungah satampi man hi. A Nu a Pa omlo ahihman salung sakal ne ngamlo hi. Hangkeu-in koih hi. Kumguk a cin ciangin ciah aa inn tunpih hi. A Pa in a ta itna leh zahtakna amuh ciangin, lungdam a, sialtal gol mahmah khattawh ai hi. Sakhi pum-30 sangin sialtal golzaw lai ding hi. Nu leh Pa hong itna tehpih ding omlo hi.

“Tate aw Pasian deihna tawh kituakin, Nu leh Pa thu namang un. Nu leh Pa thumanna in Pasian deihna ahi hi. “Zahtakna tawh na Nu na Pa khoi in. Nang in natenna gamsungah nuamsa-in nakhan sauna dingin, thuciam ahi khapna tawh kipawl thukhamte lakah thupi pen hi. Ephet 6:14

2. Innluahza leh Ngimna:

Inluah ngeina pen laisiangtho sungah ngeina-kipin kikoih hi. Pasian tua van a suatmite tungah innsung leh bangkuasung vaanding thamlo-in biakna tawh kisai siampi nasep zong pia pah hi. Pasian sehna bangin innluah vangik a puakleh, puakzawhna ding thupha zong pia hi. Tua vangik pua nuamlote pen Pasian langpangin sehpah mawk hi.

Zomite ngeina sungah a tamzaw in ta-upa inn kiluahsak hi. Naupen a luahsak zong om aa, muibunlo ahihmanin a khel tamzaw hi. Innluahte in go leh gamh tom ding bek hilo a, nuteek pateek khoi dingleh pianpih sanggamte kepding vangik lianpi kisuan hi.

Uu-zaw lungsim:

Uu-zawte inn kiluahsak banah tua innluah-van puazo uu-zawte pen zahtakna leh pahtawina kipia hi. Tua ahih ciangin uu-awte nakpi-in THUKHUAL kul hi. thukhual zolote in tua vangik pua zo lo pah mawk hi. Tua ahih ciangin lungsimhoih nei aa, thukhual theite pen UU-ZAW LUNGSIM kici hi. A Nu leh a Pa tungah kamngeih kamkhum zat kul hi. Sanggamte huaitheihna lungsimpha neih kul hi. Pianpih sanggam, a Nu a Pa leh a zi kikalah a tawntungin kilemna-mang sep kul hi. Thukhenmang bangin a omleh uuzaw seem zo lo hi. Kilemna-mang a sep ciang bekin uuzaw cingzo pan hi.

Zomite in Innluah ngeina hoih mahmah kinei hi. Amau khun ngeina bangin uuzawte leh nauzawte in, amau panmun ciatah kokim takin gamta le uh, bangkua nopci aa, innluahpa pen kumpino khat tawh kibang hi. Lungsim picing uuzaw bangkua sungah sanggam uu leh nau leengla kiphathuak den hi. Zu leh sa tawh kidiah aa inntual meikhu tawlnga lo hi. Jerusalem biakna-tau tawh kibang a, samui tawlnga lo hi. Uu-zaw lungsim nei kumpi pen kumpi hoih ahi hi. Bangkua hoih leh, khuasung hoih hi. Khuasung hoihleh gambupi hoih hi.

• (a) Damtui kulthuk limngan zuan aa singcipaal phialvan bawm e..
• (b) Lunmang hawmsiam zatan bawm aa, ciin hawmsiam tuai in bawm e.

Uu-zaw puak vante:

• A Nu leh a Pa vaak ding hi.
• Sanggam pasalte zii leisak ding hi.
• Sanggam pasalte inntuan ding hi.
• Sanggam numeite mokhak ding hi. Mo sa gawh dinghi.
• Kolbulh khauhen leh dongtanna munah dinpih ding hi.
• Sanggam amutha tawh ding zolote domin keem ding hi.
• Mo man ne ding hi.
• Innmong a omleh gam tom ding hi.

Sanggamte panmun:

• Bangkuasung anneek tuidawn tasamlo dingin panpih ding hi.
• Innma-loma tasam saklo ding uh hi.
• Sumnu sumpa a muh khempeuh uh a uu kiang tun ding hi.
• A uu inn tawh a kikhenkhiat matengin sila-hoihte bangin bangkuapi hung ding uhhi.

Uu-zawpa kidop ding thu pawlkhat:

• Nazi muhin innkuanpihte thuhilh ken. Na itna nazi musak tawntung in.
• Nazi hong muapsim thu tawh na innkuanpihte nawt pahpah ken.
• Nasanggamte tawh na omkhopzah sangaa tamzaw nasungte kiangah tualbial kei in.
• Na Nu na Pa leh nasanggamte lungkimna ding nadeihmanin, amau mai-ah nazi thuhilh ken. Hong zothawh sak kha ding hi.
• Na Nu na Pa leh nasanggamte huzaaptawh nazi ciahin sawl ngei kei in.
• Innkuanpihte leh nazi kikalah thukhenmang seem kenla kilemnamang seem zaw in.
• Naupangte atapmintawh ko kei in. Teek simmawhna leh Nu leh Pa zahtaklohna ahihman hoihlo hi. Na tate in a Pii leh aPuu thusimlohna in nei ding hi.
• Nu leh Pa zawngkhalna leh thanemna hangin neu et kei in. Amau laihding omlo ding hi.
• Khangham zahtakna zangkhai ngaihsut kei in. Tua bangin natate namai-ah gamta leh nalungsim na ding hi. Na tate hong bawldan ding na uut bangin, Nu leh Pa tungah bawl masa in.
• Na zi leh na tate muhna-ah Nu leh Pa tutna suankhia kei in. Tutphah tungah natut laitakin na Nu ahihkeh na Pa tutna neilo-in a omleh awn in. Pasian leh vantung mite lungdam ding uh hi.
• Bangkuasung tawh kisai vaithupite-ah Nu leh Pa leh nasanggammuante theihlohin nazi bektawh thusim tuamneih kei in.

Hihthute kidawmzo leeng uu-zaw van puazolo cih omlo ding hi. Thusia bei ngeilo ahihtei hangin, innkuan kibalkek ciangdong tunglo ding hi. Tua vangik pua nuamlote in luahdingte zong lunggulh kei hen. Uuzaw lungsim nei aa thukhualte bangkua nopci aa,mikhempeuh in zahtak hi. Vantunggam maleep ahi hi.

3. Teekte in Teekhihna Zangkhial thei:

Bangkua kisiatna pen Mo bek khiatkhit ding hilo hi. Teekte kisapna zong tam hi. Teekte khang leh a tate khang pen nakpi-in kilamdang khin kha ding hi. A khangkhangin nuntakpaizia kikhel toto hi. Amauhun tawh kibanglo ahihman Teekte phun bek thamlo-in, kiim leh pamah Mo gensiat kipan kha ding hi. A tapa Zilel min hong puasak ding hi.

“Anneek ciangin numei in tutphah kailo ding, zasan kuan kailo ding, keuneu zanglo ding” cih ngeina pen kanun laplai hi. Tuhun khangnote in tutphah leh sabuai tawh sikkeuka zangin anne uh hi. Mehlim bawlsiam kipakta hi. Nidanglaithu tuk thapai mawk leng Mo hoihna omngei khong ding hiam? Innkuansung nuntak pen thongkia tawh kibang ding hi.

Khangluimi zawdeuhte in kitengcil khawng lupna tung kiho deihlo uh hi. Tuhun ciangin kitenkhit phetin Honeymoon ci-in hun-awng kha khat bang zang uh hi. Tua hunsung teng pen pasal leh numei ahihlam kitelna hun nuampen hi. Nupa kikholhna hun tam theithei kideih hi. Zi leh pasal kikalah a dong a khak om theilo ding hi. Biakinnsung, pawisung leh pulpit tung nangawnah nupakopin khut kilensa in naseem uh hi.

Tua ahih ciangin Teekte in leitung kiheizia zui-in Mote theihsiam ding kisam hi.

Sanggamte helhawtna pan:

Sanggam haute leh nukul omnate-ah Mo pen guallel thei hi. Teekte’n Mo pen midangmuh zaw ahihman a tate tawh kopin langbawl thei hi. Tuamun pen Teekte khualhna-mun ahi hi.

Ih Mote in ama Nu ama Pa nusia-in ei hong beel kimlai valangbawl leng, aman kua beel nawn mawk ding hiam? Teek leh a sanggam teng in a uupa zilel tangsak mawkleh amah kua tawh kop ding hiam? Amau kingaihna a khonakleh thukim aa taikhiat ding longal lampidang omlo hi.

Ei bangkua sung aa hong lut midang khat in, ” kanu kapa kiangtawh kilamdang kei ” acih theihna dingin, pattah kisam hi. Kapa pen a khangual lakah migi-in kigen ngeilo hi. Ahih hangin a Mote khatbeek tawh buai ngeilo hi. Mo gensiatna kammal khat zong tehkhia ngeilo hi. Tua thute kangaihsut ciangin kapa pen mipil mahmah ahih kaphawk hi.

Katen zawh uh sawtlo-in kalawmnu in nau hong haih hi. An kici nezolo hi. Kapa’n ” na uu neek ding zonsak sin vua” ci zelzel hi. Kapa lung hihmawh pen kalawmnu lungdamin tunidong genlai hi. Teekte in Mo itna lahhun zong lahzel kul hi. A Mo ii nualam pen amakpa sangin a Teekte in itpihleh nopci zaw hi.

Ei bangkua sung hong lut Mote pen nuntak hunsung kithuahpih ding i Tanu ahi hi. Teekte sung aa piang numeite pen midangte aading hizaw hi. Numei khua leh sakhi khua kici hi. Tanumeite leh Teekte kop aa Mo a zawhthawh pen khialna lian mahmah ahi hi. Singkung hoih khat tuisa buahtawh kibang hi.

Sanggam haute pen innteng- hau sila- hau tawh kibang aa, uupipa pen hausapi tawh kibang hi. Bangkua khindai lo a, tanu tapa tawh gamlum tawntung ding hi. Bangkua buai a tamzaw pen sanggamte suktuahsa vive ahi hi. Numei pilte ina nualam sai se lo hi. Dai khilkhial aa omna in KHAM tawh kibang hi.

4. Nupa ihihman paudan tatdan:

Nupa kici Pasal leh Zi in Jesu leh Pasian Pawlpi limciing hi. Tua ahih ciangin Pasal in gumpa leh honpa bangin a Zi khoi ding aa puahto-in keem ding hi. A Zi in zong poina leh hemna neilo biakpiakna bangin a pumpi aap ding hi. Lungkimni leh lungkimlohni kilamdang sak lo ding hi. Hong henkhawm ki-itna khau hoihpen in PASAL LEH NUMEI HIHNA ZATSIAMNA hi. Tua pen amaa munah nazat siamleh kilungsimneihna tampi sumaimang zel ding hi. Numei pawlkhatte in tua tawh a pasal deek thei mawk uh hi. Khialhna lian mahmah palsat ahi hi.

Jesu in itna leh thumanna tawh Pawlpi a kep bangin, Pasal in a Zi keemin zuun ding hi. A lumleh lumkhawm ding aa avotleh votkhawm ding hi. Zawlhel hunlai kihona kamkhum nonote khiam tuanlo ding hi. Pasal in Zi thuhilhna dingin thatang leh khuttum zang kei hen. Pasian piak letsong ahihlam phawk den hen. Pasian mai-ah lungdam ko -in pahtawi zaw hen. Khutlum ngak sangin Khasiangtho kingaleh buaina thengbaih zaw hi.

Numei gilote in a pasal tusaisai hi. Tua bang numeite in velh thuakbai diak hi. Na pasal maisuah tel masa in. Aheh laitakin thu tampi dong lua ken, zong galet guaiguai se ken. Hehkawmsa-in hong phinnate kamsia tawh thuk kei in. Na gennop a omleh a hehkap ciangin damtakin pulak in. Na pasal sangaa kiciatzaw nasakte khat peuhtawh tehkakin ko kei in. Zawlluite siamna hoihna hauhna kisaktheihpihin sutsut se kei in. Mei-am nagim buah bang ding hi. Ki-itna tha hong pialo taangthu-lui khempeuh suahkhia nawn kei in.

Bangkua sung pawlpisung omkhopna khat pepeuhah na Pasal in thugenna aneihleh ama gennop khin nailo-in huh ahihkeh khaktan se ken. Na pasal phatphat se kei in. Zong gensia tuan ken. Midangte muhna-ah zawng mahmahin hehpihhuai phial taleng , nupa kilungtuakin ki-it peuh leng, ei aa-in leitung a nuam hilel hi. Khat leh khat ki-itna kilah ding hanciam kul hi.

Kaneulai-in aksa hulhuan kabawl uh hi. Ankuang kiimah katutkim khit uh ciangin, kapa’n a lu, a leiphiat(akkhe) a awmguh, a ciltang leh a tuibom teng khawng hong hawmsak hi. Tua zawh ciangin ka Nu leh ka Pa in asin leh agilzial hawm uh hi. Ka Nu in ka Pa kiangah, “kei hong pia se ken, nangman ne lel in,” cin paihkik hi. “Kua sungah khipi tangin gahtuan ding hiam, akibangin ne ni,” ci’n ka Pa’n paikik leuleu hi. Tua bangaa ki-it selua a kikhiatkhiat pen, kasanggam pa’n aduhlo sa-in, “no duhlo nahih uleh ken duh ing e,” ci’n hong la ngiau khong hi. Tua ciangin ka Nu leh ka Pa hong ki-enin an nemawh liangin kanui uh hi. Innkuan ankuang umkhop tua ni mah nuam kasapen hi. Innkuannuam icih pen zawnna leh hauhna hang hilo hi. KI-ITNA hang hizaw hi.

A galva pan aa Kham bang aa i muh pen a kiangah ih om ciangin dalpeek bang bek hithei hi. Bangmahlo aa i muh pawlkhat pen kician mahmah thei zel hi. Daalpeek zong zattheih vanmanpha namkimin kiseek thei hi. A neipa khuttawh kisai zaw hi. Thupha sang bangkua icih pen mipil mithahaat hikhin lo hi. Pasian ompih bangkua pen Ngun leh Kham sangin kicingzaw hi. Topa Jesu in, ” note sungah vantunggam om ” acihpen Pasian Khasiangtho tenna bangkua ahi hi.

5. Monu Nuntakna Masuan thak:

Kitenna pen Zomite in Mopawi ci hi. Cope Topa in Zipi-pawi ci’n hong teisak hi. Mopawi pen leitung minam khempeuh aadingin pawi nuampen hiding hi. Nuntakna nih pumkhat suahsakna pawi ahi hi. Bangkuathak sung lutna leh bangkua -nu bangkua-pa suahna ahi hi. Amau aadingin leitungthak kipan hi. Muhnathak theihnathak tawh kalsuan kul hi.

Topa Jesu in Mopawi pen Christ leh Pawlpi kizopna tawh na genteh hi. Topa Jesu in Pa nusia aa, Pawlpi aadingin a nuntakna hongpia hi. Laisiangtho sungah ” pasal in a Nu leh a Pa nusia-in,” acih tawntung pen kitenna in Jesu leh Pawlpi kizopdan limciinglua ahihman hi. Ei ngeina tawh kilehbulh ahih ciangin telhak kisa hi. Israel te zong Zipiinamte mah hi. Pasal pen in Jesu Honpa limciing aa, numei in Pawlpi limciing hi.

Eden huanah Adam leh Ave kitenna pen abul-abaalin hong kigenloh hangin, Pasian in Jesu tungtawn aa hong tatkhiatna leh hong tenpihna limciing khol ahi hi.

Tua ahih ciangin hih Mopawi pen zangkhai zat ngam ding hilo hi. Satonna omlo, paubanna omlo limci takleh siangtho takin bawl ding hi. Kiphatsakna hauh leh let tungnun kidemna leh gualnopna bang lel aa bawl ding hilo hi. Muhtheihloh vantungmite in zong hong zoo ding uh hi. Nungak siangtho leh tangval siangtho kiteng hih ding thupi hi.

Mipipa leh Mote bangkua nopsakna pen a kitenni-in kipanpah hi. Gentheihna kamsiatnate zong tua ni mahin kipan hi. Setkan, minute, a nai, a ni-in huntawh kisotto pah ditdit hi. Tua hunpaipaite in amau nupa pen tuihual bangin paipih hi.
Gunkuanghawhna haat keileh tuihual inkhuplet ding hi. Tua gunkuanghawhna pen Jesu khutah aapzo leh bangkua pen lungmuan ombek ding hi. Topa Jesu hong paikikna leh misiangthote kaikhopna pen mopipawi tawh genteh hi. Ei pen Mo hihdingleh sepding aa kilawm nasep khempeuh seemin nasia tak aa pan kul hi.

Mo ihihman paihkhiat dingleh kipuahphatna:

Ei Zomite ngeina sungah numei in behkip neilo hi.A lutna bangkua ii behmin bangbang ama beh ama nam hipah lel hi. Tua ahih ciangin ” Numei khua leh sakhi khua ” kici hi. Piangthak mikhat in paihkhiat ding ngeinalui aneihmah bangin , bangkuathak sungah kipumpiak kul hi.

Tua ahih ciangin pasal behmin pua-in, ” i beh, ei beh” cih kul hi. A pasal Nu leh Pa pen, Nu, Pa mah cih kulpah hi. Alutna bangkua ngeina khempeuh kisinin theihkimloh phamawh hi. Tua bangkua san thupha leh nopsakna khempeuh zong neihpih pah lel hi. A Nu leh a Pa in, manh la ahizongin, Jesu mintawh thukimin piakhia ahizongin ngeina tawh kipawl thukimna hang ahizongin pasal aadingin innkuan panin lakhia khinzo hi. Tua ahih ciangin a nualam sai theilo ding hi. A nualam hauhna leh nopsakna masuanin kisaktheih pihlo ding hi. Amanawhlam leh a nualam tawikhai-in pau theilo ding hi. Amanawhte bangkua nopci aa a picinna dingin a nuntakna kibuppiak ding hi.

Teek leh ama kikalah ahal-adal om theilo ding hi. Palaai dingin a pasal zanglo ding hi. A Teekte leh a sanggamte thuhilh dingin a pasal tawsawn lo ding hi. Huh dingleh panpih dingin kiging tawntung ding hi. Amau nupa leh Teekte leh sanggamte kikaalah ” no leh ko” cih kammal gingsak ngeilo ding hi. A pasal kiangah na Nu, na Pa, na sanggamte cih kammal ahi, a kikaalah kidalna kawm khung lo ding hi. Ama lutna bangkua thanemna leh zawngkhalnate a nualam tunlo ding aa, a pualamah thehkhia lo ding hi. Innkuan sungah amah pen meivak bangin tangkiukiau tawntung ding hi. Innkuanpihte suihkhak puktheihna ahi khuamial bangin omlo ding hi.

Tuhun pen lokhawh bektawh nuntak hunlai bang hilo hi. Nupate in anihtuakin sum zong theih ahihmanin, numeite’n zong a Nu a Pa huhnuam uh hi. Nupa thukimna a omleh poilo napi-in, thukimna a omkeileh, ei Zongeina tawh kipii kileite aadingin, piang taktak lo zel hi. Nu leh Pa vakding pen Zongeina in amaumun ciatah nakoih dimdiam ahihmanin Zongeina taisanvet ihihkeileh numei in amathu tawh hihluat zong hoihlo genthamlo-in amau innkuan ki-itna leh lungnopna pen Pasian sehna bangin ngahzolo ding uh hi.

Zongeina sungah ih Pu ih Pate in, sunghlam leh numeilam zong nakoihkhong tuanlo hi. Nopna dahna hunin tanu mokhakte thatang , zubeel, ankuang , nakpi-in kizang hi. Pute tukzukholh cin taangzu khumpen kikhol hi. Lokhote kipahtawina hi tungkan omlo hi. Ei sumzongte in Birth-day present, mothers-day, fathers-day cih khawngtawh numei Nu leh Pa kihuh thei hi. Nu leh Pa vaknuam aa numei hong kitom takciangin Zongeina paiziatawh kilehbulh lua ahih ciangin thunamtui hilo hi.

Ngeina sukha selo aa septheihna lampi zong leng hoih zaw hi. Na pasal dem kei in. Kipumkhatna ding hanciam in. Nupa kilungtuak in khuata zo kici hi.

6. Innkuansung tate pattahna:

Khangnote pen hongpai ding hunah minam makaidingte vive hi. Amaute thuhilhna leh pattahna hoihpenmun in, laisinna saang, biakinn leh innkuansung ahi hi. tua sang-3 te lakah innkuan kipattahna muibun pen hi. Leitungah langlutsia thupipen Nu leh Pate ahi uh hi. Amau sungaa piang tanu-tapate pen pattah dingaa Pasian-piak ahi hi. Laisiangtho sungah, “tate thuhilhna ciang, koihkhong kei in” cingiat hi.Tua pen, saatsaat ding, cihna hilo hi. Thuhilh tawlngalo ding cihna hizaw hi

Bang hunin hilh kipan ding:

Naupangte pattah hun ding pen Kamsangte tung tawnin Pasian in hong hilhna-ah , a Nu sungpan kipan ding, ci ngiau khong hi. Naupaai aa kipan a Nu in khamtheih leenggah zuu tang ding hi. Khamtheih cih ciangin tua hunin zuu longal a dang tamlo hi. Tuhunin beng, kanzaa, zanah, tuibuuk aa kipan pumpi susia thei tam mah mah hi. Paul in, “an khamluatna zong mawhna hi” ci hi. Nu leh Pate kizenlohna leh pattah siamlohna hangin naupang thaulua gamtang theilo,mihing dangte lakah ta zolo, neulim aa zunkhum natna, sikhang natna, vei tammahmah hi. Tua pen ankham luatna hang ahi hi.

Lamdulh aa si cihte pen cinasa aa suak hipah hi. A Nu kamsungaa tum khempeuh tawh a thazang, simal samal, khua, sin leh lungtang kilam ahihman, hemna poina khempeuh pen a Nu kamsung a lut ante hang ahi hi. Nupa sisan kituaklote zong tate deih banglo thei hi. Tua ahih ciangin tate pattahna pen Nu gilsungpan kipan ding hi.

Naungeek hi cin daingaihsut kei in:

Naungeek a suah aa kipan pumpi kimtawh pusuak ahi hi. Za thei, duh thei, phawk thei, ngen thei dingin thazang kim nei hi. Suakkhin phetin nawi kitah aa, dawn ding lamtak thei-in dawnpah khiitkhiit hi. Deih a neih ciangin a khut a khe kisatin kahna tawh hong ngen hi. A ngah mateng tawplo hi. A zunkawt nuamsa lo-in kapsa mah-in hong ko hi. Adeih a ngah ciangin ihmu bangin naak liplipin dai pah hi. Napau khempeuh za hi. Kamkhau leh kamzol khentel thei hi. Tua ahih ciangin a ngeektung aa kipan kamkhum takin pattah ding kisam hi. Hamsia, pausia, phuisam tomlawhna kammalte a bilah lut ngei keileh hoih ding hi. A zakthu khempeuh awlakna in naman pah aa, mangngilh ngeilo hi.

Naupangte ki-etna ding limlang hoihpen, a Nu a Pa ngeina leh gamtat luheek ahi hi. Amuh a zaak khempeuh ngeina-in hong khanpih ding uh hi. Pauthei keitah cin ageinai leh amuhna-ah a khelkhelin nupa kinohna bawl ding hilo hi. Taanglai Ih Pu ih Pate thucinte pen Pasianthu tawh kikalvalh lua omlo hi. Pasian bang hiam cih a theihlohman bek ahi hi. Lawkite zong dawibiakna simloh amau thuhilhnate khansuah pihleh mihoih suahna cing mahmah hi. Gamtathoih khempeuh kibang kim lel hi.

Khangmasate pen na khempeuhah kidopsiam mahmah uh hi. Inndei kineizo tuanlo ahihman, nupa kinohna ding tawm mahmah hi. Naupangte ihmutkhit kingaak hi. Meivak omlo khuamialpi sung nangawnah kidawmlua kisa-in puan kikhuhsa-in kinolai zen uh hi. Bang hang hiam cihleh tua bang thute hangin a Nu a Pa enthwl thei uh hi. Nu leh Pa zahtakna thakiamsak hi.

Palam leh Nulam cih omlo:

Ei Zomite in pianna gui zui-in tanu-tapa min kivawh hi. Khangsimna-in kinei hi. Tapa uu-pen pasallam a Pu kitamh sak hi. Numei uu-pen pasallam aPii kitam sak hi. Tapa nihna pen numeilam a Pu kipia aa numei ahihleh a Pi kipia hi. Tanu-tapa haute in pianpih sanggam a tungpan pansukin pasallam leh numeilam hawmsak hi.

Pawlkhatte in amaulam ciat paksak a, zong pumgupin khennih kisuah thei hi. Pasallam leh numeilam minvawh pen khangsimna leh aitamna hizaw aa kideidanna hilo hi.

Europe mite pen minpi tawh kiho uh hi. Ei Zomite in minpi tawh kiho pen simmawhna leh neubawlna in kiseh hi. Tua ahih ciangin minno khatciat kinei sak hi. Tua minno tawh a kihopih keileh bang thu hiam, cin kipatau pah hi. Tate zakin nupa kihona pen minpi tawh ki-otsan lala ding hilo hi.

Kei pen ka Nu leh ka Pa in ” Thangneu” hong ci hi. Kasanggamte in katapmin tawh, “Song Cin Thang” hong ci se uh hi. Kum-4 kaphak laitakin kalawmpa khat in, ” Lawm namin bang” cin hong dong hi. Ken ” Song Cin Thang” kacikikleh, kanu’n ” bang e, cikik sin ” hong cih ciangin a khial hining cin, ” Thangneu” kaci leuleu hi. Hong kigen keileh Song Cin Thang aa kingaihsun kahimai hi. Eimin tang tap-pi tap-pute zong zahtak ding kilawm hi. Ei luang hong phaamding zah aa kinaite bek min kitangsak ahi hi. Innkuan sungah nulam, palam guptuam paituam omsak lo ding hi.

Nu leh Pate in khatleh khat ki-itna kizahtakna tate muhsak den ding kisam hi. A minno tawh limci takin kihopih ding hi. Sanggam itna vengleh pam tungah thumanna , khua leh tui khualna pen neutungin pantah ding uh hi. Neutung aa hong kihilhthu kimangngilh ngeilo hi. Ka Pa hong thuhilh pawlkhat, ” Vengte maiguidawng in gawlkanin lampi-ah hong zamleh siik ken, amau huangsung lamah heikik sak in. Amau huangsunglamah tem, tu, van khat peupeuh namuhleh tawm ken, zongkikin mu lel ding hi.’ Gan in huan-an a neekleh hawlsak in.” cin hong hilh hi. Tua pen tudongin kangeina suak lel hi. Gam leh minam tungaa cihtakna pen innkuansung pan kipan hi.

Hun-maanna leh Hun-zatsiamna:

Pasian in mi khempeuh tungah nai-24 hong piakim hi. Tua hun a zeeksiamte pen mipil, mithupi, mihau leh minuamsa suak kim hi. Zawnna leh ngauna icih pen hong kipia hun neihsun zatsiamlohna hang ahi hi. Khangluite in nai neilo hi. Aakkhuan zui-in naseem uh hi. Zingsol nitaksol enin hun ciamteh uh hi. Ei khangah naitawh na ih seem hi.

Naungeekte in hunmaan bangci theih ding uh hiam.. Hun zeeksiamna bangci hilh ding ihi hiam? Ngaihsutin kineilo ahihman bek hi. Naungeekte pen pattahna a ol pen ahi hi. Zingnawi piakhun, sunnawi piakhun, nitak nawipiakhun mantakin pia hileng, tua hun a tun ciangin anduhin hong kappah ding hi. Ihmut hun zong tuamah bang ahi hi. Zingsang thawhhun zong mantakin phong lecin, agol dongin zongsang pah ding hi.

Sangkah theihhun hong tun ciangin thawhhun, anneek hun, sangpai hun kisek sak in. Sangkhak ciangin nasepna munah kikholhpih in. Kimawl hun leh nitak ihmut hun guangin zingsang thobaih sak in. Kaneu lai-in ka nu’n, ” Tho un, tho un, the in hong khuannelh leh na ma u suangzo ding hi uteh” hong ci thei hi. Naupangte pen kum-10 a phakma-in muamzo leng, hoih hi. Kum-10 ma hunsungin nazawhleh savun nuaisa tawh kibang aa,a let ciangin nasiatakin haksa lo hi.

Mikangte Kawlgam hong zinngei khat pan, ” Kawlgamah naseem omlo, niangtuisai- ah nai-3 bang tu uh, nasep neilo tutsa aa kiho tamzaw, bangci nuntak ahi tam>” cin lamdang sa mahmah hi. Hun a tamzaw a mawkna-in lalthang sak hi. A manphatna kitheilo hi. Kalawmpa Bryan in, ” Mr Thang, Day (time) is money” hongci tawntung hi. Tua ahih ciangin hong pianglai ding naupangte HUNMAANNA LEH HUNZATSIAMNA nasiatekin hilh leeng Zogam nosuah zo pan ding hi.

Pilnalam Pattahna:

Pilna in Ngun leh Kham sangin manpha zaw aa, tua ahih ciangin zong inla, mu inla,nakha mansuah ken. Ahihtheih laiteng tate deidan lo-in pilna sang kahsak ding thupi hi. Ei Zomi Nu leh Pate in numei pen kineuseh kha ahihmanin , tua in Zominam buppi khantohna hong zekai sak hi.

Nauluai a vei khut in leitung uk hi. Hih in numeite panmun thupi mahmah ahih hong theisak hi. Naupangte pen a Nu nawitui leh anglum tawh khangkhia ahih ciangin a Nu huzaap tam ngahzaw hi. Pilnanei Nu a neite in pilna tam ngah a, pilna neilo Nu tate in pilna tawm ngah pah hi. Minambup leh gambup khantoh ding ideihleh pasal sangin numeite pilna guathuai zaw hi. Bang hang hiam cihleh mailam minamleh gammakai ding naupangte pen Nu anglum leh ama huzaaptawh a khangkhia vive ngentang ahi hi.

Ei a khangto nailo gamte-ah naucing siate pen laitan tawm teng kizang hi. US Childcare naseem siate pen Phd Prophessor khawng vive kizang hi. Ei gamah pilna niamteng peuh kizang zaw hi. Tua bang naupang kepna sang zong kinei zolo hi. A Nu pattahsa bek hizaw hi. Naupangte in pilna leh huzaaphoih a ngahna dingin, numeite pilna guatding kisampi pen hi. Inn nupite in pilna hong nei le-u, living standard hong sang zawdeuh pah ding hi. Nuntak khuasakzia hong picing ding hi.

Sianthona leh cidamnalam hong khual thei ding hi. Kizem kizepna hong etlawm ding hi. Ih kuang ih keu hong siangtho ding hi. A lim a al hong bawlsiam ding hi. Kalkhat khit kalkhat Zomite khantohna hong kisottoto ding hi. A hang ngiatnguat Zomi pen Zogampalpi pak bangin hong pakpalh lihliah ding hi. Gam leh minam na puahnopleh , ta numeite pilna guan in. Thakhatin kikhangto ding hi. Pau Kap Thang