Bangkok aom Myanmar Embassy ah Fake Bomb kimu, Security kikhan

Bangkok aom Myanmar Embassy ah Bomb tawh akibang van kimu in Security kikhan

Thailand, Bangkok khuapisung aom Myanmar Embassy sungah Bomb tawh akibang ip 2 kimukhia ahih manin Police te’n Security khansak uhhi ci’n Embassy sungah nasem thunei U Moe Aung Khai in genkhia hi.

Zanni Monday (Dec 4) zingsanglam 10am hunpawl in akimukhia cihi. Package tungah nai Tape avom tawh kibelh in, Wire khaukhawng tawh kizomsak a, Time Bomb tawh akibangding in akibawltawm ip 2 kimukhia ahih manin, Thai Police te kizasak in hong hepkhiatsak uhhi ci’n U Moe Aung Khai in 7Day Daily te tungah genkhia hi.

Hih Bomb tawh akibang in akibawlpen Bomb taktak hilo a, ki lauthawng sakna ngiatin akibawl ahihi. Tua Bomb tawh akibang ipte akimuhna pen Embassy huangsung hi a, Passport akibawlna Section lamsang ahihi.

Lauthawng nading in akibawl, hongki nawngkaisak hi a, CCTV te hoihtak enkik in kikanding, Security zong ki khanbehding hi ci’n thunei te’n genkhia uhhi.

Hih buaina Incident hangin Passport bawlnavai leh Embassy vaipen nai 2 sungbang ki khakcipsak a, sun 12 ciangin Embassy naseppen ki zomkik theipan hi.

Hih Bomb tawh akibang vante akimuhkhiat laitak in Embassy sungah Myanmar Workers akigawm in mi 200 bangin Passport bawlin aomlaitak cihi.

Thai Police te akizaksak khitciangin Minute 15 sungin hongtungpah uh a, hoihtak in hong sitcian sakpah uh ci’n Embassy sungah nasemkhat ahi Ko Win Niang in genkhia hi.

Tua Package ip te hoihtak aki etcian ciangin Alarm nai khat, PVC Pipe leh Wire khau cihte kimu a, apuakkhamthei thauvui cihte bangmah kihello, Fake Bomb in akibawl cihi. Migilo te’n Myanmar Embassy sungah patauhna aomnading in ngimna ngiattawh hongkoihsak hiding hi ci’n Thai Police te’n genkhia uhhi.

More: Indonesia gamsung aom ‘Myanmar Embassy’ sungah meikuang kilot

Abeisa Myanmar, Rakhine State sungah buaina hangin gampualam aom Myanmar Embassy tepen ki nawngkaisakthei zelzel hi. Indonesia gamsung aom Myanmar Embassy mai ahzong lungphona kinei in, meikuang tawhzong Embassy sung kidensak ngei hi. Sawltak #zomidaily