Malaysia kumpi in agamsung ah Refugee Card atawi mimal bangzah phalai cih theiciannuam

Malaysia Home Ministry in agamsung ah UNHCR zumpi panin akipia UN Card tawi Refugee mimal bangzah taktak omhiam cih theihcian nadingin luvom simna “mimal simna” neiding uh cih theStar pan kiza hi.

UNHCR (United Nations High Commis­sioner for Refugees) te tungah Malaysia kumpi in UN Card tawi mi bangzah omhiam cih mimal phazah ngetna aneih uhpen UNHCR in pianuamlo uh cihi. Home Ministry tawh asepkhopding hongnial uhhi ci’n Deputy Home Minister Datuk Nur Jazlan Mohamed in lungkimlo in genkhia hi.

Datuk Nur Jazlan in Malaysia gam ii tuipinawl ah Refugee hongtung pen tawmmahmah napi in banghangin UNHCR Card tawipen gamsung ah tampi omhiam cihpen kitheinuam mahmah hi ci’n genkhia hi.

UNHCR Card tawi Refugee bekbek akigawm in Malaysia gamsung mi 150,000 omlai cih pawlkhatin Report a, pawlkhatin 160,000 omlai ci’n agenzah kibanglo uhhi. Tuasung ah atamzawtham pen Myanmar panin hongtai gambelmite kici hi.

Tua ahih manin UNHCR in hong panpihnop keiphial zongin Malaysia Home Ministry panin in UN Card tawi mi bangzahpha cih ki kankhia theihi. UNHCR Card atawite pen Refugee taktakmah ahi uhhiam, illegal immigrant ahi uhhiam cihpen ki theician nuam hi ci’n Datuk Nur Jazlan in genkhia hi.

Banghanghiam cihleh UNHCR Cardholder te sungah migilo a ngongtatsawm Terrorists khawng ki helkha hiam cihpen ki theiciannuam cihi. National Security hong susiathei migilo pen gamsung ah kideihlo hi ci’n genkhia hi.

Nung April khasung inzong hihvai tawh kisai in “Malaysia Home Ministry te’n UNHCR Card tawite ii Background sitciansawm” cihthu kiza hi. Tuahunlai thuthang akizakna ah Malaysia Home Minister leh UNHCR tepen April 01 ni in ki muhkhawmkhin uh a, bangci sepding cih geelkhawmding uh kici hi.

Related: Malaysia Home Ministry te’n UNHCR Card tawite ii Background sitciansawm

Ahi zongin tutung thuthang hongsuahkhiatna uhah UNHCR in seppih nuamlo “Cooperate” omlo cileuleu ahih manin, akikupna ageelna uh tangtunglo hileh kilawm hi. Bangbang ahi zongin Malaysia gamsung ah atungsa Zomi Refugee teng khempeuh nawngkai hongsak uhlehzong amanlangin gamthumna apuak mengmengding uh ih deihsak mahmah hi. ZD Sawltak #zomidaily