Numei khat HIV natna nei ci’n abeisa kum 15 sung ki theikhial, zato te thu kibawlding

Numei khat HIV natna nei ci’n abeisa kum 15 sung ki theikhial, zato te thu kibawlding

Thailand ah numei khat HIV natna neihi ci’n Hospital khatpan genkhial mawk uh ahih manin, abeisa kum 15 sung HIV natna aneimah kisasa hi. Ahi zongin tuapen aki genkhial ahihlam theikhia kik ahih manin, tua Hospital pen thu bawlsawm cih The Nation pan kiza hi.

Tua numeinu pen tu’n kum 23 phakhinta a, aminpen Suthida Sangsumart kici hi. Abeisa kum 15 sungpen HIV natna nei ci’n ki ciamtehmawk ahih manin, antiHIV Medicine zatui anene hi a, khuasung mipi te’nzong HIV natna aneikhat in ciamteh uh ahih manin, khuasung vengsung leh mipi mai ah maimial hun tammahmah hi.

Ahi zongin nung Thursday ni in Thai Red Cross Society’s Anonymous Clinic ah asi sitsak “Blood Test” bawl in, HIV natna aneihlohlam hansantak in genkhiata hi.

Tua Blood Test abawl laitak inzong Media te’n encik uh a, Result angahdong ngakcip uhhi. Tuabek thamlo amah ii a Lawyer Songkran Achariyasab kici inzong Blood Test akibawl laitak in agei ah ngakcip cihi.

Blood Test akibawlna panin Result asuahkhiat ciangin tuanu pen HIV neilo cih kiciantak in Doctor te’n agenkhiat ciangin lungkimlua in akhitui te luangkhia ziahziah hi.

Nunglamdiak inzong Hospital adangkhat ah Blood Test bawlin, HIV aneihlohlam kigenkhin himahleh akician mahmahding Official Result deih ahih manin, Media te mai ah Blood Test khatvei aki bawlkik ahihi.

Hihnu pen kum 8 aphak laitak in apa pen AIDS natna tawh sihsan hi. Tuahun laitak in Roi Et Province sung aom Suvarnabhumi Hospital ah Blood Test kibawl a, HIV natna nei cihsanmawk uhhi.

Tuahunpek kum 8 aphaklai akipan HIV natna tawh kisai in zatui aneden ahihi. Bekthamlo, akhuasung mite’n apa pen AIDS tawh asi ahih banah amahzong HIV natna nei ahih manin simmawhbawl in, nawlkhin uhhi. Amahzong thuakzolo ahih manin, Samut Prakarn Province ah kituahkhia hi.

More: Thailand ah Kawlgam numei abuansawm khat temta tawh kidawtlum

Abeisa kum 15 sung HIV natna nei ci’n aki genkhialhna tungtawn in athuak hamsatna tampi te hangin lungsim natna lianmahmah a, tuabang in agenkhial Hospital pen thubawlding, Legal Action lading cih kiza hi. Pasal khatin HIV neih akicihlam theipipi teenpih veve a, ahi zongin nau aneih ciangin Blood Test akibawlciang HIV aneihlohlam aki theikhia cihi. ZD Sawltak #zomidaily