Myanmar, Bagan khuasung aom Pagoda tungpan American numeikhat kia in si

Myanmar, Bagan khuasung aom Pagoda tungpan American numeikhat kia in si

Central Myanmar aom tangtawng khuapi khat ahi Bagan khuapisung aom Pagoda tattung dawnpan in numeikhat kiasuk in si cih Irrawaddy pan kiza hi. Tua numeinu pen American gammi khat kici a, aminpen Ms. Draun Kassandra Arielle kici hi.

Myanmar gambup ah Bagan pen gamdang khualzin Foreigner, Tourist cihte alimpai penpenna khuakhat ahihi. Hih American numeinu zong Bagan ah ahawh hi a, Pagoda tungpan in Photo azaih laitak kiasuk in asi ahihi.

Bagan, Nyaung-U Police te genkhiatna ah zanni Tuesday nitaklam in Pagoda tungpan in akia ci a, alu nakliam mahmah cihi. Nitaklam 5pm hunpawl in “Sunset” nitum khawng enkawm in, Pagoda tungah kahto a, munhoih teng Photo azaih kawikawi ahihi. Tualaitak Pi 20 bang asanna panin kiasuk in, abil langnih paninzong si luangkhiagawp hi. Tuaban ah amaitang zong dupgawp in, anak paninzong si luangkhia hi.

Tuaciang in Nyaung-U Hospital kipuak a, tuapan in Mandalay General Hospital kipuaksawn hi. Ahi zongin Mandalay General Hospital tungman nailo in, lamkal ah si cihi.

Hihvai tawh kisai in buaina aom ciangin Pagoda akemcing thunei te’n Bagan Pagoda te tungah kuamah kahtoloding ci’n mun 20 bangah lai akisuang kawikawi hi. Tu buaina pen Pagoda tungah kahto in Photo zaih cih kiza hi. Tua tuahsiatna apianna Pagoda zongpen kuamah kahtohding akiphallo hiven ci’n genkhia hi.

More: Kawlgam, Bagan ah zinling in Pagoda honkhat kicim

Bagan khuasung aom Pagoda tepen tangtawn pekpan in akilam hi a, abeisa inzong zinling in natsiat mahmah hi. Tuaban ah kum tamlua mahmahta ahih manin, kipnawnlo a, lauhuai ahih manin kuamah atungah kahtohding zong aki phalnawnlo cihi. Sawltak #zomidaily