Vietnam gamsung ah huihpi guahpi hangin mi 106 takin sihlawhkhin, 197 liam

Vietnam gamsung ah huihpi guahpi hangin mi 106 takin sihlawhkhin, 197 liam

Vietnam gamsungah nungsungteng Typhoon Damrey kici huihpi leh guahpi in limnawkkhak mahmah ahih manin, mi tampi in sihlawh cih Reuters pan kiza hi. Typhoon Damrey pen tukumsung Vietnam gamsung anawkkha huihpi khempeuh lakah akhauhpen leh misi atampen in ki ciamteh hi.

Zanni Wednesday ni ciangciang hih Typhoon Damrey huihpi hangin mi 106 tak in sihlawhkhin uhhi. Abeisa Saturday ni akipan Typhoon Damrey in anawk hi a, aliam bekbekzong mi 197 bang aomkhit banah amangcip zong mi 25 bang phakhin hi.

Hih Typhoon Damrey pen Vietnam gamsung ah tukumsung huihpi akhauh phadiak Major Storm bekbek akigawm in 12 vei anawkna hita ciliang hi.

Vietnam Search and Rescue Committee te’nzong apanpih theihbang cimawh dongtuakte panpih in buaimahmah uhhi. Tuabang tuahsiat kawmkal ah asawtlo in Danang City ah Regional Summit kibawlding hisawnsawn ahih manin, khuasung mipi tezong akigingkhol in buaimahmah uhhi.

Tua Regional Summit ahi “Asia Pacific Economic Cooperation (APEC)” ah U.S. President Donald Trump, China’s Xi Jinping, Russia’s Vladimir Putin cihte bekthamlo Asia-Pacific Leaders tampizong ki kaikhawm in ki muhkhopna neiding uhhi.

Guahtui tamlua in, tuikhawnggawp a, tuikholna tuibem Reservoirs tezong tui dimletgawp cihi. Vietnam gamsung ah tuikholna in azat uh Reservoirs bekbek 49 te ah tui dimlua mahmah ahih manin, khahkhiatloh phamawh sawnsawn hi ci’n Steering Committee for Disaster Prevention te’n genkhia hi.

Guahtui tamluatna hangin Asia Pacific Economic Cooperation (APEC) ki muhkhopna pen nawngkaina omsamlo dinga, ahi zongin UNESCO Heritage khuaneu tuamtuam te ah ki vakpih theilo khading hi ci’n makai te’n genkhia uhhi.

Vietnam gamsung ah tuicinpi tungthei zelzel a, nungkhasung mahmah inzong Vietnam gam ii leilu lamsang ah mi 80 takin sihlawh uhhi.

More: Kim Jong Nam thahna ah akihel Vietnam gammi Doan Thi Huong thu tawmkhat

Vietnam gampen leitung ah Coffee alimciin penpen “world’s biggest producer” inzong aki ciamteh hi a, tua Coffee kiciinna kuamsung tengzong huihpi leh guahpi in nawkgawp in tampi siatlawhding kici hi. Sawltak #zomidaily