Spain, Barcelona ah mawtaw khatin mipi nawkgawp in mi 13 si, 100 val liam

Spain, Barcelona khuasung ah mawtaw khatin mipi nawkgawp in mi 13 si, 100 val liam

Spain, Barcelona khuapi sungah suntangpi in mawtaw khatin mipi omna nawkgawp ahih manin mi 13 takin sihlawh uh cih AFP pan kiza hi. Thursday ni in thupiang hi a, hih ngongtatna pen IS migilo te’n ko ii gamtatna hi ci’n pulakkhia uhhi.

Van mawtaw khattawh mipi ommuang kimlai, anawkgawp uh hi a, hihvai tawh akizom dingin aki ummawh mi 2 kimankhin hi ci’n Police te’n genkhia uhhi. Ahi zongin Van Driver taktakpen taimang ahih manin, kimankhiazo nailo hi.

Hih buaina amukha Witness te’n agenkhiatna ah mipi khetawh avakziahziah pen thakhatthu in Van mawtaw tawh nawkphei in, mulkimhuai, cikziat huai mahmah cihi. Mipi te lauthawnggawp in awng ngeingai uh a, asuahtaktheih nadingin un atuahna peuhah taikekgawp uh cihi.

Hihbangdan mawtaw tawh mipi ommuang nawksakgawp cihpen Europe gamsung ah ngongtatna namkhat in hongki limzat mahmah hi. Leitung gammakai te’n hihbang in agamtate gitlohvai ci’n nakpitak in mawhsak mahmah uh a, ahi zongin IS Propaganda Agency Amaq te’n ahihleh ka galkap te gamtatna hi ci’n kipaktak in pulakkhia uhhi.

US President Donald Trump inzong ama Twitter tungah “The United States condemns the terror attack in Barcelona, Spain, and will do whatever is necessary to help. Be tough & strong, we love you!” ci’n gelhkhia hi.

Video: Barcelona terror attack: How it happened

Spanish Prime Minister Mariano Rajoy inzong hihvai tawh kisai in agamsung TV tungtawn in thugenna, dahpihna pulakna nei in, ihvek in ihdahkhawm hi ci’n genkhia hi.

Regional interior minister Joaquim Forn in agenkhiatna ah hih buaina hangin asi pen mi 13 hi a, adangzong mi 100 valbang liamgawp uhhi ci’n genkhia hi. Migilo te ngongtatna “terrorist attack” hi ci’n genkhia a, asi zong ki behlap totothei khamaiding hi ci’n genbeh hi.

Related: Spain ah bawngtal tawh akimawl khat akhe leh agawlgui kipikkha gawp

Spain’s Cevil Protection Agency te genkhiatna ah hih buaina sungah akihelkha asi aliam tepen gamtuamtuam pan Tourists khawngzong hi uh a, akigawm in gam 18 pan ahihi. Tualak ah France, Venezuela, Australia, Ireland, Peru, Algeria, China cih gammi te kihel cihpen kician mahmah cih pulakkhia uhhi. Sawltak #zomidaily