A luangkhia sisan koi ah kizang

A luangkhia sisan koi ah kizang

Sisan in, ih pumpi sung ah nuntaakna an leh huihsiangtho (Oxygen) te ban ah, gimna hong guanthei huihniin (Carbon Dioxide) a pua nunna-tuiluang a hihi. Mihing khat a nuntaak theih nading in, lungtang, sin, kal leh tuap cihbang te tawh nasemkhawm uh a hihi. Sisan pen, annek tuidawnna zui-in, guhlaingek pan hong piangkhia ci-in ki thei hi.

Mihing pumpi sung ah sisan a luan laiteng pumpi lum aa, a ki nungta lai a hihi. Mihingkhat pumpi sung ah sisan galan1.2-1.5 bang a om hi. Pumpi sung ah, a kisam-zahsang sisan a tawmzawk leh nuntaakna lauhuaita hi. Cidam khat in, a kisam zah a hunhun in, piangsak thei himah leh, a damlo te-in, a hunlap in piangsak zolo thei a hih man un, a manlang theithei in a pualam pan, ki behlapkul thei hi. Lamkhat leuleu ah,pumpisung ah sisanval cihbang a omloh hang-in, a cidam khat in, midang sisan a kisamte hawmkhia thei hi. Hih thumanpha pen, a zangsiam te-aa ding’ a lamdang thupha kongpi tawhtang-khat a hihi. Tua sisan a hawmkhiazo te leh hawmkhiattheih na ding lampi a sialte nuntaakna a hung thupha-lianpi a semte ahi uh hi.

Sisan lo-in, mihing kinungta lo a hihmah bang in, sisan a kicih nakleh, nuntaakna zah in, vaikin thupi cihnopna a hihi. Tua ban-ah sisan kizopna a kicih naklehzong a ki nusiatheilo cih, gennopna a hi pha diak hi. Mihing khangcing khat in, “Singhawm suanghawm pan a piang ki omlo”, a kicih a zakhalo tawm ding a hihi. “Khulsung pan piang” cihbang kammal pen, “Pianna nulehpa, piilehpu theilo-neilo bang aa haisawm”ci-in, kilehgen hizaw ding in, ih deihbawl hi.

Sisan in nungtaakna a piangsak a hih man-in, vangnei mahmah hi. Tua hang in, sisan taakna a thupi sak ngeina neite ih hi uh hi. Sisan luang-kibua cihciang in, nuntakna pia cihna zong a hipah hi. Zongeina tuamtuam leh dawithoihna te ah, sisan kilimzat hi. Mihing nuntaakna ki-hutna ding ah, ganhingsi bek a zang minam ih hihna in, ganhing tawh ki tehtheihlo mihing nuntaakna a thupisak minam picing ih hi uh hi.

Ih taangthu ah, itna hang in, a ma nuntakna nangawn itsiitlo, a mahleh a mah kipiakhia cihbek a om hi. Tua bang luangkham ngam dong itna sang in, a lianzaw itna a omnawn kei hi. Itdan siam ding leh itna a diktak ding bek kisam thei zeel bek hi. Mihing ih hih mahbang in ki-it khial thei hi. Tua a hih man-in ka itte kua hi aa, bangci-bang-dan leh bangciang in ithuai ding a hiam? cih zong lungngaih zek kulthei hi.

Makaai khat in zong, a-it a ta a nau, a nungzui te-in, a nuntaakna uh a piakngam-zahdong ding un a ittheih ding thu, hilhsiam leh makaihsiam ding, thupi thukin a hihi. Itluatna leh veiluatna in, mihing-mit tawsak thei mawk hi. Nuntaakna piakhia veve Nazi gaalkap leh a dang gaalkapte taangthu bangci ki ciapteh hiam?

Nautaang nungzuite sisan leh a nuntaakna uh, makaaite khut sung ah a om gige hi. Makaai bek hi-lo in, tua sisan a luankhiatna tawh a ki nahvawh, a panpih leh a hanthawn khatciat tung ah zong mawhpuak om peelmawh hi. “Tua sisan luanna in, a sia a pha kei tan ding hita hen”, ih ci ngam takpi hiam?

Midangte a ding nuntaakna a piakhia-ngamte, Pasian Tapa lungtang neite a hi uh hi. A vom a kaang kitel sinsen itna tawh a hong ki piakhia, a ki bua-khia tua Tuuno sisan, a umte khempeuh, tawntung suahtaakna ngah in, Pasian gamluahte a hita uh hi. Pa deihna a zui, Tuuno sisan mawk buak lo hi. Nantal’suan (Zomi, Zogam leh midangte aa ding sisan piate zahtaakna tawh)