Lungsim Cidamna (Mental Health) ~ Laitai

Lungsim Cidamna (Mental Health) Paunak 15:30;17:22; Rom 12:9-21 ~ Laitai

Thukong honna – Taksa cidamna tawh kisai mi khem- peuhin awlmawh pi in nei ta uh a, lungsim cidamna ahih leh a tam zawtein awlmawhna kinei nailo hi. ëLungsim cidamí cih pen hilhcian dan​​ tuamtuam om a, WHO in a hilhcianna ah, ìLungsim cidam pen mi nun nuam leh tawldam, eima hihna leh theihna kitelna, nuntakna ah haksatna a tungte san dan leh nawk dan siamna, lawhcing tak leh gahpha suah dinga nasep theihna, mi dangte leh khua leh tui adinga mi zattak hih theihnate hi,î ci hi. Hih hilhcianna tawh kizui in na lungsim a cidam takpi hiam?

Lungsim cidamte nun a kilah khiat dan

Lungsim cidam cih ciang lungsim natna lak pana bitna ciang bek kawk lo a, lungsim tawlna leh haksatna i nunna ah hong tungtelak pana bitna bek zong kawk tuan lo hi. Lungsim cidam a neite in amauah lungsim cidam zia-le-tong kilangsak uh hi, tuate :

• 1. A lungkim nuntakna nei uh hi.
• 2. Dam nuam sakna leh utna nei uh a, nun nuam uh hi.
• 3. Haksatna maingat ngam, a kipuk hang thokikin nuntak ngeina in nungta kik uh hi.
• 4. Na thak sin utna nei uh a, hun kikhel lianpi tung hi taleh zong a hun zuiin nuntak dan siam uh hi.
• 5. Na khatpeuh mi in a cih mana cipong hi loin, a hang neiin ci zel uh hi.
• 6. Na khatpeuh a kibuk kim a cih dan siam uh a, nasep hun leh tawlngak hun, na phamawh sep hun leh kimawl hun, midang khual hun leh amah kikhual hun cih bangin nuntak dan siam uh hi.​​
• 7. Midangte tawh kizopna hoih tak nei uh hi.
• 8. Amah ah kideihkhopna leh kimuanngamna nei hi.
• 9. A ma diklohna ah a mawh paw ngam hi.
• 10. Lungsim leh gamtat dan ki-uk theihna nei uh hi.

Lungsim cidam a manphatnate

Khansau sak

Lungsim lam a sin mite in lungsim cidamte a khan uh sau tuam hi in gen uh hi. Kum 7.5 bangin a khan uh sau tuam hi in thei uh hi.

Taksa cidamna

Taksa damsak a, stroke, lungna leh natna kip tampi lak pan kembip thei a, natna kip neite lak pan zong lungsim cidamte a khan uh sau tuamin a natna un zong subuai lo zaw deuh hi ci uh hi.

Na tam sem zaw

Lungsim cidamte in lungsim cidam lote sangin nasepna ah tam sem thei zaw, siam sinna khatpeuh ah zong siam thei zaw in, gitlohna sukha lo deuh uh hi kici.

Lungsim cidamna dinga kul leh kisamte

Taksa cidam nei dingin cih ding leh cih loh ding a om mah bangin lungsim cidam nei dingin cih ding kisam tampi om hi. A kisam pha diak pawlkhatte:

Maitai takin zingtho ding

Zing sanga i khanlawh pheta i lungsim puak danin sun tawntung i gamtatna hong sai ban ci uh hi. Susan Miller in zing thawh pheta cih ding nam nga, lungsim cidam neihna dinga kisamte gen a, tuate:

• (i) Nui photphot in la,tua ciang Lungdamna ko in.
• (ii) Tuniín na nunna-ah lungdamna a tun lamen in.
• (iii) Ngaihsutna hoih lote na lungsim pan pai in.
• (iv) Na sep ding ngaihsun in. A kisam masa pan sep kipan in la, ni khat sungin tampi sep sawm ken.

Taksa damna awlmawh in

Lungsim, kha leh taksa a semkhawm hi a, khat a nat leh a dangte in thuak hi. Lungsim cidam nei dingin taksa cidamna awlmawh kisam hi. Nek leh dawn, tep leh muam lak pan kikep a, cidamna check up zel kisam hi. Exercise lam zong nawlkhin ding hi peuhmah lo. Hih pen hehna leh lungsim tawlna paih khiatna hoih tak ahih banah, maitaina a piangsak (serotonin) kici i khuak pan tam pai khia ahih manin, i nuntakna in lungnopna ngah hi. Lup hun bi neih leh hoih taka ihmut zong kisam pha peuhmah. Na i sep ciang a hun khop theilo a sep sangin tawlngak hun i kibawl siam kisam. Mi siamte in taksa leh khuak tawlnga lo a zat sangin tawlnga kawma i sep ciang kihoih sep zaw in tam kisem zaw ci uh hi.

Midangte ading phattuamna neih nopna lungsim

Amah bek a kikhual mi in lungsim cidam nei ngei lo hi. Hih mite kei adingin bangci zat ding cih sangin midangte adingin bang manphatna nei ka hiam a cite lungdam zaw. Tua bang mite in lamet nei loin midangte huh uh a, nuamsa in lungkim uh hi. Lamet neia mi i huh ciang thangpaihna tung nuam hi. Midangte huh cih ciang i siamna, i talent, i hun, i kam mal, thungetna, i tuahkhak thu leh la khatpeuh zangin midangte kihuh thei hi.

Lungsim lam a siam Abraham Maslow in, mi khempeuhte kisap, a loa i om theihloh tampi a gente lakah phatna leh midangte phawk hih utna cihte kihel hi. Hih i kisap tuahte kisuk picinsak ding i siam tek hi. Mi ngaihsutna dot, a thugen lim taka ngai, a hun ciam phawksak, cialna​​ awlmawh, phone call leh email dawn kik, phat tuak ahihna munah phat cihte midangte kinbawl hi hang cih a kilahna hi. Tua ciang maw, midangte in hong huhna ah lungdam dan siam zong midangte adingin thupha bawlna hi cih mangngilh kei ni. (Zop lai ding) Laitai – Volume 9