Atumdang Zomite’ Mindset

Atumdang Zomite’ Mindset

Piat-a piat tavet kipilsak zeelpak dihni:
Mindset : Lungsim puakzia, ngaihsutzia, saanzia, upzia, laakzia.

Zomite’ mindset-pen akhangto uut mahmah, apil, gualbaán, sentsaang uut mahmah napi-in gualtungtuang minam lianpite’ lungsimpuakzia neihsawm ngiatlo, kawciik guultawng-ah bilhcip tentan sese-a, khangthakte-in naakpi-a pelhhuai ahihlam vei cihtak-in kavei-hi.

Zomi Pupate-in “Hausa gensialo omlo, misi phatlo omlo” cih thuciin or paunaak nei-uhhi. Bang gennuam uhhiam cihleh…

“Mipi’ ading-a upa vaáihawm peuhmah-in huam zawhlo, khentuam paihtuam, guptuam, neekngaihtuam nei niloh ahihman-in guploh, huamloh, neekngaihlohte peuhmah-in gensia limlim cihna ahihi.

Tuhun Politics akici phanphan nainganzii makaaite diakdiak-pen mipi’ ading huamlo ahihkeileh mipi’ ading bangmahpi seemlo, phulo, nawklo ahih ngeingeileh genloh aphamawh hi-a, kosuk gawpding hizaw laai-hi.

Gualgen vaangthang USA, AUS cihte-ah TV nangawn pan-in mipi’ ading gina-a seem asakloh-uh PM, MP, Ministers cihte kiho giapgiap-hi. Media tuamtuam-ah kikosia zihziah, Cartoon-tawh bangtawh… ahizong-in tua kosiat athuak uliante panpih-a ui-meikaáng bang-a akitaaklah daidai uino omlo (ka-mu ngeikei-hi).

Zomite leuleu MP nih leh thum nei sunsun, nasep kician hongnei khollo, mipi’ phatuam nading seem khollo, tua-thu nengcik apulaak omleh ui-meikaáng bang-a MP te gum-a kitaaklah daidai uino tam cihtak-in tam-a, “Minam khangtoh nading…” ci kankan laaideep uhhi. Hihthu-mah lamdang kasakpen-pawl ahihi.

MP te nang’ gup tadih kuul peuhmah lo-hi. Kumpi’ piak khasum tuulza-sawm vaal asaangte hi-a, mipi’ ading kiciantak sep aneih keileh Term cin-zong ngak kuullo-a lungpho ding mipi’ mawhpuak ahihi (mipi’ ading akhual taktak I-hihleh).

Zomite akhantoh ngeilohna aziak-pen, MP tekhawng tuamneih daan-a pumgup, mipi’ ading agen khat omleh zunko, eékko-a ko, kipilsak mahmahlaai, athukhual mahmah daan-a kipholaak denkeei zawlaai, zumhuailua hihang.

Mipi’ ading pang zawdingmaw?
MP’ ading pang zawding?

MP’ ading na’ pan peuhmahleh MP te’ uihaii hi-in khasum saanglo penglam gaalkaap nahih man-in na’ tu na’ ta khang nangawn-in simmawhna leh lipkhapna thuak dinghi.

Mipi’ ading na’ panleh mipi deihsakna adeih Pasian-in na’ tu na’ ta khang-ah khanhoih khanpha thupha-tawh hong suulzuih dinghi cih ciantak-in ka-theihi.

NB: MP cihciang-in mipi’ kisapnate tungsiah-ah gending, phuding mawhpuak anei mipi’ taángmi ahihi. Vote apia mite’ sum-bek anei hilo-hi. Kumpi khasum cih nungsang amau athei ngei vetlo meigong tagah khat-inzong khasum pia cihna ahihi. Hihciang atheilo MP-bel omtuak laai mahmah mawknaven!

Na’ Lungsimpuakzia Kheel In
(Change Your Mindset)

MP te’ kisapna, thaneemna, kamciam pelhna, neeksimna, guptuam paihtuam neihna cihte Zomi khangno khempeuh-in apulaak ngamding, pulaakzia asiamding, muibunh tak-a kawk siamding-in na’ lungsim-uh pia un. Banghanghiam cihleh tualo-in minam khangto cihpeuhmah om ngeingei deksuai kilkel lohi. Zokhai