Numei te pheituam ding abawl masa Coco Chanel: (1883-1971) tangthu
Coco Chanel minthanna leuleu pen silh leh ten, puan zepdan, paunkhuidan style tuamtuam te tawh a minthang a hihi. Leitung galpi khatna kipat 1920 kimpawl ciangciang pen numei te puansilh peuhmah zattangzang lo hi.
A ma suahkum pen 1883 kum hidingin ki ummawh hi. A ma nuntakna pen zawnna cihmawhna tampi sungpan hong paing a hihi. Kum 12 a phak in a nu in sihsan lailai hi. Nasep tuamtuam sem kawikawi aa kum 18 a phak in lasak kipan hi. Ahizongin lasak siamlo aa a lasak tawh nalianpi pianglo ding cih kithei hi.
1913 kum in a lawmte huhna tawh puanzuakna sai neukhat hong kipan leuleu hi. Sai zuak lam ah kiva zaw aa Galpi khatna sungah mihau pian khat kici thei ta hi. 1919 kum in Paris khua aa a ma neihngiat puanzuakna sai kician mahmah khat hong nei hi.
1920 kum kiimpawl pen numei te a’dingin kikhelna tampi a pian hun a hihi. Mee kitelna ah meepiak theihna, zum ah thuneihtheihna, lungpho na neihtheihna cihbang a hizongin a khantoh hun a hihi. Tua thute tawh kizom in puansilh nikten lam pan in zongh a khangto hong kipan hi. Silh le ten bek hilo in sumbawm, puankilh, pum tung kizepna tuamtuam te dongin a mabawlte leitungbup ah kizel aa mihau te diakdiak bangin ki tuhbawl liang uh hi.
Galpi nihna hong pian ciangin German te in Paris hong zo uh a hihmanin a puanbawlna ah nasem mi 3000 valbangin nasep suplawh aa a ma nasepzongh hong khawlpianta hi. Kum 87 a phak 1971 kum January ni 10 ni in si hi. Hih Coco Chanel in a nuntaksung pasal neilo hi ci in kiciamteh hi.
A mahangin tu ni in leitungbupah numei te in tangzangtak in gamtat ziauziau theih nading pheituam leh ten theih tuamtuam hong nei uh a hihi. Tua a hihmanin leitung a kikhelsak numei thupi khat in kiciamteh hi.
(Numei pheituam a zangkhempeuh in Coco Chanel tung Lungdamkohna lim tawh na Share un) Siamsin Library
Comment piaknop aomleh...