Kum 2015 kiteelna Kansau khua ah Zomi Party gualzo hi
Mi pawlkhat te’n( amin uh gelhsak dahmai ni) Face book ah tutung kitelna ah “Kansau khua buai, Lasiam Lengtong Pauno khua, JK Kam khua, Kamsen khuate ah ZCD in zokei zen ei,” acih ban-uah “Thawn Kham khua leh Sia Do Khup khuate zong daidide, bangla hong phuaklailai uh tam,” cih bangdankhawng hong suah uhteh, kilawm salo, diksa khinlo ka hih manin hihlai konggelh ahi hi.
ZCD makaite, Sia. Do Khup khua Kansau ah Campaign vabawl ziahziah keita le-uh Zomi Party in tutna khempeuh ah galkap Party zo dikdek a, lamdang mahmah a, Zomite’ Pasian in hong panpih mahmah ahihlam I mit mahmah tawh I muhzel manin I lungdam hi. Lasiam UThawn Kham khua Tonzang-ah zong Zomi Pary in zo ahih manin I lungdampih hi. Zomi Pary zawh lohna mun khuate leh a mite min vasuah pen hong pilvai, hong picin vaikhinlo hi. A zawhna munteng I suahding hilel hi. TV, Radio leh thu kizakna tuamtuam a thupidiakte in zong, a zawhna munteng genlel a, a lelhna mun leh khuamite min genselo hi. Mailam ah pilvang ni. Kei zong nomah bangin a suahnuam hileng, Internet ah, Zomi ki itsak leh akim apam a, amah sanga, pilzaw,siamzawte, zuaphuak tawm in a gensia, a langpang a, lai gelhgelh pawlkhat bang 2014 Census in a khuazang un, Zomi kicilo uh a, tutung kitel in zong Zomi Party gual zololai hi. Ka khuazang un 2014 kum Census lai-in Zomi ka kici mang uha, tukum kitel in zong, a beisa in USDP in zungthuk na khakhin mahmah hita leh Zomi Party mah in gualzawhna sang pen ngah ahih manin ka lungdam hi.
Ahi zongin Zomi kici nuamlote leh ZCD zawh lohna khuate zong ka mipih, ka sanggam u le nau vive mah uh hi-a, tua hang tawh, ka nuaksawm, ka midang bawlsawm, ka neumuh sawm tuan kei a, mailam ah amaute ka ngahzawhna dingin nasep lianpi nei-in ka ki ngaihsun zaw hi. Amaute a mit uh a kihon masiah Zomi itkhempeuh in totbawllo, ngong’ bawllo, ko bawllo in itna, deihsakna, lungduaina tawh I zotding, I ngakding hizaw hi. I gal bangin ngaihsun kha peuhmah kei ni.
Zomi Party zawhna khua khempeuh zong, makaite leh ei mipite hanciamna hong hikhinsamlo hi. Pasian hong huhna hang bekbek hizaw hi. Makaite hanciamna himawk leh Campaign hong bawl loh na khua tampitak omding hi. A vabawlnate uh leh gan kigawhnate zong a khuamite sap hizaw mai hi. Kei bang ka khua uah, Zomi Pary in nalel khazenzen leh Pu Kam Lian leh ZCD makaite kiangah ka khua uah, na vapai loh man uh hi, makai gina na koih loh man uh hi, ci-a, a kawkgawp sawmzaw hing. Ka cih nopna ah ZCD lelhna khua mite khempeuh mawhsakpahlo in, I Party makai pawl, ei a huhpawl thanemna hi, ci-a, kitel kikteh Zogam khuakhem peuh I ngahzawh nading hanciam zawleng I minam mailam hong cidam zaw ding hi. I sepding taktak kisem theinailo hizaw ahih manin I mipihte thanemna puaksiam photleng ka ut hi.
Zomi Party in Zogam ah hong zawh pen Pasian hong ompihna taktak hi. Bang hang hiam cih leh Zomi Party Election a lut loh kum 14 val bang hong hita a, Zogam khua tampi tak-ah galkap party leh Chin party na inntek mahmah khin hi. USDP te bangin 2010 kitel a kipan, a mizat uh pawlkhat leh khua Hausateng khasum sangsak mawk uh ahih manun Pasian in hong panpih hikei leh sum le pai I-et lahlah tawh, Zomi Party in lah kuamah sum aki piakzawh gen thadah, I khualzin nading, I Mawtaw tui thunna ding nangawn a baihlo hiven mataw. Mailam ah Zomi Pary Zogam khua khempeuh ah I gualzawh khit nop leh Election simin Mee luidenta ni. Party Campaign limtak khua khempeuh ah bangmah hong piata kei le-uh a tawm pen ni 1,2, tamin thu vagenleng, tua sangin I hatzawlai ding hi. Bangbang ahi zongin Zomite tenna Zogam khuapi lian penpente nih Tedim le Tonzang, Topa’n hong piak manin eite sepna, tha le ngal, dinmun tawh ka ki et kikteh David Kumpipa bangin hihzahta in ko Zomite nong itnading in, kei leh ka innkuanpihte in bang hilel ka hi, uh hiam, ka cinuam liang hi.
Tuaban ah Pu Cin Sian Thang in gualzawhna hong ngah manin ka lungdam diak hi. Hong ngahkei zenzen leh kitel kik ah lah kuang hong luizo nawnkei leh mi pawlkhatten “Siaza akia hi, bawnglang apua hi,” cih bang danin MP akia hi, ci-a, ciamnuihna peuh in hong neihsak’ khakding uh ka phal kei a, minam dangten zong Zomite ki thutuak keisi uh e, hong cilai ding uh, cih ka ngaihsun kha hi. Ka laigleh zong I thulu bang tawh hong ki tuak nawnkei liangin, khawl bawl phot ni. Ka deih bulpi in ahih leh Kansua khua ah Zomi Party gual zo a, a gualzawh lohna khuate zong, a mite ko bawl leh Internet khawng ah suahnawnlo zaw in, Zomi Party zawhna khuate bekh mah suahzaw, genzawta ni, ci-in Zomi khangnote tungah ka hong thuamnuam hi. Gualzawh dan, ki pahtawi dan zatsiam ni.
Khaibawi
Comment piaknop aomleh...