Atheihhuai nupakal omkhop ziading (18+ adingbek)

Atheihhuai nupakal omkhop ziading (18+ adingbek)

Hih thu pen nupa kaal thu le kum sawm le giat a cingsa nungak tangvalte theih ding a kisam le a thupi khat ahi hi. Tua ahih manin zahmawh thu hi ci-in na zum ngaihsut khak ding ka deih kei hi. Bang hangin nungak tangvalte theih ding zong kisam hiam cih leh nungak tangvalte zong nupi papi mah a suak dingte uh ahih manin theih ding kisam hi. Mi pawlkhat in zahmawh thu pen zum ngaihsut lua kha uh ahih manin theih ding a thupi a kisam pawlkhatte nangawn theih ding phawk ding sawm nawn lo uh hi. Tua manin nupa kaal sungah a kisam pawlkhat mun awngin om thei hi.

Nupa kaal sungah a kisam mahmah thu khat ahi lupkhop hun ciangin khat le khat kilungkimsakna pen a thupi mahmah khat ahi hi. Khat lungkim mahmah napi a khat ading lungkim huai lo cih bang om thei gige hi. Tua ahih manin lungkim lote adingin a nupa kizopna uh pen cimtak huai lungkiat huai kha thei hi. Tua bang a om loh nading nupa kizopna bangci cih le’ng hoih ding hiam? Khat lungkim mahmah napi bang hangin a khat lungkim zo lo hiam, cihte theih ding kisam hi.

Khat lungkim napi a khat a lungkim lohna a hang pawlkhat

1. A lupkhop uh ciangin a kizopna ah khat in ama lungkimna bek thupisak, ama man hun bek thupisak, amah man peuh leh a lawm zong a man ding a sa mi pawlkhat om uh hi. Ama lungsim bek thupisak ahih manin a khat in nuamsa hiam lungkim hiam cih don nawn lo ding hi. Tua bang hi leh khat a lungkim hangin a khat ading lungkim huai lo ding hi.

A zawdeuh-in nupa kizopna ah pasalte pen numeite sangin a lung uh kim baih zaw uh hi. Pasalte lam pan nopsakna a man uh ciangin numeute lam pan a kipan pan thei lai uh hi. Hih munah numeite pen mawtaw bangin setnu a paipih pah pawl ahi kei hi. Vanleng tawh kibang uh hi. A tual sungah kawi vekvek phot uh a, a len nading mun a tun ciangin leng pah thei lo lai uh hi. Tua mah bangin a len khit uh ciangin zong khawl kik pah thei lo uh hi.

2. A theilo mi pawlkhatte in, pasalte a natui uh pai baih leh sisan hat, a thahat, a cidam ci uh hi. Tua manin a man baih theih theih nading uh hanciam uh hi. A luppihte’n ziakai a sak luat khak ding uh lau-in nawh nuam thei uh hi. A taktak ciangin Manbaih luatna pen natna ahih loh hangin cidamna zong na hi lo hi, ci-in siavuante in limtakin na gen uh hi.

Tua mah bangin man thei lo, cih zong a hoih hi tuan lo hi, ci uh hi. Nupa lupkhopna cih pen khat lungkim nading bek ahi kei hi. Nupa kilungkimsak nading ahi hi. Pasal pawlkhatte in nupa kizopna a dan thei lo uh ahih manin lumsuk bekin kipan pah nuam thei uh hi. A taktak ciangin nupa kizopna pen venleng tawh gentehna a om mah bangin kizutzut, kilawnglawng cihte a om masak ding thupi hi. Tua pen numeite lungkim nading a kisam mahmah khat ahi hi.

3. Ka khualzinna khua khat pan ka zak thu khat om hi. Nupite thugen hi a, ciamnuih cihtak ahi hi. Nupi khat in, “Ka khua sung uah video a om zawh ka pasalte uh kithuak zo nawn peuhmah kei, siklup leng lah gamtang thei uh, thallup leng lah gamtang thei uh, khuplup leng lah phamawhsa kei uh, i om dandanin gamtang thei mai uh, a koi pan hong theih khiat uh hiam, video sung pan peuh ci zanzan mawk uh, video ka etet hang tua bang gamtatzia ding peuhmah khat vei zong en kha ngei peuhmah keng, ci hi. Cihnopna ah a lam bang banga kiluppih ding ahi kei hi. Zi in a koi ci om leh nuamsa cih zong nupa khat le khat a kidop huai thu ahi hi. Nupa kaal kizopna pen a siangtho kizopna ahi hi.

4. Nupa kizopna a man ciangin khat le khat maitang kituah a kiho ding, kinam ding cihpen a thupi mahmah khat ahi hi. Kizopna a man ciang kinung ngat pah, kiho nawn lo ki-ihmut san pah cihte pelh huai mahmah hi. Nupa kizopna cih pen kizop khit ciang lungnuam ding, lungkim ding, lungkhamna veng zo ding, dahna veng zo ding cih zah dongin thupi hi. A ngaina bang le tawh nupa kizop mawk pen a kingah thei ding hamphatna tampi kisuplawh thei hi.

5. Lungsim om bang kigen ding thupi mahmah hi. Nupa omkhomna hangin a hoih a nuam lam a om ding m thupi hi. Ahi zongin a hoih a nuam lam a om theih nadingin numei in ama lungsim a pasal tungah a gen ding kisam a, pasal in zong a zi tunga omkhopna tawh kisai a lungsim om bang a gen ding kisam hi. A kigen ngamlote kidot ngam ding zong kisam hi. Tua bang omkhop dan nuamsa keng, a dam a nawh cihte a kipan khat lungkimna bek ahi lo nupa lungkimna pen kidot ding thupi mahmah hi.

Nupa omkhopna cih pen a zum huai, a dai huai hi peuhmah lo hi. Nisim omkhawm napi a zum huai a dai huai bangin a ngaihsunte amau le amau a kikhem hi uh a, amau gamtat a zumpih tawh kibang uh hi. Nupa kaal sungah omkhopna pen siangtaka kigen ding kisam hi. Dr. Hello/ Job Cinpi (Zomi Laisim Nuamte)