Naukhak, nauhalna zatui tawh kisai ~ Job Cinpi
A masa-in kong gen nop thu in, hih thu pen siahuan siamte gelh kong let kik hi cih kong gen masa nuam hi. Nauhalna tawh kisai nam tuamtuam a om sung pan hih kong gen masa ding nauhalzia pen numei tampite zat nauhalzia hi-a, a hoih pen cih ahih loh hangin a kizang mahmah khat hi ci-in siahuante’n gen uh hi.
Zatang nekna tawh nau a hal om ding uh a, nau neih loh nadingin nulepa omkhop ding a hun a ni sittelna tawh nau neih nading pan a kidal zong om ding uh hi. Tua mah bangin tuate sangin a ol zaw le a baih zaw ci ding hiam, vai a tawm zaw dingin zatui kisun ziau a nau neih ding a kidal zong mi tampi om uh hi.
Nauhalna/naukhakna zatui cih pen nau a nei nuam nai lote adinga kibawl zatui hi cih pen i theihsa ahi hi. Hih nauhalna zatui pen khat vei kisun leng kha tum kimang thei a, zatzia dingin a kihilhna bangin pongman takin a zangte adingin nau neih nading pan 99% dal thei hi. Ahi zongin hihte pen thei ta hang ci-a ei le ei mawk hih gawp ding hoih lo a siahuan siamte mah tawh kimu a vaihawm ding mah hoih pen hi.
Hih nauhalna zatui pen mi a tam zawte in Depo ci-in thei uh-a nauhalna tawh kisai siahuan siamte in nau a hal nuam numei a tam zawte hih zatui sun uh hi. Hih zatui pen a kisun numeite’ pumpi sung pan Progestin hormone khahkhia ahih manin, khat vei kisut ziauna tawh kha thum sung/nipi kaal 13 sung bangmah dang cih kul nawn loin nau neih nading pan dal hi. Numei pawlkhatte in zatui kisut ding kihta uh-a, ahi zongin naupai/nausuak gimna sangin zatui sutna thuaknop zaw ding cih lamen ahih manun kisun uh hi. “Nauhalna namdangte zong a nuai lam ah aban zomin kigelh hi.”
A Kitelkhial Thu
Hih nauhalna zatui tawh kisai a kitheikhial thu pawlkhat om hi. Hih zatui a zangte pen cikmah hun ciangin nau nei kik thei nawn lo ding, nin a pai pongman nawn lo ahih manin naubu sung/taaibu sungah si kikhol mang ding cih bangin ngaihsun uh hi. Tua bek tham loin hih nauhalna zatui pen gil sungah nau a om lam thei loin kisun kha leng gil sunga om nau adingin lauhuai hi ci uh hi. Hih thute pen thuman hi lo hi.
Ahi zongin mi pawlkhatte in siahuamte tawh kilak loin a veng a pamte kiang pan a ngah zatui le ziate tawh ama hoihsak bangin kibawl ahih manun dong a tuak mi pawlkhat om thei uh hi. Tua bang mite dongthuakna pen ama khialhna hi-a siahuamte tawh kisai lo hi.
Hih Zatui In Bangci Nasep
Hih zatui in numeite pumpi sungah hormone progestin khahkhia ahih manin a naubu sungah a tui /a keuh dingin pasal kiang pan a pai nam pen numei naubu sungah lutsak loin dal hi. Naubu sung a tun nading pan a dal zo khin kei zongin naubu tungah a belh lo dingin bawl cih ding ahi hi.
Bangci Zat Ding
Hih bang thute pen thei kisa a ei le ei mawk hih ding sangin siahuante mah tawh kimu masa a vaihawm ding mah hoih pen hi. Nin neih hun sung hi leh hoih pen hi ci uh a, nin neih loh hun tawh kituak ahih leh zong siahuante ngaihsut piakna dot ding kisam hi.
Hoihna
A hoihna lam gen masa ding hi le’ng, hih zatui kisutna hangin nupa kaal sung nulepa kizopna ah a nopmawhna om lo hi. A ngeina bang manin omkhop theih a bang mah nawngkaina om lo hi. Tua bek tham loin nupa kiten cil lam nai a nei pah nuam lote adingin nupa omkhop hun sim-in nau neih khak ding lunghimawh denna pan hong suaktasak hi.
Hih zatui hangin nidang sangin nin neihna tawh kisai buaina tam lo zaw thei hi. Cihnopna ah numei pawlkhatte hih zatui a kisut a kipan nin nei nawn lo/a nei zongin tawm bek nei cih bangin om uh hi. Tua pen hih zatui hangin a piang sitna hi lo-a hih zatui hangin a piang ding ngeina/pongman khat hi ci uh hi. Tua bek tham loin hih zatui kisut ziauna pen nauhalzia ding nam tuamtuam a omte sung pan vai a tawm mahmah khat ahi hi.
Siatna
A hoih lohna lam gen ding hi le’ng, hih zatui zatna hangin nin neih pongman nawn lo thei a, nin pai nawn lo ahih manin nin neihna tawh kisai-in vai tawm tuam hi cih nading a om mah bangin a ngeina sangin a nin tam pai zaw ahih kei leh sawt pai zaw cih zong om thei leuleu hi. Tua bangin hoih lohna khatpeuh pen zatui kisut zawh kha 6 le kha 12 kikaal sungin piang thei hi. Hih zatui kisutna hangin an duhzia zong kikhel thei a, hih zatui kisutna hangin bang mah a ci lo pawlkhat om thei ahih bang mahin pawlkhatte a pumpi gikna khang gawp thei ci uh hi.
Pawlkhatte hih nauhalna zatui a kisutna uh hangin nulepa zahmawh lunggulhna a kiam pawlkhat om thei ci uh a, lungkiatna zong khangsak thei ci uh hi. Gil sung lam nopmawhna zong piang thei a, sung-nim, luvai, lutangna cihte le nawi sung na cihte zong om thei ci uh hi.
Bang Hun Ciang Nau Nei Kik Thei Ding
Hih thu zong thupi kik mahmah hi. Bang hang hiam cih leh nauhal naukhak cih pen hun khat sung ading bek hi a, a tawntung ading hi lo hi. Tua ahih manin hih bangin zatui tuamtuamte tawh nau a khakte adingin bang hun ciang nau nei kik ding cih zong theih ding kisam hi. Ahang pen a zat uh zatuite khat le khat kibang lo ahih bang mahin tua zatuite hangin nau a neih kik theih ding uh hun zong khat le khat kibang lo hi.
Zatang Tawh Kidalna
Naukhak nadingin zatui a kisun pawlkhat a om mah bangin nisim zatang a ne den pawlkhat zong om uh hi. Tua bangin nisim zatang nekna tawh nau a khakte pen zatang ne nawn kei leh a huampi-in kha khat zawh ciangin ta nei thei kik ding uh hi. Pawlkhatte nipi kaal nih kaal thum zawh ciangin nau nei thei dingin a kipan zong om uh hi.
Zatui Kisunte
Hih zatui kisun cihte pen a tunga i gensa thu ahi, zatui khat vei kisutna tawh kha thum/nipi kaal 13 sung kimang ding cih hi a, pawlkhatte khat vei a kisut zawh kha thum a cin ciangin kisun kik zel uh a, pawlkhatte khat vei kisut tawh khawk suak thei uh hi. Tua ahih manin hih zatui a kisunte zong ta a neih kik theih ding uh hun khat le khat kibang thei nawn lo uh hi.
Khat vei bek mah kisun a kha thum a cin zawh ciangin a kisun kik nawn lote pen ta a neih kik nadingun a tawm pen kha thum pan kha guk sung bang sawt thei ci uh hi. Tua bang hi lo-a kha thum a cin zawh ciangin nih vei thum vei sang a tam zaw a kisun kikte pen zatui a kisun nawn kei zongin ta neih theih nadingin a kum bangin zong sawt thei hi ci uh hi.
Implant A Zangte
Implant / Implenex cih pen mei-git tang cia a pha ding khat khut/baan sungah a kithun ahi hi. Tua baan sungah a kithun { progestogen hormone } pan in nau neih nading pan kum thum sung bang dal thei hi. Hih bang tawh nau a halte adingin nau a neih nop leh a naih nop hunhun ciangin tua a baan sunga kithun van neu pen lakkhiat ding hi ziau hi.
IUD Tawh Nauhalna
IUD cih pen nau neih loh nadingin naubu sungah a kikoih van khat hi leuleu hi. Tua van pen siksan tawh a kibawl van khat hi-a nam thum omsak uh hi. Nam khat le nam khat kibang lo-a kum nga pan kum sawm kikaal a kimang dingin kibawl hi. Cihnopna ah tua van pen numeite naubu sungah kikoih leh tua numei in kum nga pan kum sawm kikaal sung ta nei thei lo ding cihna ahi hi.
Ahi zongin hih van pen hormone tawh a kibawl hi lo ahih manin a zenzen-in tua van a thuah numei in nau a neih nop hun ciangin tua van lakhia ziau thei-a, kum tampi a thuah sa ahi phial mah zongin tua van lakhia peuh leh kha khat bang a cin zawh ciangin nau nei kik ziau thei hi.
Zato lam nasem ka hih loh ban ah pilna sangpi a nei/a sin zong hi lo ka hih manin ka laigelh a kitel kei bialbual leh hong theisiam un ci-in kong thum nuam hi. Khat le nih in phattuamna le thutheihna a ngahlawh leh zong kei adingin manpha hi. Job Cinpi
Comment piaknop aomleh...