Atheihhuai DNA (Deoxyribonucleic Acid)

Atheihhuai DNA (Deoxyribonucleic Acid)

Saipi sung pan saino; uipi sung pan uino bek mah, cih bangin nuntakna nei nam khempeuh in amau’ nam ciat bek piangkhiasak thei uh hi. Tua pen bang hang hiam?

A dawnna pen molecule sunga om, DNA hang ahi hi. DNA in a kipiangsak nate khempeuh a tuampian sa-in a suahna dingun thupia thei se zen hi. Sazangmalneu [cell] sungah DNA tampi na om lai hi. DNA in a vom khinkhian thupiak theihna tawh nau a kipaii hun sungin i nu maw, i pa i kisut theihna dingin i DNA thupia nong se hi.

DNA a kiteikhiat [replication/copy] hun sungin DNA kilehzial [unwind] ahih manin ki-copy thei suak hi. Pumpi sung protein-te leh adang nuntakna dinga pumpi sung nasepnate ah zong, a thupiakna a sungtum theihna dingin kilehzial sem hi. Nuntakna nei khat [organism] ii DNA bukim taka a omna pen genome kici hi.

DNA a omna mun pen nucleus kici sungah a om banah mihing leh a pumpi sung a kikaipawn pha deuh [complex] ganhing pawl khatte’sungah DNA kilamin a omna mun pen mitochondria kici hi. Cell ii kitangsap, pum sung sathau [energy] pen mitochondria in a piangsak ahi hi.

Zahmawh omkhopna [sexual intercourse] panin a piang tate in palam pan-a DNA 50% leh nulam pan-a DNA 50% mah luahsuk uh hi. Ahi ta zongin, tate in a nulam pan-a mitochondria a bupin luah sese hi. Ahang pen pasal’ bawtui [sperm] in mitochondria kem suak loin, numei’ aa nutui [egg] in nau a kipaii hun [fertilization] sungin tua mitochondria pen naungek tuisik in kem to suak a na hih man’ ahi hi.

DNA nasep: Pumpi khanna ding; nuntak lupona ding leh cipha-in a kipun theihna ding a nasep ahi hi. Engine oil ii nasep bang lianin DNA loin, pumpi sung protein datte nungta nasem thei peuhmah lo hi.
Gene: Protein a pian theihna dingin DNA ii pumsung zatui kizelhsakna na a sem pen gene kici hi. Mihing pumpi sungah hih gene pen a phazah kibang loin bulpi [base] 1000 pan million bases dong pha thei hi. The World Book Encyclopedia Namkimbu sung “Cell” a cihna sim lecin a dil a salin kicingtak na kigen ding hi.

Thukhupna:

Hih thukhupna pen kei’ awmsung thusuak hi a, DNA a tomin “nuntakna nei khempeuh, a diakin mihingte in i nu i pate i sut theihna dinga Pasian in i pu Adam leh i pi Eve sung pana a na piansak a kizom suak hi-in pumpi sunga-om mel hong kisunsak thei zatui hi, ci-in ciamteh ding hi mai hi.

PS: DNA in pumpi sung mun khempeuh ah omin, samzang dawn, bawtui sung, mitnai, khutcin dawn, nakkhem, bilkhem, zun sung, ek sung, sisan sung a om lohna om lo a hih manin nunga Thailand-a UK mi 2 pen Burmese mi 2 in suamlum, cih tawh kisai-in a numeinu pen a suamlup ma un buan hi, cih thu hi a; tua nu’ van kawma om, bawtui a sittelna uhna panin “Asian DNA” hi, a kimuh khiatna pen Korean newspaper ah zong hong suaksak sawn hi.

DNA thu a sulzuih, scientist-te in mit tawh muh zawh loh, pumpi sungah hi banga kikaipaan, cilesate kilamin om, cih lungngai uh a, pianngei [natural selct] tawh a pian theih peuh mah ding, hi sa thei mahmah lo uh hi. Pau Gin Mang