Dahna Pulakna: Mangpha Pa Pum Suan Mung

Dahna Pulakna: Mangpha Pa Pum Suan Mung

Arizona State, Phoenix khuapi a teng, Zogam pan Cingpikot khuami, Kawlpi khua a khangkhia, Pa Pum Suan Mung (Suante beh) in Nov. 26, 2014 ni in, damlohna hang tawh, a leitung nuntakna hong nusiata hi. Pa Pum Suan Mung in ahong nusiat laitak in kum (50) acing pan hi a, US gam ah peemta dingin ahong tun’ zawh kha (3) kimkhawng a cingpan ahi hi. Pa Pum Suan Mung in a it mahmah a zi, Nu Nian Ngaih Lian leh a tanu (3), a tapa (1) hong nusiatsan ahih manin, nakpi takin kikhasiatpih hi.

Pa Pum Suan Mung hong nusiatna hangin adah akap, a zi a tate leh meeltheih tanaute, a khuapih tuipihte leh a pawlpi mipihte, khua leh tui kipawlna Zomi Innkuan Arizona kipawlna tawh akibang in, Zomi Innkuan USA Executive Committee pawlzong nakpi takin kidah a, kikhasiat lawh mahmah hi. Adiak in, US gam ah peemta in nuntakna athak a kipan ding a kithawi kimlai, khangcing nailopi in hong nusiatbek hilo, zi leh tate lungleng khuangai dingin hici bang tuahsiatna kituahkhak pen lamdang kisa a, kidah phadiak hi.

Pa Pum Suan Mung tawh hun nunung pen Phoenix Zomi Christian Church pawlpi innteekna tawh Dec. 02, 2014 (Tuesday) ni, sunkim nai 12:00Noon in kibawl ding a, hanmual ah kikha ding hi.

Pa Pum Suan Mung hong nusiatna hangin adah akap lungleng khuangai a om laizom u leh nau, nu leh pa, lawm leh gual khempeuh anungta Pasian in hong hehnem henla, adamlai teng cidam takin nisim mabante ah thupha leh thathak tawh a kalsuankik zo dingin ahong siamna ding thu ka ngen uhhi. Dahna tawh; Executive Committee (Zomi Innkuan USA, Inc., Tulsa, OK) December 1, 2014