Muvanlai leh Ak thu
Pasal khat Sabeng in gam sungah pai hi. Gam sungah Muvanlai a tui tang khat mu in pua aa, inn a tunteh Aktui lak ah koih in, Aktui te tawh hong keuh khawm sak hi. Muvanlai ahih hangin amah Ak kisa lel hi. Akno te tat dandan in gamta hi. Kha 6 a phak ciangin Muvanlai Ak pen golzaw hi. Khatvei a lawm Akno te tawh an zong dingin kuan khia uhhi. Muvanlai Ak in vantung lam a et leh vantungah Muvanlai tanglo in aom mu hi. Muvanlai ak in Muvanlai ahih lam theilo in a lawm Akno te kiangah hua bang ahia ci-in dong hi.
Akno penin hua pen Vasa te Kumpi muvanlai hi cihi. Amah pen vantung sangpi ah lengto thei in tua lai panin ei Akno te hong mu thei ban-ah ganhing Gul khawng, ei akno te zong hong ne thei hi cihi. Ak pen Pi guk (6′) tung leng ngeilo ahih manin tua Muvanlai no inzong Pi guk tung a leng thei dingin ki ngaihsunlo hi. Amah leh amah ki tel hileh Muvanlai ahih manin vansang dawndong a leng thei ding ahihi. Ei leh ei ih ki telloh manin sangpi a ki tung zolo hi thei ahih lam hong musak hi.
Sangpi a leng thei ding dinmun leh gam ah Zomite ih om hangin Akno te lungsim danin sangpi a lengzolo dingin ki ngaihsun khat thei hihang. Pasian in sangpi lenzawhna ding gam leh nuntakna tha hong pia khin hilo ahih hiam? Khangno laisin laite aw lungneu peuhmah kei un. Sangpi lenzawhna ding dinmun leh laite sin hilo na hihiam? Nupi Papite aw…ih tate Sangpi a len zawhna ding gam-ah om hilo ahihiam? Thupha piapia in Thalak pih ni. Zingsang sangkah a pai ding simin na khut a lu tungah nga in Thungetsak dingleh Thupha piak ding haksa sa ken. Nang dinmun niam kisa lo na hiam? Niam ih ki sakleh ih pattah theih ding Tate om hilo ahih hiam?(heh dektak mawk ing ee).
Khanggui ki zom pai suak mipil ulian tam hetlo hi. A hanciam mite Pasian in tonpih hilo ahihiam? Ta te tawh hun ngah ngeilo liangin na sem kha ken. Ta te in Nu leh Pa aw…na hun minute 30 bekbek nong piazo ding hiam? Hong cih hun om kha thei hi. Nang tawh hun nuam Ta te in zangh khawmnuam hi. Pilna zongin pilna in mite pilsak ahih manin Thupha a bawlbawl hilo hiam? Na theihna sunsun cilbawl ken. Sangpi lenpih zawh sawm in. Sangpi na tunzawh sawmleh Pasian tawh ki zopna a hoih semsem kul masa hi. Pasian in Sangpi lenna ding din mun ah hong tung sak bek hilo matutna hong pia nuamlai hi. Jesus na mangilh hunhun in lungneu na, lung kiatna tawh na ki dim dinga Satan a nuih maisak na hihi.
Hih tangthu ka zakna tung tawn panin Zomite tungah tangko khiat nopna hong suak lua hi. Pawl khat thalak khop ding kong tangko khiat thute a hoihlam in na simsak un. Thumanpha ahih nakleh a im cip theilo pa hi cih hong na ciamteh un. Lungdam.
Thawn Tuang
April 29,2015
www.zomi-angvaan.blogspot.com
Comment piaknop aomleh...