Lungdamna mangngilh kei ni ~ GS Pau

Lungdamna mangngilh kei ni

Ei mihingte in I cihtheih sim ciangin, I tunga thupha hong bawlte’ tunga lungdam koh kik ding kimangngilh kha pahpah hi. Tua hi a, tuni in, a beisa hun leh kumte a I tunga thupha hong bawlte’ tungah, ahithei zah in lungdam koh ding hanciam leng I ci hi.

Mikangte ’paunak ah, “Na lungdamna mangngilh ngei kei in” cih khat om hi. Kawlte’ paunak ah, “An kam khat bek nek ngei nangawn lungdamna mangngilh ngeilo ding” cih khat om hi. Ei Zomite’ paunak ah zong, “Ciimnuai a sa kibak, Geltui ah kithuk” cih khat mah om hi. A cihnopna a kibang vive hi a, lungdamna mangngilh ngeilo ding, hun lem peuh teh thukkik hamtang ding, cihna vive ahi hi.

Pasian tungah lungdamna mangngilh kei ni:
Pasian in “A lungdam thei lungtang” deih hi. Late (Psalms) Lai Siangtho gelhpa in, “Topa in kei tungah hong piak thupha tam lua ahih manin bangci thukkik zawh ding ka hi hiam?” na ci ngiat hi (Late 116:12).

Nu leh pate tungah lungdamna mangngilh kei ni:
Leitung ah kumpi, mipil, mi minthang, mi khuasuak I cihte pen nu leh pa a thupi bawl, lungdamna a thukkikte vive ahi uh hi. Tate sung pan uzaw leh nauzaw tawh kisai loin, pianna nu leh pa a don, a kem peuhpeuh a nahlawh pek pah lel a, nuamsa pah lel uh hi. Tate pawlkhat in nu leh pa tungah a hehna teng uh phul niloh thei mawk uh hi. Tua bang mite daupai ngeilo uh hi. Tate in nu leh pate tungah itna leiba tampi mah kinei hi. Tua ahih manin I leitung pasian ahi nu leh pa tungah lungdamna mangngilh kei ni.

I sia luite leh makai luite tungah lungdamna mangngilh kei ni:
Pilna I ngah nading in eite lai hong hilh ngei I sia luite leh I makai luite’ tungah ahi zongin, lungdamna koh ding mangngilh kei ni.

Ei’ tunga thupha hong bawl ngeite’ tungah lungdamna mangngilh kei ni:
I neu tung pan hong makaih I ute, I sangkahna hong ente, nasep hong guante, nasep kipat nading sumbul ding hong piate, gamdang ah hong puakte, nuntak nading lampi hong honsakte, hih dinmun ciang I tun theih nading in thu leh neihsa tawh hong panpihte, I zin tunna innte, I nek I dawn ngeina innte khempeuh tungah lungdamna mangngilh kei ni. Hun khat peuh teh lungdamna thukkik hamtang ni.

I haksat hunin hong huhte’ tungah lungdamna mangnhilh kei ni:
Israel kumpi hong suah ciangin David in haksatna a tuah lai in amah a don a kem Jonathan tungah lungdamna a thukkikna in ama’ suan leh khak sung pan a khebai Mefibosth, kumpi inn ah samsak a, a khan tawntung kumpipa’ sabuai tungah an nesak ngait hi (2 Sam 9).

Zomite pen hong kihuhhuh ta leh a lungdam thei mello, a deihbeh totote I hi pian hi. I u I nau khat in hong hehpih in hong huh teh ahi ding mah hi kici ziau a, kam bek tawh ahi phial zongin lungdamna kigen nuam hiau lo se hi. I nuntakzia tawm hong lem pian ciangin I haksat hun lai a hong huh ngei, hong buaipih ngeite khawng a thei nawnlo peuh I kineih thei hi. Mailam ah tua ci nawn kei ni.

GS Pau’ gelh kitomlak ahi hi.
Lungdamna Aw, July 2014