Sangnaupangte leh Alu thu gentehna ~ David Thangkhek

Sangnaupangte leh Alu thu gentehna ~ David Thangkhek

Khatveilai in Sang sianu in naupangte kiangah hibangin thuhilhna khat nei hi. “Naupangte aw zingciangin na lungsim sung uhah midangte na muhdah zahzah uhtawh kizui-in ippi tawh alu hong pua ciat un. Mikhat na muhdah leh alu pumkhat, mi sawm na muhdah leh alu pumsawm hong pua un.’’ ci-in vaikhak hi.

Tuamah bangin sangkah sangnaupangte in alu hong pua ciat uh hi. Pawlkhatten pum tampi pua in pawlkhat ten tawm pua in ipkhat ciat tawh sang hong kah uh hi. Tua dantawh nisim in amau alu puakzah ciattawh sangpai sangciah den uh hi.

Asauvei tak ciang in tua apuak uh alute hong muat in hong namsia ta hi. Alu tampuate anam khauh a tawmpuate lailawm zawdeuh hi. Tua ciang in sianu in sangnaupangte kiangah alu muatte paikhia dingin a sawl hi.

Tua zawhciangin sianu in sangnaupangte kiangah thuhilhna deihna hibangin hong gen hi. “Nisimin alu pua in sang nong pai uh mah bangin na lungsim sung uhah midangte muhdahna (lungsim hoihlo) na neih zahzah uh apua na hiuh hi.’’

“Tua muhdahna (lungsim hoihlote) paikhia loin na puakpuak uhleh lungsim gim in na tawl ding uh hi. Asawtna ciangin tua muhdahna (lungsim hoihlote) alute mah bangin muat in hong namsia ding hi.’’

“Tua ahih manin sangnaupangte aw kimuhdahna (lungsim hoihlo) te alu bangin muatsak loin pai khia pahpah leuhcin lungsim siangtho in na tawldam ding uh hi.’’ ci-in thuhilhna a nei hi.

Nanglehkei zong hih thuhilhna mah tawh kituak in ih nisim nuntakna ah lungsim hoihlote paikhia a lungsim siangtho, lungsimhoih-lungsimpha nei in nungta ciat ni. Lungdam, David Thangkhek – Zomi Daily