Ahoih bek bangzah ciang (Equilibrium)? ~ DK Khup

Ahoih bek bangzah ciang (Equilibrium)? ~ DK Khup

Ahoih bek bangzah ciang (Equilibrium)? Minam Kideidanna (Racism) maw, ahi ding ngeina dan (Common Sense) hi zaw? Leitung ah ahoih bek ding zah (equilibrium) muhdan akibatlohna hangin buaina ahunhun in piang thei zel hi.

Minam mimal tamzaw khat, kipawlna lianzaw khat in amau mi, minam atuam in panpih, deihsak tuamna gen, semkhia tuam leh minamdeidanpa/nu, minam deidan pawl kici pah in ki ko bawl thei pah hi. Minam neu sungpan khatpeuh, kipawlna khatpeuh in amau minam panpih, deihsak tuam, guptuam in, minamtam zaw te a ut ut in agensia, adeidan zong minam nasem, minam it-pa in kiciamteh veve lai hi. Mikanggam a mikang ten minamdeidanpa/nu cih a ngah uh teh naasa, utlo, kisuang phadiak hi. Tualo gamdang, minamdang ten bel olmawh in kikoih lo lel in mu ingh. Tua hang in minamneute a ding mikanggamte nop akisaknapi khat hi pah in mu ingh.

Theihna, siamna zui in sang lutna akiciangtanna US sanghoihpen ah Obama in apa mivom ahihna zangin sang lut kha kici hi. Anu mikang hihna zang leh lutkhalo dingdan hi. Minam en in lutna aciangtankhat akipiakna zui in mivomte alut zo kibehlap a, mikang leh Asia mite alut zolo tuam om pah hi kici hi. Mikang pawlkhat in theihna, siamna zui hilo, mikang ahihna uh hangin minam deidan thuak ungh ci-in lungkimlo om hi. Asian sangnaupang pawlkhat anu, ahih kei leh apa Asia mi ahilo a hih uh leh Asian kici nawnlo in minamdang hihna pom in lutna siau ta uh hi.

Theihna, siamna zui hi leh Asia mi tampi lut kha lua in, US ah aminamzah ( population) tawh kituaklo lua in tamlua uh hi ci in alangpang lam ten mu hi. Aminthang American football, basketball team cih te ah akihel khate kumkhat in sum million tampi sim in sumlut a ngah pawlkhat om hi. Akimawlte en leng mivom atamzaw hi den phial thei hi. Asia mite team khat ah khatta bek guang hamtang hen aci ki za nailo sam hi. Siamna zui bek in ki teel cihna hi ding hi.

Khutdawhngen khat ahi phial zong mikangkhat ahih leh ki zahtaakna ciang khat om leh kilawm hi. US mivom miminthang numei Billionaire Oprah Winfrey, Europe gam sai sung khat ah handbag tamman khat a et sawm leh tammanlua ci in vanzuaknu in ensak nuamlo ci-in Oprah in genngei hi. Minam deidanna maw, ahih kei leh ahih dingdan ngeina ( Common Sense) hi zaw ding?

Vanzuak, mipi tawh kizopna atamna mun ah mipi dawn ding nungak melhoih maitai khat, melhoihlo maigummel khat sang kicial masa zaw kha ding hi. A nih un ahihna uh apiankan hihna tuak hi leh, kideidanna maw, ahih kei leh ahi ding mah ngeinadan hi zaw? Siamna nei, vaihawm mapandan asiam company hauhna, shareholders te’ hauhna akhangsak CEO pipi te pawl, laitannpilnasang tawh nasemte khasum tampipi, bonus tampipi kumkhat in kipia thei hi.

Khua-ul luangliangin thataangsan in nasem laitan pilna nei mello pawl naikhat $15 kipiak ding company khantosaklo zaw, nasemcialzah kikhiam ding cihdan thu pawlkhat tawh makaibul, sumbulnei, ukna thunei lamten hamsa sa mahmah lai uh hi. Working class te deidanna maw, ahi kei leh sumbawlpaizia zui in ahi ding ngeinadan zui hi zaw?

US leitang ah Mikangte aphualsatma in a om Native Americans te kumpi thunei lam in atuam in ki-uk tuamsakna cihdan hamphat tuamna tuamtuam pia uh hi. Tu dong mah innteek hihna tuam neih nuam deuh hi. Gamhau tuamtuam pawlkhatte dan mah in US zong mikangte vaihawmna nuai ah a hau, akhangto hi cih a nialte bel thutaak siiksanlo te cih pelmawh pah hi.

Mikanggam, mikangtamzawpeek tenna US ah mivom leh mikang kihel President Obama zi hihna tawh Innkangpi sungah a om kha ngei mivom Michelle leuleu in saalte thataang tawh kilam innkaangpi sungah a om pen kisialhpih kik zaw dan in gen ngei hi. Tu hun teh apu apa saal in a om ngei zong ahilo zanmah in mivomgamte pan a peemta mivom tampi tak US ah ki innteeksak tam pah thei hi. Innteek dinmun zong nei zawhna ciang zong om pah thei mah hi.

Ahi zong tuma kumza val laipeek in US gam ah lo lam, leisungpiangnate, meileenglam bawl in a peemta in US a zuan Sente i tu leh ta, asuan leh a khak tampi tak te tu dong mah “ Mangpau siam si cia, China pan manglai sin ngei hi ni teh maw” cihna tuakkha pahpah lai uh ki ci hi. Khang tampi a teng khin Asian mite US ah tu dong mah lengla taang lai uh hi. Kideidanna maw, ahi ding ngeinadan hi zaw?

Ahoih bek bangzah ( Equilibrium) cih ciangtanna mipi husa alianlam, mipi panpihna atamzaw lamlam ah akiheihei zel leitung ahi hi. Pa Do Khan Khup