Myanmar Court in David Lah tungah Bail pianuamlo in nawlkhinsak (Updated news)
June 7: Buaina kibehlapna ding ahih kei leh tangpi tangta kilem lohna ding a piangsak (controversial) Myanmar gam-a piang Canadian citizenship a nei pastor David Lah in Covid-19 lockdown thukhun palsat in kikhopna a makaihna hangin matna tuak a, June 3 in Yangon Court ah a vai tawh kisai genna (court hearing) masa pen hun in Yangon Court judge (sitni) in thukhenna a kibawl ma-in tawlkhat sung a suahtak theihna dingin bail piak kisam lo hi ci-in bail pia nuam lo hi. Court in a mawhpaih leh kum thum thongkia thei ding hi ci-in media reports in gen hi.
David Lah in 2013 Natural Disaster Management Law thukham palsat in April kha-in Insein kihel in Yangon khuapi sung mun li ah church services a makaih manin Covid-19 natna a ngah banah a nungzuite Covid-19 natna kiban lawhsawn sak hi ci-in media reports in gen hi. Covid-19 natna a ngah man in ni 21 sung quarantine in kikem in a kikhumcipna panin a kikhahkhiat zawh May 20 in matna tuak hi.
David Lah leh a kithuahpih mi dang thumte in March 13 ni panin Covid-19 dona dinga thukhun kikoih 2013 Natural Disaster Management Law palsat in mihon kikhopna a makaih manun hih thukhun nuai-ah a kimawhpaih leh kum thum sung thongkia thei ding uh hi. Court hearing kik zing ciang i.e. June 8 in a vai uh court ah kigen kik ding hi.
David Lah in a thugenna video a kizeel (viral) khat sungah Jesuh Khrist a um taktak Khrist sunga omte in Covid-19 natna ngah lo ding uh hi ci-in biakinn a kikhawmte mai-ah gen napi-in amah leh a nungzui pawl khatte in Covid-19 natna ban ngah henhan uh hi.
David Lah in biakna dangte thu upna leh thusan zia thuakzawhna a neih lohna (religious bigotry) a genna social media ah a kizelh ngeingai tawh kituakin Myanmar gam-a Khristian makaite in Covid-19 dona ah kipumkhatna ding thu tangkopih in ngen in kunh uh hi. Canadian pastor Lah pen ngaihsutna dang neite tuam bawlin ama ngaihsutna khauh (polarising views) a neihna a paipihna hangin buaina ding leh mipi kilem lohna ding a piangsak mi (controversial figure) hi. Neih kibangte a langpanna leh Islam biakna simmawhna leh gensiatna kampau (anti-LGBT and Islamophobic rhetoric) a zatna hangin gensiatna a tuak den mi ahi hi.
February kha-in Naypitaw ah Lah in kikhopna a makaihna ah Pentecostal Church member Vice President Henry Van Thio zong a kikhop manin Covid-19 pandemic hun in kumpi ulian khatin lockdown thukhun palsat in a gamtat dingin kilawm lo hi ci-a gensiatna hong khauhpai luat manin David Lah’ thubuai hong nasia diak hi. Ahi zongin kamphatna tawh Van Thio in Covid-19 natna ngah loin negative hi.
David Lah in Insein leh Mayagone townships ah church services a makaihna hangin mi 71 in Covid-19 natna ngah uh hi ci-in David Lah tawh a natna ngahte in kizop khakna (link) nei uh hi. Myanmar Covid-19 count latest data ah mi 270 positive lak panin 78 active case, a si giat leh a dam kik 156 om hi ci-in Covid-19 Visualiser data in ciamteh hi.
CARDINAL IN PROSPERITY GOSPEL PANIN KIDOP DING HI CI-IN WARNING GEN
Yangon khuapi-a Cardinal Charles Bo in nisuahna gam (East) ah Christianity biakna kizelhna dinga dalna gol pen a piangsak hauhsatna leh thupha ngahna ding bek ultungsak a kigen Lungdamna Thu (prosperity gospel) hi ci-in warning gen hi. “Nisuahna gam-ah Hinduism leh Buddhism biakna cihte biakna ngeina zia (religious tradition) in nuntak nuam; nopsakna (luxuries) sumh ngam in piakkhiatna tawh nuntakna mawkmawk (life of simplicity) zat ding kalh uh hi. Nisuahna gam-ah Christianity biakna pen Nitumna gamte’ market model bangin ngaihsun in prosperity gospel bangin mi tampite mu uh ahih manin nisuahna gamte biakna ah pilna leh nuntakna mawkmawk ngahna dingin bangmah hong pia lo hi,” ci-in Cardinal Bo in gen hi.
May 31 ni-in Pentecost Sunday sermon ah Cardinal Bo in hauhsatna leh thupha ngahna ding thu ultungsak a thugente (prosperity gospel preachers) in thusuak ngah in kamsang in maangmuhna genna leh kamtuam paunate (prophesies and speak in tongues) nak zat lua uh ahih manin Kha Siangtho a khengval in zangkhial (abuse) uh hi ci hi. “Prosperity gospel thu gente in Lai Siangtho pen hauhsatna (prosperity) ngahna ding hi ci-in kamciam khum dingin zang uh hi. Amaute in Pasian in na lunggulhnate uh leh na deihnate uh hong pia ding a, bank ah sum hong pia ding a, cidamna hong pia ding a, innkuan sungah khantohna hong pia ding hi ci-in ciam uh hi ci-in gen uh hi,” ci-in hih banga thu gente pen “mega pastors” hi uh a, “mega churches” bek-a thugen nuamte hi ci hi.
Cardinal Bo in, “Prosperity gospel thu gente in theology khaici gen uh hi. 100 dollars khaici ministry adingin na tuh (piakkhiat) uh leh Pasian in a gah 1,000 dollars hong pia ding hi ci uh hi. Christianity biakna pen dahna, lawpna, lungkiatna ahih kei leh lungdamna hong pia thei kimawlna (emotional rollercoaster) hilo hi. Nisuahna gam lamte in Christianity biakna nawlkhin in a kipelhna uh a hang tampite lak-a khat pen Christian missions kicite thawmging leh a billaphuai thawmgingte tawh kizopna nei hi,” ci-in kum 72 mi Cardinal Bo in gen beh hi. Source: Union of Catholic News Asia (UCA) News @ Thang Khan Lian #ZUNs reports
Comment piaknop aomleh...