Banghangin lungsim picing thei mahmah lo? ~ Awn Za Pau

Banghangin lungsim picing thei mahmah lo? ~ Awn Za Pau

A Kawlgam a Vaigam tawh tehkak in gen naii kei phot zawzen ni. Bang hangin Zogam ah Ciimnuai Zomi tate ih muhna ih ngaihsutnate ih lawmdangte sang’ in picing zo lo zaw sese ih hiam? cih a hang’ a bulpi ding ka kankan ciangin, minam zui a ih luah suksuk picin lohna zong tawmkhat a kihel phial kha ta zongin, ahong khaktan pipen in anuai a thute hang hi ding in ka um hi.

Picing lo ih cih ciangin nampi lungsim ulian lungsim kivom zo lo cihna ahihi. Tua ih cih ciangin ih cihnopna bulpi in gam leh lei leh minam bup a’dingin lungsim veina leh deihsakna kineithei zo naii mahmah lo in angsung vaii bekbek mah tawh nitum cihna ahihi. Tua bang ih cih ciangin kipawlna khat peuh ah ama deihna khat peuh kizui kei leh a langpan pah vaivai a nuaktai pahpahte zong khat in kihel ding hi. Kipawlna bup minthan nading sangin mi khat kia in minthanh lawh ding cih lungsim toi lungsim kawciik neihna zong ahihi.

Sila lungsim ahi.. ei leh ei makai khat in om leh kithusimh nuam peuhmah lo in deidanna a tuamtuam kinei aa, mi namdang khat peuh hi leh thupi ngaihsut zaw kizui nuam zaw sese cihte zong ih picin lohna lianpi khat ahihi. Makai sunsunte’ ngaihsutna leh ih khuasak ziate ah Chin/Zomi minam bup aa phattuam nading cih thadah, Ciimnuai Zomite’ mailam kalsuan zia ding na-ngawn muhna leh sephuai nate kisem kimu thei zo naii mahmah lo in, ei leh ei sungah kinawngkaisak zo khop bektak ding ciangbek mah, kimu thei kisem thei zo pan bek hi, cihna ahihi.

A diakdiakin Zomi bup (Chin) sungah eite diakdiak ih kisap mahmah phat diak pen, khat leh khat kimuh khialhna kitotna kibuaina a tuamtuamte ah ih sanggam dangte bang lo in, ih kinuak suaksuak thei lai mawk hi. Kilangpan suaksuakna ih nei thei mawk hi. Amaute pen zukham sul a kitawng kilaii kisihsuah dekdek liang uh ahih hangin, a zingciangin ngawng kikawisa in vakkhawm thei kik ziauziau uh hi. A lungkim lohna uh kisiansuah kik thei pahpah uhhi.

Hih santak ah banghang a tua bang lungsim na vom thei bilbel uh hiam cih ka ngaihsut kikkik ciangin, nidang a ih Sangmang masate in, amau gam a naupangte a pattah dan mah a, Haka lam a Christian masate na pantah masa a tua bang dan a, kiciing suaksuak a hi kei nam ka ci simsim hi. Tua bek hi lo in, 1977 kum Haka ka tun cil pek a kipanin Haka nungak tangvalte Manglaam in a na laam ngeekngeek thei vive ngentang na hi khin mawk uhhi.

Eite zong kam kinialna khat leh khat khut khialhna baan khialhna a om ciangin, tua mah bangin khat leh khat kimu kik in a thu a la kidam kup kik leng hoih hi. Ei leh ei a hih theih kei leh zong mi thukhual mahmah ih sakte mah koh bawlin kimu kik in thu kigen kik tangtang leng, kua mawh hiam kua tang hiam cih zong hong kilangh pah ding a, thuumna leh maisakna zong kibawl zo lai leh ni dang sangin zong ki-it zaw lai ding hi hang.

Zo gam ah kum 20 sung ka om sungin ka phawk mahmah thu khat ah ei lamte in gam leh lei, khua leh tui leh minam ading ih cih ciangin, a tung a ih pulaaksa om mah bangin Tedim uksung khempeuh zong a huam zo sak lo kitam mahmah lai mawk hi. Ih ngimna leh khuamuhnate tangzai zo lo in, Zo mibup ai ding ih mu thei kei hi. Ih muh loh mah bangin ih mipih ih lawm dangte thu leh ngaihsutnate zong kan dingin ih tuat kei hi. Zo mibup tawh koici kalsuan khawm ding, ih kalsuan khop theih nading leh ei mau mahmah a makai a lutang a om theihna dingin koici vaihawm huai cih ciang dong zong ngaihsut in kinei kha kei mai leh kilawm ka sa hi.

Tua ding hi lo hi. Ih vahna ih ciahna khempeuh ah mikang pau in politics kici gam leh lei ih minam bang cih leng khangto ding cih ngaihsutna lungsim vom a, ih kim ih paam ih tel theih ih muh theih pahpah ding kisam hi. Ei a’ding bek ngaihsut in nei lo in mite ngaihsut dan ding zong seh theih huai hi. Ih kikeelkitnate akinaii theithei a ngaihsut ding leh, khat leh khat a kulna munmun ah ih kitheihneih ding ‘give & take’ ih zat siam ding zong kisam mahmah ding hi.

A khatna: Etteh Taak Ding Hero Kuamah Om Naii Lo

Akhangto khin a khangto laitak a khangto naii lo gam akipan gam khempeuh in amau gam ading ciat, suah takna ngahna ding ahi zongin gam khantohna ding ahi zongin, ama pumpi lungsim khempeuh kipia a gam makai hero pi khat tek ki-nei tek hi. (Gentehna in Kawlgam aa’ dingin General Aung San)

Tua mah bangin gam khat sung a om minam neuneu a tuamtuamte in zong, a mau minam ciat ah nopsakna phat tuamna a ngahna dingin, makai vaihawm minthang khat ciattek mah na nei kawikawi uhhi. Tua a makai vaihawmpipa pen hero pi in nei in, ama vaihawm siamna leh kipiak ngamna te etteh pah uh aa, zompaih suaksuak pah uhhi. Ama nungah makai semte in a gam a lei khan toh semsem nadingin lam thak a tuamtuam zongin hong hahkat semsem pah uhhi. Ama sep zawhna kipiak khiatna tungtawnin tangpi tangta in zong zahtaak takpi pah uh aa, vaihawmna khat peuhah thu kimang diamdiam pah uhhi.

Ei Ciimnuai tate lakah tua bang a, ih minam bup a makai minthang ih hero pi ding tuni ciangdong kuamah a om naii kei hi. A om sunsun dia kithawite zong minam neu khat a’ding, khua leh tui leh beh leh phung sung ciang bek ahihi. Tupna gelnate township level zong a huam zo naii lo kitam mahmah lai hi. Mi nambup veina tawh a nuntakna sihpih ngam a luangkham ngam makai khat zong ki-om naii het lo khong hi.

A kipan sunsun nih leh thum ih om tei hangin, gualzo paisuak taktak naii lo aa, a gah ih nek naii loh ciangin hero pi dingin min kivawh thei naii taktak lo deuh leuleu hi. Gentehna in: Kei mimal muhna leh kei phawkkhak pak na ciangciang ah Lt Col Son Khaw Pau, Sgt Thual Zen, Pu Thang Lian Pau leh ZNC (Zomi National Congress), tu’n ZCD (Zomi Congress for Democracy) makaipi­­­ Pu Chin Sian Thangte pawl in ama aituam nuntakna phattuamna ding nusia liangin, hangsan tak in gam leh minam aa ding kipiakhia ngam hi ci’n ka mu hi. Pu Chin Sian Thang in a mah bek hi lo in a ta leh a naiihuai teng khempeuh in thuak lawh pih dikdek lai uhhi. Luang khaam liang aa, a kipum piak ngamte lak ah hong nuntakpih lai Pu Chin Sian Thang leh Pu Thang Lian Paute bek mah om lai ahih manin, matutna leh gah hoih gah phate hong gah khiat theih nading in thu nget sak ciat ni.

Tu hun ciangin amin in kipawlna atuamtuam a munmun a ciangciangah kitam mahmah nianua hi. Tua kipawlnate in zong, vaii thupi khat om leh kuamah ki-khaam ngam lo in mi khut aa gul man nuam vive lian tawh ih kibang hi. Kipawlna sung aa min leh zate sazukki puak in kipua lianluan bek aa, gam leh minam tawh kisai thupi thu lian sep taktakna ding a om ciangin, kuamah makai ngam mahmah lo zel hi. A makai thei taktak ding zong om lo lai mai ding uhhi. Kipawlna khat leh khat zong ki-nahvawhna om het lo lai mawk ahih manin, makai dingte a’ dingin, kipanpihna kitawsawnna om lo pah phot hi. Tua ahih manin, kipawlna khat ii makaite in amau omna tatna mun ciat tekah mit phe khepkhep in na op khekha tek lel mawk uhhi.

Tua hi a, tu dong mah ih kisapna bulpi pen in makai ih etteh ding, a muantaak kuamah om naii mahmah lo ih hih ziak mah hi pi pen hi. Ih gam ih lei khantohna dingin bang teng sephuai cih geel kholhna leh thu khun ciaptehna zong om tuak meel lo mai hi. Hih makai etteh taak ding ih pian zawh nai lohna in, tua bang a makaih theihna ding athu in hong zawn naii lo maw? A hong zawnzawn kimlai pi mah ei lampan akipia khia zo kua mahmah a om naii lo ahih hang maw.. cih ei leh ei kikantel phot ding kisam hi.

Hih bangin etteh tak makai khat a nei hi leng, makaite thu khempeuh zong a tamzaw in ih zuisiam thei pah ding a, kipumkhat theihna ih nei pah ding hi. Tua kipumkhat theihna ih neih ciangin, kiphumkhatna ii hoihna leh gualzawhna a gah ih ciam ta ding a, tua agah ih ciap khit ciangin liim sa in ih kipumkhat thei semsem ding hi. (Mai lamah khangno gam leh lei ki-ukna ding vaii – politics a lungtu zaw hiatte in, Political Science leh Law lam khawng nong zuih ding uh kong hanthawn nuam hi.)

Anihna: Tiddim In Township Level Ciang Bek Ih Ngah Man Hi

Tedim khua Tedim gam pen Vuandok khutnuai Vuandok uksung (Township level) ciang bek in hong uk man hi pi pen hi. A zenzen in Mangpiza zum tutna khuapi khat hi leh (District level) hong uk uliante thunei uliante zong Vuandok Mangpi vive hong tam pah ding hi. Tua uliante khutnuai mahah ki-naiitak in tavuan nei Myo- oke, Lai-atpi za nei tampitak ki-om pah ding hi. Kumpi ukna sungah department tuamtuamte zuih ding thukhun leh pelh ding thukham a tuamtuamte zong zungthuk hongkha zo pah ding hi. Cih nopna ah kumpite in a munmunah hong ukzo pah dipdep ding hi. Tua bek hi lo in zumkah zum tuak leh khualzin gamvak hong tam semsem ding a, nidang a ih kim ih pam gamtat luhek, mi vak miciah leh thu leh la ih zak dan leh ih theih dan zong hong khangto mahmah semsem ding hi.

A shark in a fish tank will grow 8 inches. But in the ocean it will grow 8ft or more. The shark will never outgrow it’s environment and the same is true for you. Many times we are around the small thinking people so we don’t grow. Change your environment and watch your growth.

Zo gamah Tedim uksung pan Tonzang uksung, Cikha uksung akituam khen khit na-ngawn in Tedim uksungah mi lusih a tam pen mah ih hi lai veve hi. Tonzang uksung leh Cikha uksung a pian ma in kitam mahmah kan zaw lai hi. Tua pen Vuandok za khat in hong uk bek suak mawk hi. Vuandok khat bek in hong uk ciangin kumpi lam pan zong departmentte ah milian tampi hong kihel zo lo pah phot ahih manin, department tek a kipan a munmun a ciangciangah, hong uk kim zo lo hong ban kim zo lo pahphot ahihi.

Gentehna-ah: Falam pan a khangsiah Paletwa uksung dongin singkung itna singkung thupitna na thei uhhi. Singkung a kem uliante’n na ukzo pah uh hi. Ei Tedim gamah singkung itna meel theilo in a no ih suan loh banah, a kung abul pan phuk in a selthuah ding in ih hawi nawn kei hi. Tua bek thamloh in a zung na leng tawh ih bullot lai tazen hi. Eimau te-ekhte-ekh in khawlmun khat peuh aa, a lim ih belh gegu singkungte na-ngawn, khut thak thoihna in nei in ih sat liam hamtang thei lai hi. A hiang na leng ih khiaktan thei lai mawk hi.

Ih Zogam dangte singkung it zia pen ei aa’ tawh kikhai mahmah hi. Mindat kum li ka om lai (1973-1976) in ka lam nasemte phalbi kipat ciangin mawtaw lampi sak leh khang pi 5 zai ding ka vaat sak hi. Mawtaw lampi lai zang aa taakno po zihziahte na vaat ngam peuhmah lo uhhi. Lam sak kendang aa, a zung bek awh lai kingkiang apuksa singkung lian pawl khat ka Lambu pa sawl lohin na phuk na sattan ngam peuhmah lo uh hi. An sing a tom uh ciangin a baihsa sing keute a bei leh, singhing tungah kah tangtang in a hiang keute sattanin tom uhhi.

Hih pen gen taak kei si na cih khak leh hih bang a gamtatna in, ih lungsim gitnat lohna, picin lohna, ngaihsutna kawcikna, angsung bek ngaihsun aa duhhop huaihamna, gam leh lei it theihlohna, awlmawhna (awareness) neihlohnate akilanghsak cilna zong na hi pah hi. Ih luah tohtoh ahoih lo ih neu lungsim puak abupi himhim puah phat ding akisam pha mahmah gige ahihi.

Haka kum 10 (1977-1986) ka om sungin Chin State forest department ah a sem hong nusiasa U Hau Za Nang Kim Lai te’n makai in kum khat in singno kung 10,000 bang kisuan den hi. Tedim leh Tonzang lamah suan maw suan lo maw cih ka thei kei hi. A suan kei leh zong eimau tek in taang tha tawh taak pona ah taakno, hiang pona ah hiangno, pakngiam pona ah pakngiam, hai pona ah haikung haino ahih kei leh ahiang kisuan theite ahiang suan ding cih ahihi. An sing ding bang peuhmah pen ih suan kik tangtang ding kisam mahmah hi. Ih gam aa a piang lo Kawl pau in mezali kungte pawl bang Zogam ah suan leng khang baih mahmah aa, sing khul ding hi ta leh, a teh dawn ngeek, a paak ngum leh a gah na dongin kine thei lai hi.

Tu hun leuleu ciangin a nei zo a lei zote inh singkung phukna a nemtuam dingin, gas anhuanna vive ih zat kim zawk ding leh sing nemtuamna thukh bungte zong ih zat tek ding kisam hi. Khuapi khua neu aa om ih mite ih tel siam sak ding leh singkung itna lungsim a zung ih khaksak zawh nadingin ih mipite ih theihsak ding thupi pha mahmah kankan hi.

Tua hi a, Vuandok za ciang ki-ukna township level bek a ih om den manin, ih khua muhnate zong kawcik in tangzai thei mahmah lo hi. Ih bukmun ih khan theihna dingin lungsim picinna ih neih ding kisam hi. Ih khuapi mahmah zong a level hong sang leh ih lungsim picinna zong a sangto sak pah ding ahihi. Khuata vaii a beh leh phung bek tawh kalsuan a aituam vaii bek thupitsaknate hong kiam hong dai tuam pah ding ahihi.

Gen thuah toto lai leng, ih khuapi a neuna tawh kizui in ih ngaihsutnate mahmah zong kawciik in tangzai thei mahmah lo hi. Gentehna in 1970 bei kuan lai in Zo gam bup a zat dingin Taang leh Lia vaii leh Salai leh Mai vai issue pi khat college sangnaupang sungah hong piang bang khat hih tuak hi. Hih thu vaii ah ei lamte in ei a’ anih a zat hamtang ding bekbek mah in thukim hih tuak hi. Lawm dang ten anih zawzen in la kei un la, na deih zawkzawk Lia na deih uh leh Lia leh Salai, Tang na deih zawk uh leh Tang leh Mai zang ni a cih naleng zong ka theih khialh kei leh na thal nial zel uh hih tuak hi.

A taktak in ih sanggamte in zong Plain Chinte it ta teu hang ngai ta teu hang cihna zong hi khin tuan lo zaw a, Zomi veve ih hihna tawh khat leh khat kipumkhat theihna ding, hong kinaii sak thei ding cih deihna tawh hih thu hong vaihawmkhia ahihi. Tua bang thute ah ih khuamuh loh luat man, ‘political minded’ loh lawmlawm luat man hi kei leh ih thukim pah leplep ding hi zaw lai tah a, ka ci simsim hi. Tua ahih manin gam leh lei thu ah khuamuhna leh ngaihsutnate zong ih sanggam dangte sangin a tawm pen kum 50 bang mah a zekai zaw teu mah ih kha mawk zen ngeel kei tam ci’n ka ngaihsun hi.

Athumna: Biakna leh Leitung Thu Ah Pawl Tam Lua

Biakna lamah ahi zongin Leitung kipawlna khat peuhpeuh ah ahi zongin, a moi a khangham makai nuam kitam kik pha mahmah bilbel ta leuleu hi. Mi gam mi lei pan a hong pian khiatnate bul gen kik nawn kei leng, Zo gamah RC leh ABM, SDA, Methodist cih khawng hong tung masate lakah, adangte tua zahpi in kikhenthang nawn lo hi. ABM pan aka khia a ke tampi tak hong piang khia leuleu hi. A ABM sung mahmah zongah ZBC, ZBCM, TBC cih bangin Tedim, Tonzang, Cikha uk sungtengah kitok nawi ngeiingaii zelzul ta leuleu hi. Banghang hiam cih leh picing ngaihsutna kinei zo naii mahmah lo ahih manin, nu’ dinmun pa’ dinmun ah mapang in aki-leptuah ding sangsik in, a bulcin vive panin kikhen thangna hong piang thuahthuah ahihi.

Hih thu tawh kisai in a phat tuamna ding om peuhmah lo a hih manin, kua mawh hi.. kua tang hi.. cih kua mah ngawh ding a kisam tuan nawn kei a, eimau tek mah ki-ngawh zaw in mailam ah kizuun kipuah phatna teng aa ih neih theih ding thupi zaw ding hi. Pasian thu um Pasian nasem kici Pasian mizatte sung teng vive pan mahah, khat leh khat kilang bawlna leh ki-theihkhialhna nasia tak aa, a om ciangin, lungsim siangtho tak aa Pasian a um a bia te’ lungsim sungah Pasian a upna leh a pomna a zawngkhal sak a thakiamsak zaw semsem ih suah khak ding lunghimawh huai mahmah hi.

Hih a tung aa thute huhau in, a omsa pawl tuamtuamte na-ngawn hong khuituah, hong kilomsak thei ding makai kician ih neihloh kawmkal ah, ABM sung bekbek ah Convention thum bang aa hong kikhen sawnsawn ciangin, lungsim siangtho tak a, Pasian thuzui tampi takte’ lungsim ngaihsutnate leh, khat leh khat kithutuak kipumkhat aa ih om kimlai laitak mah in, hong susia hong supoi hong khenthang thuah dingin hawmthawh huai lo takin, hong piang thuah ta lailai hi.

Biakna vaii tawh kikhenna tuamtuam a om bek tham lohin, beh leh phung vaii leh akituam khen thuahthuah taak lo minam vaii ih ultung sak mahmah sansan ta dihdih hi. Pawl khatte bang inh, a Kawlgam a Vai gam leh Mikang gamah pawlcing hong kisak pian uhteh, bangkua phamawh panmun len ding khawng hong phuang kik san phapha uhhi. Khanglui lai ih Zo ngeina hi ci in, ngeina kemcing cih lamin ih la aa, beh leh phung nei lo aa, bangkua panmun nei lote a’ding bangin, hong maimial huai phial mawk hi. Ahih hangin keima aituam muhna tawh gen leng, a hoih ding tawh akibat tei hangin, kinen suahsuah theihna ding vive hong uang sak hong thapia sak tawh kibang hi.

Tua bang aa beh leh phung vaii ih ultungsak luat ciangin, pum khat sa khat ih suah theihna ding aa hong dongkholh sak mahmah thu khat ahihi. A taktak amau innkuan ki-apna a Pawlpi inh nopna dahna ah vaii khempeuh tavuan la peuh leh kicing khin mahmah kasa hi. Beh leh phung, sungh leh pu bek bulphuh aa, ih pai liang sang’in, ih ki-apna ih pawlpi bulphuh tek zaw leng, mai lamah khat leh khat a kuamah peuh, kipawlkhop nopna lungsim tha hong guan hong khangto sak semsem zaw nak hamtang ding ahihi. Mi a tam zaw phat tuam nading bulphuh lo aa beh vaii minam vaii bulphuhna a ven masiah, ih ngaihsutnate picing thei lo meek ding hi.

Ih sanggam Falam pan a khang siah a diakdiakin Haka, Thantlang gam uksungah biakna tuamtuamte ka-khia neunau lo in ABM mahmah zong a tam zaw tham mah bit lai dingin ka ummawh hi. Biakna lam pangpan en leng bel ahih leh ei leh ei kibuaipih pahpah zaw hi kei leng, mundang gammial nasepna ah sem tek ni cileng, a pawlpi in zong kitam het naii lo hi.., cih theih veve ahi tei ta zongin, zat siam naii lo ih hih manin, ih mimal a kinensuah suah sak mah tawh ih kibang hi.

Tua kawm kal ah Leitung thu ah zong kipawlna a tuamtuam tampi tak om khin zo ta aa, “Universal” min huam aa kipawlna a om ding bekmah in sam lai hi. Tua kipawlna te in, khat leh khat kizop kipawlna om lo lai mawk uh hi. Kipawlna khat peuhah panmun len ding a kiseh ciangin, a omsa kipawlna atuamtuamte bulphuh ding leh ahuam kim ding sawm masa lo – kikum masa lo in, Galkap kumpi arnar (Authority/Power) neite bangmah in pum seh ziauziau in kipawlna ih phut thuahthuah hi. ( LZI leh ZIUSA bel a lunglut mi kimkhatte teel hi kik bilbel hi.)

Hih kipawlnate in Standing Committee dan khat ahih tei sam hangin, khasum sang aa hunbit nasem ahih loh mah bang in, tu ciangciang akisempi penpen inh, ahun tun ciang aa, a kiseh tawm vat Ad Hoc Committee ih cihte sep bang linlian in, ahun a tun ciangin Zomi Nam Ni, Khuado Ni cih te leh, mi mal aa pahtawina piakte ciang bekmah kisem zo pan phot tadih hi. Tua kipawlnate in a tuam vilvel tek ahih sawnsawn uh ciangin, Ciimnuai Zomite a dawl a dawl in hong khenthang thuah leuleu hi. Ciimnuai Zomi bup tawh kisai vaihawmna ding kikup ding khat om zenzen hi leh, a innteek ding a makai ding kiseh tawm biangbuang phingphing kul sansan ding bang khat hi aa, tua kipawlna liapluap teng mah in hong dongkholh sak mahmah kik ding hi ta lawmhlawmh hi.

A taktak in ih sep taktak ding a bulpi in tua Zomi Nam Ni, Khuado Nite bawl ding bek lawmhlawmh hi lo zaw aa, ih Zogam leitang leh ih Zomite bang ci bangin khangto sak ding, bang ci bangin ih gam ih lei leh ih mite tungah nam tuamtuam tawh hong susia hong bawlsia nuamte tung pan bangci hotkhiat ding, bang ci dal ding cih a kipan, ih kikup diamdiam ding hi zaw hi. Gentehna in cikmah hun aa Zogam aa bengh kiciing ngei naii lo kim lai, tu maa kum tam het lo a kipan Tonzang gam aa bengh kiciing cih pen, ei Zomite aa’ dingin a hoih het lo thubuai lian mahmah (big issue) khat ahihi. (Sawtpi pek a kiciingsa ahi phial zongin, mipi theih leh mipi gen sawt nai lo hi)

Ih gam ih lei khantoh nading zong kiu a tuamtuam pan muhna a tuamtuam teng tawh gawm khawm in, a nam a nam in sep ding bawl dingte gelkholhsa khunsa in koih khin dildel masak phot himhim ding ahihi. Sum leh paai ki-neih ciangin ih sep khiat pah theih dingin ahi zongin, tavuan nei kumpi lam pan uliante in a kisap ciangin ahi zongin, akisap hunhun a mau mah tawh kikop a ih theihsak ding (feed back) dingin gel kholh bawl kholh sa in khibah tang bang aa kikhiil diudeu sa aa, a khilkhil a ih neih kholh gige ding akisam pha mahmah ahihi. Hih thukhunsa vaihawmsa (planning/project) ih neih theihna dingin leitung pilna nei mipil misiamte mah amau mun sansan ah zatsiam theih ding ahihi.

A diakdiak in Zogam ah anneek tuidawn khawhsa ih kham theihna ding, khua khempeuhah mawtaw lampi tun theihna ding, cidam ludamna ding leh laipil laisiam tampi tak ih piansak zawhna ding, akideih leh a kisam bulpi mah hi pi pen ding hi. Ih gam leisung sum piang bangmah om lo a hih manin a neu a lian in pilna hanciam aa, kumpi nasem company na sem aa ih kihel zawh kim theih nangin laipil laisiam tampi tak ih piansak kul ding hi. Lai theih laisiamna pan nasep ngahna bek hi lo in, ih lungsim ngaihsutnate leh ih khuamuh nate a picing a zai semsem nadingin, ih khuak kong khakte leh ih mit kongvangte zai tak aa ih hon theih ding zong thupi toto lai ding hi.

Alina: Tedim Khuapi Veina Taktak Kinei Lo

Hun khat lai tuma kum 60 lai in Tedim tualsuak pawl khatkhatte in khuano khuata khua gamla diakdiak deuh pan a Manglai sangkah a hong paite neu-et in na simmawh bawl uhhi. A pau khawng na cingin na nuhnau in na zahpih uhhi. Tua pen Tedim sangpi panin tan 10 ongin ulianpipi a, a om hun uh ciangin, tua Tedim tualsuak kim khatte huhau in, ih Tedm khuapi pen ei mau tek ii khuapi, ih Tedim gam uksung ii ih maitangpi ahih lam kiphawk kha nawnlo in, Tedim tualsuakte khuapi bang dan ding bekin kituat kha mawk hi. Tedim khuapi khantohna ding lunglut ding sangsik in a mau tenna khua tek mah lunglut zaw tek zaw uhhi. Tedim khuapi pen a mau tawh a kisai lo zah dong dingin ngaihsun kha uhhi. Sum leh paai neih leh lam a neih zawk deuh uh ciangin Kawlpi, Mandalay, Yangon ah ten sawm zaw tekta uh a, Tedim pen a lian masa ahau masasa in kinusiasia tek ta hi.

A taktakin gen ni ci leng khuapi a omte in khuano khuata a omte kisimmawhna ahi zongin, a pil a siam ahaute a tam zaw in bangmah nei lo mizawng dai pam leh pilna nei lo mi mengkengte tungah ahi zongin, sangnaupang a golkhinte in a mau sang a, a nau zawte zawhthawh bawl cih ahi zongin, Zogam bek hi lo in mun khempeuhah a om ngeina ahihi. Zogam sungah zong Haka tualsuakte bang suuk zaw lai uhhi. Hun khat lai Zogam khuapi a suah ma lai bangin, khuano khuata a te khuavak lai in Haka khuasung tum ngam lo in a khuanawl uh a, bawngbuk (Cawbuk) a cihna ah khuazin khuamui dong ngak tang hial uh ci hi. Ahih hangin amaute in abeisa tua neu lai vaiite tawh na buaibuai nawn lo in, Haka khuapi a’dingin a kuamah peuh sinlung kikhat in ma na pang khawm diamdiam uh ahih manin leh Chin state capital leh district a kop a thuah in angah manin khantohpi in khangto uhhi.

A khangto khin mahmah gam ahi nitumna lam gamte na lengah a siate in a uk zawh man uh hi kei leh (bully > bullying) ci in mihing veve mah ahihna tawh kizui-in tudong mah sangkahna sungah a om lai veve ahihi. Kampau muk pau bek tawh hi lo in tha tang muanna tawh simmawhna leh zawhthawh bawlna a omom mah ahihi. A upadi in uk zo lua mahmah ahih man hi kei leh tudong mah mihing tektek kithusim lohna leh kideidanna mun khempeuhah a om gige lai mah ahihi. Tua bangdan a thuaklahnate ih thangpaih lak suaksuak ding zong hi khin lo hi. Ih gam ih lei puahin khangto zaw sak semsem leng tua hong simmawh ngeite in zong hong zahtak lua kisa in zong hong en ngawh ngam nawn lo mai ding uhhi. Tua bang a thangpaihna ih neih suaksuak pen zong picin lohna lianpi nam khat mah ahihi. Tua bang a thu takpi a ih gen kikkik ciangin a pausuah kik leh a to bawl kik tawh kibatna khat om ahih manin, ciamnuihna cih loh buang thu tak leh khasiat vaii a gengen kul nawn lo hi.

Thu Khupna:

Tua hi a, atung a kipawlna tampite leh biakna a tuamtuamte a ki-khuibit kik dingin, a kuamah tek in lunggulhna kinei ciat tek hi. Kipumkhat theih nang ih ommuanin kilunggulh mahmah ki-iplah mahmah tek hi. A taksuah sak zo naii lo bek ih hihi. Tua a taksuahna ding a vaihawm dingin, a thu in nang leh kei hong zawn mahmah ta hi. (Tu laitak in ZRDP – Zogam Rural Development Program, President H Vum Nang in amah leh amah hanciam tawmna tawh ih mite hanthawn in khuasim ah mawtaw tun theih nangin hong makaih hong vaihawm pen, a taksuah sep khiatna taktak khat ahihi.)

A tung aa ih gensa bangmah aa khat leh khat ih kithuzak loh ih kipawl loh huhau in, ih gam ih lei leh ih minam vaii ah lungkim lohna khat peuh a om ciangin, kipawlna atuamtuam tampi tak om napi, a huaii masa ding a thu vaan ding vaiipuak akisuan ngam om lo in aki-pengg theithei dingin pauhlap tuamtuam kizong zaw behlap hi. Kipawlna atuamtuamte in zong, atung lam ahi aa aphei lam ahi zongin, khat leh khat kizopna om kilkel lo lai mawk hi. A hunhun aa kumpi ki-uk zia leh thu pai dan a mong mu thei ding a san a zawi tawn thei ding zong ki-tawm mahmah lai hi.

Tua kawmkal ah kikup masak kidot masak diamdiam om masa peuhmah lo in, ih omna tek ah eimau tumtak tek in uino lei ko bangin leh, bul nei lo vansam bangin makaihna leh lam hilhna thu bulphuh om lopi in ih bangkua tek ah ih awng tuattuat leltak aa, kua mah’n ih aw zong hong za ngei beek lo uhhi. A za zongin hong awlmawh beek lo lai ding uhhi. Pawl khatte ta leuleu ama aituam min deihna bekbek mah bulphuh in ‘Peng Lam Suangtaat Saat Ngam’ a cihte bangin hong mawk dian ang-ang leuleu uh a ih mai beelmangg hong nuh ngiingeii ta lailai uhhi.

Tua bek tham loh in ih gitnat ih satnat lohna teng midangte hong theihpih semsem nadingin, internet sung khawngah thu khat peuh tawh kisai muhna a tuamtuam ih kigen ciangin a thu bulphuh lo in a mi vive kibulphuh zaw in khat leh khat kikawk kitawng kisel kiko in ih thapaii niloh hi. Masuan vaii thupi leh ih tuppi pen bang hi cihte tel tumtum meel lo in, ei tumtak tekin ih ciakciak pong mawk aa, lamkal ah hun ih beisaksak lel mawk hi. Imh huai imh huai lo cih khentel thei meel lo in a kul lo tata ah ih sungthute ih pho-laak thei pha mahmah bilbel sawnsawn lai hi.

Mi pil misiam mi ngaihsun thei mi picingte in dai takin theihsak huai teng, a theih masak sak uh na kiko pah lianlian uhhi. Tua a thu a kohna tawh kizui in kipawlna sung aa om a lian pen pan a neu pen dongin, a mau san ciatah na thei kim pah lianlian uhhi. Thu lian thu neu tawh kizui in a kul bangbangin kuamah theih loh kal in, na kisim kup pah diamdiam uh hi. Tuak lai peuh in pum dian pum ot pah ang-ang lo uh a, a hun leh a mun a mual zui in na gamtang uhhi. A thu a la a pian zia kan dikdek phot uhhi. Tua zawh ciangin lampi hoih lampi maan a zawi na zongin, a theihsak nopte zak dingin lawng khat in na kiko uh aa, tavuan neite’n na za pah na thei pah na sang thei pah lianlian uh in muibun takpi pah uhhi.

Ei Ciimnuai Zomite lakah zong politics thei/political minded makai picing khat om thei leng tua bang aa, gam leh lei khantoh nading thu hoih thupha ngaihsutna hong pia thei ding ei sungah zong na om kiukiu sam ding hi. Ih zat theih ih zat siam ding bek kisam hi. Tua ahih manin gam leh minam aa ding aa, a deihsak taktak, politics a uuk mahmah leh a thei a siam, a picing makaipi hoih mahmah akisam ih hihi. Tua mah bangin makaite’ a lampii/ngaihsutna pia ding ahuh ding leh a nung zui siam ding mi akisam mahmah semsem sann ih hihi.

Tua hi aa Ciimnuai Zomite in a picing/nampi lungsim ngaihsutna leh gamtat lu hekna ih neih theih kim ciat nading leh, unau laigui zom bang aa, ih kipumkhat theih nading ih lunggulhpi pen ahihi. Ih lunggulh mah bang aa hong pantah hong makaih thei ding, makai Hero pi dingin khangthak Ciimnuai Zomite aw.. ih gam ih lei in nang leh kei hong konlawh mahmah ta hi cih phawk kim ciat ni.

It is better to lead from behind and put others in front, especially when you celebrate victory when nice things occur. You take the front line when there is danger. Then people will appreciate your leadership. – Nelson Mandela.

A good leader takes a little more than his share of the blame, a little less than his share of credit. – Arnold H Glasow

The task of the leader is to get his people from where they are to where they have not been. – Henry A Kissinger

A leader is best when people barely know he exists, when his work is done, his aim fulfilled, they will say: we did it ourselves. – Lao Tzu

No man will make a great leader who wants to do it all himself or get all the credit for doing it. – Andrew Carnegie

When you can’t make them see the light, make them feel the heat. – Ronald Reagan
I suppose leadership at one time means muscles; but today it means getting along with people. – Mahatma Gandhi

People ask the difference between a leader and a boss. The leader leads and the boss drives. – Theodore Roosevelt

Leadership is practiced not so much in words as in attitude and in actions.
– Harold S Geneen

If you command wisely, you’ll be obeyed cheerfully. – Thomas Fuller

Effective leadership is not about making speeches or being liked; leadership is defined by results not attributes. – Peter Drucker

A genuin leader is not a searcher for consensus but a molder of consensus. – Martin Luther King Jr