India ah mopawi pawisiimding apai mawtaw khat tuahsia in mi 25 si
India gamsung ah mopawi pawisiimding in apai Truck mawtaw khat tuahsia in kibung ahih manin mi 25 takin sihlawh cih AFP pan kiza hi. Tuesday ni in Western India, Gujarat State sungah thupiang hi a, tua Truck mawtaw pen lei (Bridge) panin akiasuk kici hi.
Hihvai tawh kisai in palik thukan ahi Gujarat Police Inspector K.J. Kadapda in agenna ah Truck mawtaw sungah akigawm in mi 60 bang atuangkhawm uhhi ci’n genkhia hi.
Tua Truck pen lei panin anuai Pi 26 (8 Meter) asanna ah kiasuk in, anuai tui omlohna ah tusuk sawnsawn hi. Hih mawtaw sungah atuangte pen mopawi pawisiimding in apai uh hi a, asi lakah atamzaw pen numei leh naupang vive hizaw kici hi.
Mawtaw ahawlpa in hoihtak lenkip theilo “Lost Control” ahih manin lei panin anuai hawkguak sungah akiasuk hi ci’n thukan te’n genkhia uhhi.
Aphual ah asi pen mi 25 sipah a, mawtaw kilumletlian in anuai ahzong mi tampi awklai ahih manin, asi ki behlap totothei khading kici sawnsawn hi. Aliam khempeuh pen Local Hospital te ah amanlangin kipuak sakpah hi.
Hih tuahsiatna apianna munpen Bhavnagar District sungah hi a, State Capital Ahmedabad panin Tai 125 (200 km) bang agamlatna munkhat ahihi.
India gampen leitungah lamzikpi tuahsiatna ahuaisia penpen “world’s deadliest roads” in akiciamteh gamkhat ahihi.
More: Thai, Nonthaburi ah mawtaw tuahsia, Myanmar gammi 3 si, adang mi 6 liam
Kumsim in India gamsungah mawtaw tuahsiatna hangin mi 150,000 tabangin sihlawhden cimawk hi. Tuahsiatna atamzaw pen lamzikpi te hoihlo, mawtaw te hoihtak ki sitcianlo, Maintenance ginalo, mawtaw hawlte’n hoihtak hawllo, Reckless Driving cihte hangin kumsim in mawtaw tuahsiatna tamveipi piangden in, mi tampitak in anunna beilawhden uhhi. Sawltak #zomidaily
Comment piaknop aomleh...