Adangteng koi ah om?
Mt.6:33 Pasian’gam leh Ama dikna nazong masa un tua hileh “a dangteng” ong piakthuah ding hi.
“A dangteng” I cih ciang in leitung a I kisap inn leh lo, neih leh lam, suan leh khak,cidam ludamna a kipan a dang tuamtuamte hipah hi.Hih “a dangteng” I cihpen Pasain in Tapa Zeisu tawh ong piakkhop nate ahi hi(Rom.8:23.Phil.4:19,1Pet.5:7).Hih “a dangteng “ cih thupha I ngahtheihna ding in zongding aa Topa’n ongsawl thunih te ensuk ding hihang.
A masa pen in Pasian’gam zong ding in ongsawl hi.Pasian’gam a zong mi ading in lampi khatbek om aa tua in Zeisu ahihi(Jn.14:6).Hih lampi in kuamah deidan neilo hi.Tua lampi ahi Zeisu tung a tawnte bekin Pasian’gam muding uhhi.Tua ahihteh tuni hun omlai in Pasian’gam zong masa ding hihangh. Leitung in ong itloh hang Zeisu in ong it hi.Tua Zeisu in kei leh nang mawhna te maisak bekthamlo in midik ong tangsak khinzo hi.
A nihna ah Pasian’ dikna zong ding in ongsawl hi. Zeisu honpa leh Topa aa sanna ciang tawh kicing zo nailo ahih man in Ama’dikna zongding in ongsawl nahi hi. Zeisu honpa aa asang mi ading in nuntakna thak a kipan ahih man in a nuntakna luiteng nusia aa hunthak ah nuntakna thak a kipatkulmawk hi(James1:22’2:17,1Cor.5:17).
Pasian’dikna I cih in Greek kam in “dikaiosune” naci aa Mangkam in( right doing in all places) ci-in kimu thei hi.Ei kam in ci leng {a tawntung in nahoih napha sepna} cileng kikhiallo kha ding hi.Thukhat pan genleng Pasian deihna bang zuihna,sepna leh gamtatna te nahi pahhi.Tua ahih teh Pasian’ deihna tawh kituak nahoih,napha banghiam cih zong aa nuntakpih ding in Pasian in ongsawl nahi gige hi. Pasian’ deihna in : :
1. Keilo Pasian dang biakei in(Exo.20:3)
Mi hingte’n Amah bek biakding Pasian deihna ahihi(Ecc.12:13).Tuhun ciangin pawldang,siadang te awlmawh nawnlo in deihtuam pawlpi leh deihtuam sia bekmah thupi sa in kibuai mahmah tahi. Pasian abia taktak mi-in bangpawl bangpawl hita leh kua sia kua sia hita leh Pasian’thu kigenna Pasian kibiakna peuhmah nuamsa dinghi. Tua ahih manin I nopsakna in Pasian’thusung ahih ding thupi masa penhi(Ps.1:2). Ei leh ei Pasian bia I kisak laitak in I biakding Pa phawkkha lo in Pawlpi khatpeuh leh Sia khatpeuh tawh I buaibuai lai leh tua te abiabia ihi hi.A lauhuai mahmah paikhialhna khat ahi hi.Laisiangtho onggenthu sang in pawlpi khatpeuh sia khatpeuh I liatsak khakloh ding kisam mahmah hi. Hihbang kalsuan zia hoihlo te eite lakpan I paihkhiat ding hipah hi(1Cor.4:6).Pasian in Amah bek biading in ongsawl hi.
2. Kei hong zui in….(Mt.4:19)
Kei ongzui in ci in Pasian in ongzawn hi. Pasain nungzuihna I cih in I hihna bangbang ah Amah ki uksak ding Ama tung ki-apding nahi hi(Ps.37:5,Pro.3:5-8). Thu khat ah Pasian kammal Laisiangtho te nuntakpihna tawh Ama nungzuihding ahi hi. Zeisu in ka nuntakpih ding bangthu ong genhiam cih kan lo in Zeisu tawh ki buailua mahmah hi.Zeisu theikhin bekthamlo in honpa leh Topa aa asangkhin mikhat ading in Zeisu tawh buaibuai kulnawnlo aa Aman kei bang ongsawl,bang ong deihsak,bang onggen hiam ci aa kan hunmahmah tahi .Zeisu thei aa ongsawlna kammal bang aa I nuntak keileh Zeisu’ nungzuite ki suakthei ngeilo dinghi. A kammalte nuntakpihna tawh Zeisu nungzuite suahsawm ciatni.
3. Khat leh Kkhat na ki it un(Mt.15:12).
Laisiangtho lui Laisiangtho thak a ki cingsak Zeisu ongpiak thukham in khat leh khat ki it ding ahihi.I biakpiakna te a kipan mun khempeuh ah Pasian’min a thangsak leh na khempeuh a etlawmsak itna masuan aa nuntak ding ahihi.Itna kihello biakpiakna Pasian in sang peuhmah lohi(Mt.5:9,23-26). Ei pawlpi leh Siate tawh nuamsa in Khazih sung aa I unau sanggam te kiphawk khanawnlo hi. A muhdahhuai penpen khat in pawlpi leh siate ki batlohna,ki lamdanna hang in laigui zom sanggam sungsuak nangawn ki holo,ki huhlo,ki itzolo liangin ki omta hi.Tua bangpi tawh Pasian bia I kisak mahmah hang Topan ongsang deklo bek thamlo in kihzawlai dinghi(Mt.55:9b23-26,James2:14-20). Laizom sanggamte tawh ki-it lo, ki lemlo zahdong aa mittawsak thu leh la,pawlpi leh thugen siate zong belhtaaklo bektham lo in belhhuai lo hi(Mt.7:15-20).Pasian min suang aa na kisepna ah kilemna leh ki itna om hi(Act.2:43-47,Isai.9:6,1Jn.4:8b).
Tua hi aa Zeisu singlamteh tung aa ong sihna intawntung nuntakna ngah nading bek hilo aa leitung mahmah ah zong nuntaknuam aa khansau nading ahihi. Tua laitak aa I biakpiak zia, I nuntak zia leh lungsim paukzai te I kipuahphat kei leh “A dangteng” ci aa Pasian ong kamciam thupha hamphatna te I ngah ngeikei dinghi. Zeisu upna in tawntung nuntakna ong ngahsak aa Laisiangtho onggen bang aa Zeisu nungzuihna in thupha ongngahsak hi. Hih “A dangteng” cih kamciam thupha in Laisiangtho tung a ki ngaa Pasian kammal a nuntakpih mipilte a ding ahihi(Mt.7:24-27, Deut.29:9 ,Josh.1:7-8, IKs.2:3, Jn.8:31, 14:15,21,23, 15:7.10.14). 98% bang Zomi Christian te lak ah “A dangteng” a ki ci thupha koi ah omhiam? Mimal tamna tawh Pasian thupha a kingah hilo aa Pasian deihbang a nuntakna tawh thupha a kingah bek ahihlam phawk aa khanlawh hunmahmah ta hi. Lungsim takpi tawh Pasian’gam leh Ama dikna zong masa leng “A DANGTENG’ ong pia lo in omlo dinghi. Tuni Zomi Christian te nuntakna ah “A DANGTENG’ koi ah omhiam?
Sia Khaipu
Comment piaknop aomleh...