A theihhuai upna laang (No. 8) ~ Langh Khan Mung

A theihhuai upna laang (No. 8) ~ Langh Khan Mung

Prosperity gospel ahilhte in “Bang deih na hiam? Limtak ngaihsun inla, na mitkha tawh mu in. Na kam tawh a gingkhia-in gen in. Na kammalah vangliatna om hi ci hi.Hih bangin hilhnate pen mikang in “word of faith” ahk “positive confession” kici hi.

Hih bangin a hilhtheihna uh in, a nuai-a LSTho munte a khiatkhialhna hang uh ahi hi.

Piancil 1: sungah Pasianin mihing losiah a kam panin “piang hen!” acihna tawh piangsak hi. Pasian in a piansakma-in a piansak dingte a lungsimmit tawh mukholkhin hi. Tua ahih manin nate bangmahlo lak panin hong piang hi ci-in khia uh hi. Pasian in ka kam tawh ka cih bangin hong piang ding hi cih upna nei-a hih pen Pasian’ i upna (the faith of God) ci-in khia uh hi.

Late 33:6 Topa’ kampauna tawh vantung piang a, a kam pana husanna tawh vantung nate a piang hi.

Peter Nihna 3:5 Amaute in a kitheihmawh bawl uh thu pen: Tanglai pekin Pasian in ama kampauna tawh vantung le leitung na piangsak hi. Tui sung panin tui mah tawh leitung na piangsak a,

Tua mah bangin leitung mihingte’n zong i lungsimmitkha tawh mukholin i kam panin i lawhkhiatte hong piang ding hi ci uh hi.

Marka 11:22 Jesuh in amaute kiangah, “Upna nei un.

Hih LSTho in “upna nei un” hong cih ciangin Pasian in bangmah a piansakma-in a lungsim mitkha tawh teltakin mukhola, ka kam panin ka lawh bangin hong piang ding hi ci-in um hi ci-in khia uha, i gensa bangin “Pasian’ i upna”-the faith of God ci-in khiakhial uh hi.

Hebru 11:3 Pasian’ kampauna tawh leitung le vantung piang a, tu-a i muh theih nate a om nai lopi panin hong piang hi, ci-in i upna bek mah tawh a thei ihi hi.

Hih LSTho munte siksanin “Pasian’ i neih upna bang nei un”-Have the faith of God ci uh hi. Ahi zongin LSTho thuciam thak pen Greek pau tawh a kigelh hi-a, a kikantel ciangin, “Pasian’ i neih bang upna nei un” ci-a khiat ding hilo-a, “Pasian um un” ci-a khiat ding hizaw cih kimu hi.

Hebrew 11:3 pen zong “i upna bek mah tawh a thei ihi hi” cihna-ah, Pasian’i nei bang upna i neih manin a thei ihi hi cih hilo-a, “Pasian mahmah i up manin a thei ihi hi” cih ding hizaw hi. LSTho a khiatkhialh man un, a updan uh leh a hilhnate uh zong a khial ahi hi. Langh Khan Mung