A zahtakhuai ‘Kei’ cih min

A zahtakhuai ‘Kei’ cih min

Pasian in sepzawhloh nei lo hi. Tua hiaa ‘Kei or Ka’ cih kammal ii nungah i zat kammal te in vangliatna nei hi. Tua kammal i zat sim in i deihna te tawh zop huai hi.

I hihna taktak i pulak khiatna ‘kei’ ahihmanin vanglian hi. Midangte hong cihna sangin ‘Kei’ cih kammal vanglian zaw hi.

‘Kei ka hi theihi, ka pilhi, ka cidam hi, ka gualzo hi, ka thahat hi’ na cih ciangin Pasian hi thei hi, Pasian thahat hi, Pasian in semthei hi, Pasian kicing hi a cici na hihi cileng khialhna om lua lo ding hi.

Na cihbangin Pasian in na nuntakna sungah na hongsem ding hi. Joseph Prince in ‘kam na pau laiteng a gualzo na hiaa kam na pau nawnloh ciangin a lel na hihi’ ci hi.

Na kimlepam haksatna hangin kipuksak kei in. Sumham sa thei, nasepna hamsam thei, lawmlengual lakah hamsa thei aa leitungah haksatna om thei hi. Mizahpih nenniam hun, a thuman lopi in hong ki bawl hun om kha zenzen thei hi.

Tuabang thu tuamtuam te hangin ki lungneu sakkha kei in. Pasian in a ma limlemel sun in keihong bawl zo hi ci in thala in.

Joy Meyer in ‘Men are literally eating their own words’, ‘mihingtepen a ma kammal a ne kik te hilel hi’ ci hi. Deih zahzah in i zat theih leh thupha i ngah ding hi. Baihlamtak a nalianpi sepna/ Siamsin Library

Pasian min a hi ‘Kei’

Laisiangtho sungah Pasian in Moses a sapna thu na kiciamteh hi. Pasian in Moses sam aa Moses in nangkua na hihiam ci in dongkik hi.

Pasian in dawngkik aa ‘Kei mah ka hihi. Kei mah a kici mipa in note kiangah kei hongsawl hi ci in’ ci hi. Pai 3:14 ‘Kei’(mangkam in I) ci in dawngkik hi.

Pasian minpen a tuamtuam om thei hi.
Ahizongin Pasian in hi laimun ah Jahovah a hiaa a mindang tuamtuam te ahizongin gen lo in ‘Kei’ ka hihi na ci hi. ‘Kei’ cih pen Pasian min hi cileng ki khial lua tuanlo hi.

‘Kei’ ci in kam i pau sim in neu ngaihsut kei ni. Pasian min khatmah a gengen i hihlam ki thei ni. Akimutheilo Pasian i sutna min ahihi.

Thangno cih min pen mi khempeuh in zang theilo hi. Mi khempeuh Thangno hilo hi. Ahizongin mi khempeuh in ‘Kei’ cih min zangthei hi.

Banghanghiamcihleh mi khempeuh sungah Pasian limlemel sutna om hi. Mi khempeuh Pasian mai ah i kibanna minsiangtho a hihi.