A theihhuai Australia Community, Association ki makaihdan pawlkhat

A theihhuai Australia Community, Association ki makaihdan pawlkhat

Zomite pawlkhat kibawlna khat peuhpeuh ah makai pan mun khat peuh I letteh kawl kalgap makaite kibangkhathei zel ahih manin tuaci bang in Zomite ki pawlna a kalsuan khak loh nading leh I kipawlnate khuttung lumleh abat loh nading deihsakna tawh mi khat leh nih beek in a phattuampih khak leh ci-in Community Course ka sinlai a thupi ka sak pawlkhat leh Lawyer Maurice Blackburn I gelh leh Incorporated Associations Management and Risk, Ethnic Community Council of Queensland te gelh Board Member Role Descriptions leh Model rules sunga kigelh pawlkhat kaikhawm in a tomthei pen a kong gelhsawn ahi hi. Zolai gelh baihlo mawk ahih manin khialhna oam leh hehpihna tawh na puahsak un.

President/Chairman mawhpuak (President/Chairman responsibility):

Ama mawhpuakpi pen in ahih leh meeting makaih ding ahi hi. Meeting hun ah minute 10 a zekai leh meeting paiteng in amau sung panin ama tang midang sehthei uha, hehtheih hilo hi. I hehnopding leh hun lapding cih hong phawksak hi.

Meeting Agenda thukimsate ama utthu tawh khelgawp theilo hi. Meeting paite deih dan, Agenda puakte deihdan suakta tak-in thugensak ding hi.

Mipite leh seppihte tawh a hunzui in kimu in holimzel ding hi.

Seppih management committee te huh in panpih ding hi.

Vice President/Vice-Chairman in ama om loh hunin ama nasep khempeuh sem thei hi.

Note: Zomi Evangelist Conference 2018, Kalaymyo ah Sia. Pau Khai Meeting makaih dan etteh huai mahmah hi. Pilna neilo mi pawlkhat te’n meeting a makaih uhteh ama lungsim dan a thu a kigen kei leh hehgawp in, na puanlom uh zial inla ciah in, tu-in, nang thugen hithei kei mawk cih thei uh hi. Tua ci bang meeting makaih cih bang Australia ah kizanghtheilo hi.

Secretary mawhpuak (Secretary responsibility):

Meeting hun le ni, a nai ding leh a munding limtak zasak dinga, meeting neihma in agenda teng limtak kaikhawm in meeting kahdingteng tungah theisakkholding hi.

General meeting neihding hun leh a mun ding zong limtak gelding a, mipi tungah ni 14 mapeuhmah in zasak ding hi.

Meeting hun ah a beisa a nasepnate limtak pulak ding hi.

Meeting neih ciangin limtak a ni, a kha, a hun, a mun leh a meeting kahteng leh kisam na pi’n a kihel theiloteng limtak ciamteh ding hi.

Meeting hun ah sepding, pulakdinga kikhensat khempeuh zong limtak pulak in theisakpah ding hi.

Seppih Management committee sung leh mipi kikal ah a kitangsam bangin thu le la vanding, zasakding hi.

Kipawlna dangte tawh thu le la khat peuh aom leh zong a manlangthei penin a seppihte zasak in vanding hi.

Meeting kah hun minute 10 a zekai leh ama tangding in meeting kahsung pan midang kisehthei hi.

Note: Zomi Evangelist Conference 2018, Kalaymyo ah Sia. Langh Za Kap omdan ettehhuai mahmah a, Meeting hun ah Secretary te om dan ding ahi hi. Ama dinmun theilo Secretary pawlkhatte thugennuam in kitul mawhthei mawk uha, buaihuai thei hi.

Sumkemte mawhpuak (Treasurer responsibility):

Sum leh sum lut sum zatnate limtak ciamteh in kemcingding hi.

Management Committee or Executive Committee thukimna omlopi in mikhat peuh in sum a lak hang, ama ut thu tawh mawkpiak, mawk leitawisak theilo hi.

Zatdinga khensatsa, thukimsalo buang, President, Secretary leh makai khat peuh in sumkemte tungah sum mawklaktheilo hi. Alak leh zong apiak loh ding ahi hi.

Ki pawlna makaite thukimnalo buang ama ut thu tawh sum mawkzek, mawkzat theilo hi.

A hun zui in sum din mun sum lut, sum zatnate makaite tung leh mipite tungah pulakding hi.

I ki pawlna kumpi theihpih ahih leh Australia financial year pen kumsim in July kha hi-a, kumpite tung pan Community Annual financial year report form pen June kha sung ahih kei leh July bullam in hong tung hi. Tua form kumpite tungah I puak kikma in General meeting samin mipite tungah sumlut, sum zatna sum dinmun I pulak bangbang tua form tungah kigelh hi. Mipi theih loh a tua form makaiteng in adak apkik mawk uh leh mipi leh kumpite akhem illegal financial report ahi hi. Tua bang aom loh na dingin sumkemte I pilvangkul hi.

Executive Committee Members te mawhpuak (Responsibility for EC members):

Makai te’n thukimna omsa bangin na asem uh hiam cih vanding uha, huhding a kisap uh leh huh in panpih thei hi.

Makai te’n thukhun om bangin hong makaih uh hiam, a kalsuan uh hiam cih encikding uha, tuaci bang a hih kei uh leh Meeting ah hansantak in genthei uh hi.

Thukhunzuilo, kumpi deihna leh mipi deihna tawh kituak a nasemlo peuhpeuh President/Secretary/Treasurer etc, guptuam, paihtuam neiloding in hilhding uh hi. Mun pawlkhat ah makaihte deih abat kei leh EC in Emergency general meeting samin makai kikhekna election a bawl zong om hi.

Mipite deihna zong Meeting ah President/Secretary te tungah limtak pulakthei uh hi.

Hihteng I tel leh I zatsiam masiah Zomite sungah biakna Pawlpi thak leh kipawlna thak hong piangpianglaiding in lam ethuai hi. Khaibawi